រដ្ឋាភិបាលហ្ស៊កដានី អះអាងកាលពីថ្ងៃទី២៨ មករា ថា ត្រៀមដោះលែងនារីជីហាដអីុរ៉ាក់ម្នាក់ ដែលកំពុងជាប់ឃុំឃាំង ជាថ្នូរនឹងការដោះលែងអ្នកបើកយន្តហោះរបស់ខ្លួនដែលជាប់ជាចំណាប់ខ្មាំងរបស់ក្រុមរដ្ឋអ៊ិស្លាម ។
ក្នុងវីដេអូមួយ ចាក់ផ្សាយកាលពីថ្ងៃទី២៧ មករា ក្រុមជីហាដរដ្ឋអ៊ិស្លាមទាមទារឱ្យដោះលែងនារីអត្តឃាតជនជាតិអីុរ៉ាក់ម្នាក់ នាង Sajida Al Rishawi ដែលកំពុងជាប់ឃុំឃាំងនៅហ្ស៊កដានី រយៈពេល២៤ម៉ោង បើពុំដូច្នោះទេ គេនឹងសម្លាប់អ្នកបើកយន្តហោះហ្ស៊កដានី លោក Maaz Al Kassasbeh ព្រមទាំងចំណាប់ខ្មាំងជប៉ុន លោក កេនហ្ស៊ី ហ្គោតូ ។ យោងតាម ក្រុងតូក្យូថា ឱសានវាទនេះត្រូវផុតនាវេលាម៉ោង១៤ ម៉ោងសកល ។
ដកស្រង់សម្តីដោយទូរទស្សន៍រដ្ឋ អ្នកនាំពាក្យរដ្ឋាភិបាលហ្ស៊កដានី លោក ម៉ូហាម៉េដ អាល់ ម៉ូមឺនី ថ្លែងថា ហ្ស៊កដានីត្រៀមខ្លួនរួចរាល់ហើយដោះលែងអ្នកទោស នាង Sajida Al Rishawi ក្នុងលក្ខខណ្ឌដែលអ្នកបើកយន្តហោះហ្ស៊កដានី ត្រូវបានដោះលែងដោយសុខសប្បាយ ។ ជំហររបស់ហ្ស៊កដានី គឺធានាសន្តិសុខរបស់កុលបុត្ររបស់យើង អ្នកបើកយន្តហោះ លោក Maaz Al Kassasheh ។
រដ្ឋមន្ត្រីការបរទេសហ្ស៊កដានី លោក Nasser Judeh អះអាងកាលពីថ្ងៃទី២៨ មករា ថា ប្រទេសរបស់លោកទាមទារឱ្យក្រុមរដ្ឋអ៊ិស្លាម បង្ហាញច្បាស់ថា អ្នកបើកយន្តហោះហ្ស៊កដានីរូបនេះ នៅរស់រានមានជីវិតនៅឡើយ ។
ក្នុងសេចក្តីប្រកាសមួយ រដ្ឋមន្ត្រីរូបនេះថ្លែងថា ហ្ស៊កដានីស្នើដល់ក្រុមរដ្ឋអ៊ិស្លាមឱ្យផ្តល់ភស្តុតាងពីការនៅរស់រានមានជីវិតរបស់អ្នកបើកយន្តហោះដែលចាប់ខ្លួនកាលពីឆ្នាំមុន ប៉ុន្តែយើងនៅមិនទាន់ទទួលបានចម្លើយតបនៅឡើយ ។
មុននេះ អ្នកទទួលខុសត្រូវហ្ស៊កដានីម្នាក់ បានបដិសេធព័ត៌មាននានាស្តីពីការនាំអ្នកទោសជានារីអុីរ៉ាក់ចេញពីពន្ធនាគារដើម្បីដោះលែង ។ នារីរូបនោះត្រូវកាត់ទោសប្រហារជីវីតនៅហ្ស៊កដានី ដោយសាររួមគំនិតវាយប្រហារភេរវកម្មនានា បណ្តាលឱ្យមនុស្សស្លាប់៦០នាក់ នៅក្រុងអាម៉ង់ កាលពីខែវិច្ឆិកា ឆ្នាំ២០០៥ ។
ប្រភពព័ត៌មានផ្លូវការ និងយោធាហ្ស៊កដានី ធ្លាប់បានគូសបញ្ជាក់នាពេលមុននេះថា ក្នុងវីដេអូក្រុមរដ្ឋអ៊ិស្លាមទាមទារឱ្យដោះលែងនារីអុីរ៉ាក់នោះ ជាថ្នូរនឹងចំណាប់ខ្មាំងជប៉ុន ក៏ប៉ុន្តែក្រុមជីហាដនេះ មិននិយាយពីការដោះលែងអ្នកបើកយន្តហោះហ្ស៊កដានីទេ ផ្ទុយទៅវិញក្រុមនោះគំរាមសម្លាប់អ្នកទាំង២ ។
កាលពីយប់ថ្ងៃទី២៧ មករា ឪពុកអ្នកបើកយន្តហោះរូបនេះ បានស្នើដល់អាជ្ញាធរឱ្យព្រមធ្វើតាមការទាមទាររបស់ក្រុមរដ្ឋអ៊ិស្លាម ពេលមានបាតុកម្មរបស់បណ្តាសមាជិកកុលសម្ព័ន្ធ Karak (អ្នកបើកយន្តហោះនេះស្ថិតក្នុងកុលសម្ព័ន្ធនេះ) នៅមុខវិមានរដ្ឋាភិបាលក្រុងអាម៉ង់ ។
យោងតាមសារមួយអានដោយចំណាប់ខ្មាំងជប៉ុនថា ក្រុមរដ្ឋអ៊ិស្លាមគំរាមជាថ្មី សម្លាប់ភ្លាមៗអ្នកបើកយន្តហោះហ្ស៊កដានី ប្រសិនបើនារីជីហាដអុីរ៉ាក់ ពុំត្រូវបានដោះលែងនាថ្ងៃទី២៩ មករា ទេនោះ ៕
ចែករំលែកព័តមាននេះ