ខេត្តរតនគិរី ៖ កម្លាំងកងរាជអាវុធហត្ថខេត្តសហការជាមួយកម្លាំងអាវុធហត្ថមូលដ្ឋានក្រុងបានលុង ដឹកនាំដោយលោកជា សុភ័ក្ត្រ ព្រះរាជអាជ្ញារងអមសាលាដំបូងខេត្ត កាលពីវេលាម៉ោង១០ និង៣០នាទីព្រឹក ថ្ងៃទី២៨ មករា ២០១៥ បានចុះទៅឆែកឆេរផ្ទះជួលមួយកន្លែងក្នុងភូមិជ័យជំនះ សង្កាត់ឡាបានសៀក ក្រុងបានលុង រកឃើញថ្នាំញៀនប្រភេទម៉ាទឹកកកចំនួន៧ថង់តូច រួមជាមួយវត្ថុតាងមួយចំនួនទៀត ព្រមទាំងឃាត់ខ្លួនស្ត្រីម្នាក់ផងដែរ។
លោកវរៈសេនីយ៍ត្រី ហៃ វណ្ណារ៉ា មេបញ្ជាការមូលដ្ឋានកងរាជអាវុធហត្ថក្រុងបានលុងបានឱ្យដឹងថា ដោយកម្លាំងអាវុធហត្ថខិតខំអនុវត្តទៅតាមការចង្អុលបង្ហាញរបស់លោកនាយឧត្តមសេនីយ៍សៅ សុខា មេបញ្ជា
ការកងរាជអាវុធហត្ថលើផ្ទៃប្រទេស ព្រមទាំងអនុវត្តតាមបទបញ្ជារបស់លោកឧត្តមសេនីយ៍ត្រី គឹម រស្មី មេបញ្ជាការកងរាជអាវុធហត្ថខេត្ត ជុំវិញការបង្ការ ទប់ស្កាត់រាល់បទល្មើសគ្រប់ប្រភេទ ជាពិសេសគឺបទល្មើសគ្រឿងញៀននេះតែម្តង ហេតុដូច្នេះហើយទើបកម្លាំងអាវុធហត្ថទាំងអស់ខិតខំយកចិត្តទុកដាក់អនុវត្តនៅតួនាទីរបស់ខ្លួន ដើម្បីឈានទៅរកភាពជោគជ័យការងារផងដែរ។
ជាក់ស្តែងនៅព្រឹកថ្ងៃទី២៨ មករា ២០១៥ កម្លាំងបានធ្វើការស្រាវជ្រាវយ៉ាងយកចិត្តទុកដាក់អស់រយៈពេលជាច្រើនថ្ងៃទើបកំណត់មុខសញ្ញាបាន រួចក៏សុំយោបល់ទៅព្រះរាជអាជ្ញាដឹកនាំបញ្ជាផ្ទាល់ដោយលោកជា សុភ័ក្ត្រ ចុះទៅធ្វើការឆែកឆេរបន្ទប់ជួលមួយកន្លែងខាងលើ រកឃើញវត្ថុតាងថ្នាំញៀនប្រភេទម៉ាទឹកកកចំនួន៧ថង់តួច ជញ្ជីងថ្លឹងថ្នាំញៀនចំនួន២ ម៉ូតូម៉ាកស៊ីរុស ពណ៌ខ្មៅ អត់ស្លាកលេខ១គ្រឿង សម្ភារៈសេពមួយចំនួន ព្រមទាំងឃាត់ខ្លួនស្ត្រីម្នាក់ឈ្មោះ ទេស ចិន្តា ភេទស្រី អាយុ៣២ឆ្នាំ ជនជាតិខ្មែរ មុនរបរមិនពិតប្រាកដ ស្នាក់នៅផ្ទះជួលក្នុងភូមិជ័យជំនះ សង្កាត់ឡាបានសៀក ក្រុងបានលុង ខណៈកំពុងធ្វើសកម្មភាពចែកចាយថ្នាំញៀន ចំណែកបុរសជាប្តីបានរត់រួចបាត់។
បច្ចុប្បន្នស្ត្រីសង្ស័យ ព្រមទាំងថ្នាំញៀន និងវត្ថុតាងផ្សេងៗទៀតត្រូវបាននាំមកកាន់ទីបញ្ជាការដ្ឋានកងរាជអាវុធហត្ថខេត្តដើម្បីបញ្ជូនខ្លួនទៅតុលាការចាត់ការបន្តទៅតាមផ្លូវច្បាប់ផងដែរ៕
ចែករំលែកព័តមាននេះ