រាជធានីភ្នំពេញ ៖ បន្ទាប់ពីចុះពិនិត្យនៅកន្លែងកើតហេតុនៃការឆ្លងជំងឺអេដស៍ក្នុងភូមិរកា ស្រុកសង្កែ ខេត្តបាត់ដំបង ប្រធានគណៈកម្មការទី៨ នៃរដ្ឋសភាបានកោះអញ្ជើញរដ្ឋមន្ត្រីក្រសួងសុខាភិបាលចូលបំភ្លឺជុំវិញបញ្ហាឆ្លងជំងឺអេដស៍នោះ ។
ក្រោយកិច្ចប្រជុំពិភាក្សាសួរដេញដោលអស់រយៈពេលជាង២ម៉ោងនារសៀលថ្ងៃទី២៧ មករា នៅវិមានរដ្ឋសភា លោក ម៉ម ប៊ុនហេង រដ្ឋមន្ត្រីក្រសួងសុខាភិបាលប្រាប់ក្រុមអ្នកសារព័ត៌មានថា ការឆ្លងមេរោគអេដស៍ក្នុងភូមិរកា រហូតដល់ថ្ងៃទី២២ មករា មានចំនួន២២៦នាក់។ ការជួបពិភាក្សា ក៏ជាការបង្ហាញក្តីកង្វល់របស់ក្រសួងសុខាភិបាល និងរាជរដ្ឋាភិបាល ក្នុងការយកចិត្តទុកដាក់ចំពោះករណីឆ្លងមេរោគអេដស៍នោះផងដែរ ។
លោកថ្លែងថា មកដល់ពេលនេះ ក្រសួងបានពង្រីកមណ្ឌលសុខភាព និងការផ្តល់ឱសថប្រឆាំងជំងឺអេដស៍ និងឱសថសម្រាប់ថែទាំព្យាបាលមេរោគបន្ទាប់បន្សំដល់ប្រជាពលរដ្ឋដែលឆ្លងទាំងនោះ និងរថយន្តសម្រាប់ជួយសង្គ្រោះបន្ទាន់ ។
លោក ម៉ម ប៊ុនហេង លើកឡើងថា ក្រសួងសុខាភិបាលបានសិក្សាចំពោះករណីឆ្លងមេរោគអេដស៍នៅភូមិរកា មកពីការប្រើប្រាស់សឺរ៉ាំង ។ ទាក់ទងនឹងការចម្លងមេរោគអេដស៍នោះ លោករដ្ឋមន្ត្រីបញ្ជាក់ថា អ្នកដែលធ្វើឲ្យឆ្លងមេរោគអេដស៍នោះ មិនមែនជាគ្រូពេទ្យនោះទេ គឺជាអ្នកដែលរកស៊ីចាក់ថ្នាំតែប៉ុណ្ណោះ។ ទោះយ៉ាងណាក្តី លោករដ្ឋមន្ត្រីមិនបានបញ្ជាក់ពីកំហុសអ្នកណាច្បាស់លាស់ទេ ។ គ្រូពេទ្យទាំងអស់ដែលចេញបម្រើការងារត្រូវបានឆ្លងកាត់គណៈវិជ្ជាជីវៈរបស់ក្រសួងសុខាភិបាលគ្រប់ទាំងអស់ ។
លោក ម៉ម ប៊ុនហេង ឲ្យដឹងថា នៅឆ្នាំ២០១៥ ក្រសួងចង់ជ្រើសរើសមន្ត្រីពេទ្យ ប្រមាណ១.៥០០នាក់ ប៉ុន្តែការចង់បាននេះអាស្រ័យទៅលើរាជរដ្ឋាភិបាលជាអ្នកសម្រេច ព្រោះថា ក្រសួងចង់ឲ្យមន្ត្រីពេទ្យទទួលបានប្រាក់បៀវត្សច្រើន ។
ទាក់ទិននឹងប្រជាពលរដ្ឋដែលឆ្លងជំងឺអេដស៍នៅភូមិរកាដែរនោះ លោករដ្ឋមន្ត្រីបានអំពាវនាវសុំកុំឲ្យមានការរើសអើងពួកគាត់ និងជួយលើកទឹកចិត្តដើម្បីបន្តការរស់នៅទៅមុខទៀត ។
ចំណែកលោកជំទាវ កែវ សុវណ្ណរតន៍ ប្រធានគណៈកម្មការទី៨នៃរដ្ឋសភា មានប្រសាសន៍ថា គណៈកម្មការទី៨ និងសមាជិកគណៈកម្មការផ្សេងរបស់រដ្ឋសភាស្នើដល់រដ្ឋមន្ត្រី ឲ្យស្នើដល់រដ្ឋាភិបាលផ្តល់ជាកញ្ចប់ថវិកាសម្រាប់ផ្តល់ជូនពលរដ្ឋដែលឆ្លងជំងឺអេដស៍នៅក្នុងភូមិរកា ព្រោះថា អ្នកភូមិរកាគឺជាការឆ្លងជំងឺអេដស៍ដែលជាការធ្វេសប្រហែសរបស់ក្រសួង ។ ដូច្នេះរដ្ឋាភិបាលត្រូវតែផ្តល់ថវិកាពិសេស ដើម្បីជួយសេដ្ឋកិច្ចរបស់ពួកគាត់ ។
តាមរយៈការស្រង់សម្តីរបស់លោក ម៉ម ប៊ុនហេង ពីសំណាក់លោកជំទាវ កែវ សុវណ្ណរតន៍ ថា លោកនឹងយកសំណើទៅរាជរដ្ឋាភិបាលដើម្បីផ្តល់ថវិកាដល់អ្នកដែលឆ្លងជំងឺអេសដ៍នៅភូមិរកានោះ និងស្នើផ្តល់ថវិកាដល់បុគ្គលិកពេទ្យបន្ថែមទៀត ដែលរហូតដល់ពេលនេះមានចំនួនជាង២ម៉ឺននាក់ ។
លោកជំទាវបន្តថា គណៈកម្មការបានស្នើឲ្យមានការកែទម្រង់ប្រព័ន្ធសុខាភិបាលឡើងវិញព្រោះថា ប្រព័ន្ធសុខាភិបាលមិនទាន់មានភាពល្អប្រសើរនៅឡើយទេ ក្នុងការផ្តល់សេវាកម្មរបស់ប្រជាពលរដ្ឋបានល្អទេ ។ លើសពីនេះ គ្រូពេទ្យត្រូវតែមានវិជ្ជាជីវៈគោរពក្រមសីលធម៌ដើម្បីសង្គ្រោះអ្នកជំងឺ ។
ក្រសួងត្រូវតែត្រួតពិនិត្យគ្លីនិកឯកជនដែលមិនមានច្បាប់ និងត្រួតពិនិត្យមន្ទីរពេទ្យបង្អែក មណ្ឌលសុខភាពគ្រប់ទីកន្លែងទាំងអស់ ចៀសវាងការថ្លោះធ្លោយបន្តទៀត ។
លោកជំទាវបញ្ជាក់ថា «គណៈកម្មការក៏បានស្នើសុំដាក់ទណ្ឌកម្មចំពោះគ្រូពេទ្យណាដែលធ្វើខុសវិជ្ជាជីវៈ ។ យើងស្នើឲ្យលោករដ្ឋមន្ត្រីគិតគូរពីកញ្ចប់ថវិកាដល់អ្នកភូមិរកាក្នុង និងស្នើគិតពីបំណុលរបស់អ្នកភូមិរកា ដែលពួកគាត់គ្មានកម្លាំងពលកម្មធ្វើការសម្រាប់សងបំណុល ធនាគារទេ ។ យើងត្រូវកែទម្រង់ប្រព័ន្ធសុខាភិបាលនោះមិននិយាយតែពេលនេះ គឺត្រូវគិតនៅថ្ងៃអនាគតចំពោះគ្រូពេទ្យដែលមិនគោរពក្រមវិជ្ជាជីវៈ គ្រូពេទ្យនោះត្រូវតែដាក់ទណ្ឌកម្មតាមច្បាប់មានជាធរមាន» ។
ប្រធានគណៈកម្មការទី៨ ដដែលបន្តថា ក្រសួង និងស្ថាប័នពាក់ព័ន្ធត្រូវចាត់វិធានការចំពោះគ្រូពេទ្យដែលមិនគោរពវិជ្ជាជីវៈ ។ គណៈកម្មការទី៨ បានស្នើទៅលោករដ្ឋមន្ត្រីចាត់វិធានការឲ្យបានម៉ត់ចត់ចំពោះគ្រូពេទ្យមិនគោរពវិជ្ជាជីវៈពិសេសនោះ គ្រូពេទ្យត្រូវតែសង្គ្រោះជីវិតអ្នកជំងឺជាបឋម ។
លោកជំទាវបន្ថែមថា រាជរដ្ឋាភិបាលមានកញ្ចប់ថវិកាពិសេស ដូច្នេះគួរកាត់កញ្ចប់ថវិកានោះផ្តល់ទៅអ្នកដែលឆ្លងជំងឺនៅភូមិរកានោះ។ តាមរយៈលោកជំទាវ អ្នកភូមិរកាក្នុងមួយគ្រួសារ អាចទទួលបានថវិកាប្រមាណ៥រយដុល្លារ ហើយគ្រួសារដែលទទួលបានច្រើន ចំនួនប្រមាណ២.៥០០ដុល្លារ ៕
ចែករំលែកព័តមាននេះ