តម្លៃរ៉ែដែកនាំចូលទីផ្សារចិនបន្តធ្លាក់ចុះ
ក្រុងប៉េកាំង-ចិន ៖ របាយការណ៍កាលពីថ្ងៃទី២៧ មករា បង្ហាញថា តម្លៃហាងឆេងរ៉ែ ដែកដែលបានបុកចូលទីផ្សារប្រទេសចិន តាមកំពង់ផែធំៗចំនួន៣៣ បានបន្តធ្លាក់ថ្លៃដដែល
ក្រុងប៉េកាំង-ចិន ៖ របាយការណ៍កាលពីថ្ងៃទី២៧ មករា បង្ហាញថា តម្លៃហាងឆេងរ៉ែ ដែកដែលបានបុកចូលទីផ្សារប្រទេសចិន តាមកំពង់ផែធំៗចំនួន៣៣ បានបន្តធ្លាក់ថ្លៃដដែល ដោយសារតែការធ្លាក់ចុះយ៉ាងគំហុកនៃតម្លៃដែកថែប ។
សម្រាប់សប្តាហ៍នេះ សន្ទស្សន៍តម្លៃរ៉ែដែកនាំចូលប្រទេសចិនលំដាប់រ៉ែសុទ្ធល្អ៦២% បានធ្លាក់ថ្លៃ២ពិន្ទុ ធៀបនឹងសប្តាហ៍មុន បើតាមតួលេខពីទីភ្នាក់ងារព័ត៌មានចិនស៊ីនហួ ។ ចំណែកការទូទាត់បញ្ជីរ៉ែដែកដែលបាននាំចូលមានចំនួន១០១,៧៣លានតោន កើនឡើង២,៨៦% ឬ២,៨៣លានតោន ធៀបនឹងអំឡុងពេលមុន (ថ្ងៃទី១៣-១៩ មករា ឆ្នាំ២០១៤) ។
តាមទិន្នន័យក៏បានបញ្ជាក់ផងដែរថា ការធ្លាក់ថ្លៃយ៉ាងខ្លាំងនៃតម្លៃទីផ្សារដែកថែប បាននាំឱ្យហាងឆេងរ៉ែដែកថយចុះផងដែរកាលពីសប្តាហ៍មុន ។ ដូចនេះវាត្រូវបានគេប៉ាន់ប្រមាណថា កត្តាចុះថយនៃតម្រូវការដែកថែបនឹងបន្តជំរុញឱ្យតម្លៃរ៉ែដែកចុះថោកជាងមុន ។ ម្យ៉ាងទៀត ទីផ្សារផលិតផលនេះក៏នឹងបន្តស្ងប់ស្ងាត់រហូតដល់ខែក្រោយ ខណៈពិធីបុណ្យចូលឆ្នាំប្រពៃណីចិនខិតជិតមកដល់ ។
គួរបញ្ជាក់ថា ទិន្នន័យដើមពីតម្លៃហាងឆេងជួញដូរផលិតផលនេះ ត្រូវបានប្រមែប្រមូលតាមរយៈទិន្នន័យទូទាំងពិភពលោករបស់ទីភ្នាក់ងារព័ត៌មានស៊ីនហួ ក៏ដូចជាបណ្តាញអ្នកប្រមូលព័ត៌មានជាច្រើនទៀតដែលគេដាក់រួមគ្នាទទួលយកការពន្យល់ពីអ្នកវិភាគអំពីវិស័យដែកនិងដែកថែប ទាំងការលក់រាយនិងលក់បោះដុំ ៕
ចែករំលែកព័តមាននេះ