ក្រុងម៉ានីល-ហ្វ៊ីលីពីន ៖ ការិយាល័យពន្ធដារជាតិរបស់ប្រទេសហ្វ៊ីលីពីន ស្ថិតក្នុងកម្រិតនៃការខាតបង់ចំណូលប្រមាណជា៩០៧,៤៨លានដុល្លារ ក្នុងមួយឆ្នាំ ដោយសារតែការបន្តធ្លាក់ចុះនៃតម្លៃប្រេង ដែលជាលទ្ធផលនៃការផ្គត់ផ្គង់លើពិភពលោក ។
លោក John Sevilla គណៈកម្មការពន្ធដារបាននិយាយថា ភ្នាក់ងាររបស់លោករំពឹងថា ការប្រមូលចំណូលពីប្រេងនឹងថយចុះធៀបនឹងឆ្នាំមុន ដោយសារគេពុំទាន់មើលឃើញពីការបញ្ចប់ការធ្លាក់ចុះនៃតម្លៃប្រេងនៅទ្បើយ ។ តម្លៃប្រេងពេលនេះធ្លាក់ចុះមកនៅកម្រិតទាបបំផុតសម្រាប់រយៈពេលជិត៦ឆ្នាំនេះ ដែលនាំឱ្យទិន្នផលដែលសម្រេចបានខ្ពស់ប៉ះទង្គិចជាមួយនឹងតម្រូវការបន្ទាន់ ពិសេសក្នុងតំបន់អឺរ៉ុបដែលបានរងគ្រោះដោយសារបញ្ហាចរាចរណ៍សាច់ប្រាក់យ៉ាងច្រើនលើសលប់ និងក្នុងតំបន់អាស៊ីដូចជាប្រទេសចិនដែលនាំឱ្យសេដ្ឋកិច្ចកើនទ្បើងយឺត រីឯជប៉ុនក៏កំពុងពុះពារ ដើម្បីឱ្យសេដ្ឋកិច្ចងើបទ្បើងវិញ ។
លោក John Sevilla បានបន្ថែមថា ២២%នៃការប្រមូលចំណូលពន្ធក្នុងឆ្នាំ២០១៤ របស់ការិយាល័យពន្ធដារជាតិ គឺទទួលបានមកពីការនាំចូលប្រេង ។ គួររំឭកថា កាលពីឆ្នាំ២០១៤កន្លងមក ទីភ្នាក់ងារពន្ធដារជាតិមួយនេះ ប្រមូលចំណូលបាន៨,៣៩ពាន់លានដុល្លារ ដោយផ្អែកលើទិន្នន័យបឋម ។ បរិមាណនេះច្រើនជាងឆ្នាំ២០១៣ ប្រមាណជា២០% ប៉ុន្តែស្ថិតក្រោមទិសដៅសម្រេចឱ្យបាន៩,២៥ពាន់លានដុល្លាររបស់អង្គភាព ។
ទោះជាយ៉ាងណា ការប្រើប្រាស់គ្រឿងអេទ្បិចត្រូនិកក្នុងកិច្ចការជំនួញ គឺជាផ្នែកមួយនៃកិច្ចខិតខំប្រឹងប្រែងធ្វើឱ្យប្រសើរទ្បើងនូវការជំរុញការប្រមូលពន្ធរបស់អង្គភាពនេះ ៕
ចែករំលែកព័តមាននេះ