ខេត្តក្រចេះ ៖ ស្វាតូចធំជាង២០ក្បាល កំពុងបង្កការអុកឡុក រញ៉េរញ៉ៃគួរឱ្យខ្លាចលើរមណីយដ្ឋានភ្នំសំបុក រំខានដល់ការសំណាក់ធម៌របស់ព្រះសង្ឃ និងតាជីយាយជីនៅលើភ្នំ ពិសេសបានខាំគេឯងមិនរើសមុខ
ខេត្តក្រចេះ ៖ ស្វាតូចធំជាង២០ក្បាល កំពុងបង្កការអុកឡុក រញ៉េរញ៉ៃគួរឱ្យខ្លាចលើរមណីយដ្ឋានភ្នំសំបុក រំខានដល់ការសំណាក់ធម៌របស់ព្រះសង្ឃ និងតាជីយាយជីនៅលើភ្នំ ពិសេសបានខាំគេឯងមិនរើសមុខ បណ្តាលឱ្យរងរបួសថែមទៀត រួមមានទាំងព្រះសង្ឃ និងតាជយាយជីផងដែរ រហូតធ្វើឱ្យគេស្អប់គ្រប់ៗគ្នា ។
ការអុកឡុករបស់ហ្វូងស្វាទាំងនេះ ត្រូវបានអ្នកស្រុកនិយាយថា កើតមានច្រើនឆ្នាំមកហើយ ក្រោយពីវាបានកើតកូនចៅកាន់តែច្រើនឡើងៗពីមួយឆ្នាំទៅមួយឆ្នាំ ។ ជារៀងរាល់ថ្ងៃ ពិសេសពេលព្រឹកចំពេលរៀបចង្ហាន់ព្រះសង្ឃ និងពេលរសៀល ពួកវាតែងចេញពីព្រៃតាមជើងភ្នំឡើងមកវត្តដណ្តើមចំណីអាហារពីតាជី យាយជី និងចង្ហាន់ព្រះសង្ឃ ។ មើលចុះ សូម្បីស្បែកជើងក៏មិនប្រហែសបានដែរ ពេលដោះពីជើងសុទ្ធតែយកទៅដាក់ក្នុងទ្រុង ទើបគង់ ។
ដោយសារតែការអុកឡុកឥតឈប់ឈរនេះ ទើបរោងអាស្រមសំណាក់ធម៌របស់តាជីយាយជីជាង១០បន្ទប់នៅលើភ្នំ ត្រូវសម្រេចបិទទ្វារទាំងមុខទាំងក្រោយ ។ ចំណែកដំបូលក្បឿង ដំបូលស័ង្កសី ដំបូលព្រះវិហារ និងអាងទឹកសម្រាប់ប្រើប្រាស់ ក៏ត្រូវហ្វូងស្វានេះបំផ្លិចបំផ្លាញខូចខាតឥតឈប់ឈរដែរ ។
លោកយាយ ហែ ឆាន ក្នុងចំណោមដូនជីជាច្រើននាក់ ដែលធ្លាប់រងគ្រោះដោយស្វាខាំ បានរៀបរាប់ឱ្យដឹងនៅថ្ងៃទី២៥ មករា ថា កន្លងមកលោកយាយត្រូវស្វាខាំរបួសក្បាល នៅពេលគាត់កំពុងដេកនៅលើរោងសំណាក់ធម៌ ។ សព្វថ្ងៃនេះ បើមិនប្រុងប្រយ័ត្ន ម្ហូបចំណី និងសម្ភារប្រើប្រាស់ គឺវានឹងបំផ្លិចបំផ្លាញ និងលួចយកទៅបាត់អស់មិនខាន ។
លោកយាយបន្តថា ជាច្រើនឆ្នាំមកនេះ ពួកវាហាក់ដូចមិនសូវកាចដូចឆ្នាំនេះទេ ប្រហែលជាពេលនេះពួកវាមានចំនួនកាន់តែច្រើន ទើបវាលែងខ្លាចមនុស្ស ។ នៅក្នុងព្រៃមានស្វាច្រើនទៀត ប៉ុន្តែស្វាដែលកាចមកអុកឡុកមានប្រមាណជាង២០ក្បាលប៉ុណ្ណោះ ។
មិនថាតែតាជី យាយជី និងព្រះសង្ឃទេដែលធ្លាប់រងគ្រោះ ដោយសារតែពួកវាខាំនោះ សូម្បីតែអ្នកទេសចរបរទេសមួយចំនួន ក៏ធ្លាប់របួសជាច្រើននាក់ដោយសារវាខាំដែរ នៅពេលដើរនៅលើភ្នំមិនបានប្រុងប្រយ័ត្ន ។
អ្នកភូមិនៅម្តុំនោះ បាននិយាយថា សត្វស្វាទាំងនេះមករស់នៅតាមព្រៃលើភ្នំសំបុកជាច្រើនឆ្នាំមកហើយ តែកន្លងមកមានតែពីរបីក្បាលប៉ុណ្ណោះ ដោយសារអ្នកភូមិយកទៅលែងក្នុងព្រៃភ្នំ និងមួយចំនួនទៀតមេព្រៃចាប់ពីណាពីណីមក យកទៅលែងនៅក្បែរៗនោះ ។
យ៉ាងណាក៏ដោយ លោក ណាយ ឆាយ គណៈកម្មការវត្តភ្នំសំបុក បានប្រាប់ថាកន្លងមកដោយមើលឃើញពីការលំបាកដែលបង្កឡើងពីពពួកសត្វស្វាទាំងនេះ លោកក៏ធ្លាប់រាយការណ៍ទៅអាជ្ញាធរឱ្យជួយទប់ស្កាត់ និងមានវិធានការដែរ តែរហូតមកទល់ពេលនេះ មិនទាន់មានវិធានការណាមួយនៅឡើយទេ ។
អ្នកភូមិបានលើកឡើងថា អាជ្ញាធរគួរមានវិធានការអភិរក្សសត្វស្វាទាំងនេះឱ្យមានកន្លែងសមគួរនៅលើភ្នំនេះ ដោយមានចំណីអាហារសម្រាប់វាស៊ីគ្រប់គ្រាន់ កុំឱ្យអត់ឃ្លាន ដណ្តើមចំណីមនុស្ស ឬក៏មានទ្រុងដាក់ឱ្យបានត្រឹមត្រូវសម្រាប់ទាក់ទាញភ្ញៀវទេសចរ ។
មេឃុំថ្មគ្រែ លោក តែម ណាស៊ី ឱ្យដឹងតាមទូរស័ព្ទថា កន្លងមក លោកធ្លាប់បានប្រជុំជាមួយស្ថាប័នរដ្ឋបាលព្រៃឈើដែលនៅក្បែរនោះ ដើម្បីមានវិធានការចំពោះហ្វូងស្វាទាំងនេះដែរ តែជាការលំបាកថា តើត្រូវដោះស្រាយបែបណា ? លោកថា មិនមែនមិនគិតទេ គឺគិតណាស់… តែគិតមិនចេញ ៕
ចែករំលែកព័តមាននេះ