ក្រុងប៉ោយប៉ែត ៖ តាមប្រភពច្បាស់ការណ៍ពីសមត្ថកិច្ចបានឱ្យអ្នកសារព័ត៌មានក្នុងស្រុកដឹងនៅរសៀលថ្ងៃទី២៧ មករានេះថា ស្ត្រីម្នាក់ឈ្មោះទ្រី ណាត់បារាំង អាយុ៤៧ឆ្នាំ ដែលត្រូវប៉េអឹមក្រុងប៉ោយប៉ែត ឃាត់ខ្លួនកាលពីម្សិលមិញយកទៅសួរនាំ រឿងរត់ការទម្លាក់លោកង៉ោ ម៉េងជ្រួន អភិបាលក្រុងប៉ោយប៉ែត រួចដំឡើងឈ្មោះលោកឱក សុផាន ជំនួសនោះ រហូតមកដល់រសៀលថ្ងៃទី២៧ មករា ២០១៥នេះមិនទាន់មានការដោះលែងនៅឡើយទេ ដោយស្ត្រីរូបនោះត្រូវប៉េអឹមក្រុងប៉ោយប៉ែតបញ្ជូនខ្លួនទៅទីបញ្ជាការកងរាជអាវុធហត្ថខេត្តបន្ទាយមានជ័យដេម្បីសួរនាំបន្តទៀត។
ដោយឡែកប្រភពច្បាស់ការណ៍ បានឱ្យដឹងថា ស្ត្រីរូបនេះត្រូវបានសមត្ថកិច្ចចោទប្រកាន់ពីបទឆបោក និងយកឈ្មោះថ្នាក់ដឹកនាំកំពូលយកមកប្រើប្រាស់ថែមទៀតផង ។ ចំណែកលោកឱក សុផាន ដែលជាប់ពាក់ពន្ឋ័ក្នុងករណីនេះ បានប្រាប់អ្នកសារព័ត៌មានឱ្យដឹងថា រូបលោកគឺជាជនរងគ្រោះតែប៉ុណ្ណោះ ។ លោកឱក សុផាន បានបន្តថា តាំងពីមុនមករូបលោកមិនធ្លាប់ស្គាល់ស្ត្រីឈ្មោះចែបារាំង នេះទេ ទើបតែនៅថ្ងៃទី២០
មករា នេះរូបលោកបានស្គាល់ឈ្មោះចែបារាំង តាមរយៈមិត្តភក្កិម្នាក់ឈ្មោះសូ មឿន នៅហាងកាហ្វេម្តុំផ្សារអគ្គថ្មី ដោយបាននិយាយប្រទាក់សម្តីគ្នា រួចហើយក៏បានបើករថយន្តម៉ាក កាមរីបាឡែនរបស់លោកមួយគ្រឿងជូនស្ត្រីឈ្មោះចែបារាំង ដើរកម្សាន្តមើលព្រំប្រទល់ជុំវិញក្រុងប៉ោយប៉ែតតែម្តង ។
បន្ទាប់មកស្ត្រីឈ្មោះចែបារាំង ក៏បានសួនាំរត់ការឱ្យរូបលោកឡើងកាន់តំណែងជាចៅហ្វាយក្រុងប៉ោយប៉ែតថ្មី ជំនួសលោកង៉ោ ម៉េងជ្រួន តែម្តង ។ លោកឱក សុផាន បានបន្តឱ្យដឹងទៀតថា ក្នុងការរត់ការឱ្យរូបលោកឡើងកាន់ជាចៅហ្វាយក្រុងនោះគឺ រូបលោកបាននិយាយប្រាប់ស្ត្រីឈ្មោះចែបារាំង វិញថា រូបលោកគ្មានលុយសម្រាប់សូកប៉ាន់ដល់ថ្នាក់លើទេ ហើយក៏មិនទាន់មានខាតបង់លុយកាក់មួយរៀលនៅឡើយដែរ តែស្ត្រីឈ្មោះចែបារាំង នោះបានប្រាប់មកលោកឱក សុផាន វិញថា ឱ្យតែព្រមធ្វើ គឺមិនចាំបាច់ប្រើលុយកាក់អ្វីទេ ចាំគេជួយ ។
ពេលនោះលោកក៏យល់ព្រមរួចក៏បានរៀបចំឯកសារពាក់ព័ន្ធមានដូចជាអត្តសញ្ញាណប័ណ្ណ សៀវភៅគ្រួសារត្រៀមយកជូនស្ត្រីឈ្មោះចែបារាំង នោះតែម្តង ។ លោកឱក សុផាន បានបញ្ជាក់ថា រឿងរាវមិនទាន់បានសម្រេចផងរឿងក៏បែកខ្ចរខ្ចាយតាមហាងកាហ្វេ គុយទាវ ឮដល់អាជ្ញាធរមានសមត្ថកិច្ចក៏ត្រូវកម្លាំងប៉េអឹមក្រុងប៉ោយប៉ែត ចុះទៅឃាត់ខ្លួនស្ត្រីឈ្មោះចែបារាំង រួមទាំងរូបគាត់ និងឈ្មោះសូ មឿន កាលពីរសៀលថ្ងៃទី២៦ មករា ម្សិលមិញនៅចំណុចភោជនីយដ្ឋានកញ្ចុះ៥០ (ហៅស្តង់តាងួន) ស្ថិតក្នុងភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត មកសួរនាំតែម្តងទៅ ៕
ចែករំលែកព័តមាននេះ