ក្រុងម៉ានីល-ហ្វ៊ីលីពីន ៖ តាមទិន្នន័យពីរដ្ឋបាលព័ត៌មានថាមពលសហរដ្ឋអាមេរិកការចម្រាញ់ប្រេងក្នុងប្រទេសហ្វ៊ីលីពីនអាចនឹងកើនទ្បើងពាក់កណ្តាល ឬស្មើនឹង៣៩.០០០ធុង ក្នុងមួយថ្ងៃនៅឆ្នាំ២០១៩ ធៀបនឹងបរិមាណ២៦.០០០ធុង ក្នុងឆ្នាំ២០១៣ ។
ទីភ្នាក់ងារខាងលើបានលើកទ្បើងថា ការរុករកថ្មីៗនេះ ដែលបានចាប់ផ្តើមទ្បើងដោយក្រសួងថាមពលអាចនឹងជំរុញផលិតកម្មប្រេងរបស់ហ្វ៊ីលីពីនឱ្យកើនទ្បើង ហើយថែមទាំងកាត់បន្ថយនូវអនិស្សរភាពរបស់ខ្លួន (ភាពក្រោមចំណុះ) លើការនាំចូលប្រេងឥន្ធនៈទៀតផង ។ ម្យ៉ាងទៀត ប្លុកទីតាំងរុករកឧស្ម័ននិងប្រេង១១កន្លែងក្នុងតំបន់ដែលមានសក្តានុពលប្រេង Palawan Basin និងនៅក្បែរតំបន់ដែលស្នើដោយក្រសួង ចំពោះការរុករកនេះ អាចផ្តល់គុណប្រយោជន៍ក្នុងការជំរុញផលិតកម្មឱ្យសម្រេចបានដូចការរៀបរាប់ខាងលើ ដែលច្រើនជាងមុន៥០% ។
គួររំឭកថា កាលពីឆ្នាំ២០១៣ ផលិតកម្មប្រេងសរុបទូទាំងប្រទេសហ្វ៊ីលីពីនមានចំនួន២៦.០០០ធុង ក្នុងមួយថ្ងៃ ខណៈប្រេងដែលប្រើប្រាស់មានរហូតទៅដល់២៩៩.០០០ធុង ក្នុងមួយថ្ងៃឯណោះ ៕
ចែករំលែកព័តមាននេះ