រាជធានីភ្នំពេញ ៖ យុវជនម្នាក់បានរងរបួសធ្ងន់ បន្ទាប់ពីបើកម៉ូតូក្នុងល្បឿនលឿនជ្រុលទៅបុកចំពីក្រោយរថយន្តតាកូម៉ាពាក់ស្លាកលេខ ន.ប មួយគ្រឿងដែលកំពុងឈប់ចាំស្តុប ។ ហេតុការណ៍នេះកើតឡើងកាលពីវេលាម៉ោង៩ និង៥០នាទីយប់ ថ្ងៃទី២៦ មករា ឆ្នាំ២០១៥ នៅចំណុចស្តុបទួលគោក ស្ថិតក្នុងសង្កាត់ទឹកល្អក់១ ខណ្ឌទួលគោក ។ នៅនឹងកន្លែងកើតហេតុគេមិនទាន់ស្គាល់អត្តសញ្ញាណយុវជនរងគ្រោះនៅឡើយទេ ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញយុវជនរងគ្រោះជិះម៉ូតូម៉ាកហុងដាឌ្រីមសេ១២៥ ពណ៌ខ្មៅ មួយគ្រឿង ពាក់ស្លាកលេខកំពង់ចាម 1B-7840 ដោយបើកបរធ្វើដំណើរក្នុងល្បឿនលឿន តាមមហាវិថី សហព័ន្ធរុស្ស៊ីក្នុងទិសដៅពីលិចទៅកើត ខណៈមកដល់ចំណុចកើតហេតុ (ស្តុបទួលគោក ) យុវជនរងគ្រោះក៏បានបើកម៉ូតូទៅបុកចំពីក្រោយរថយន្តតាកូម៉ាពាក់ស្លាកលេខ ន.ប ពេញទំហឹង ដែលគេដឹងថាជារថយន្តរបស់ប៉ូលិស កំពុងឈប់ចាំស្តុប ។
ក្រោយពេលកើតហេតុរថយន្តប៉ូលិសពេលដែលឃើញយុវជនរងគ្រោះរបួសធ្ងន់ក៏បានបើកទៅមុខបាត់ទៅ ចំណែកយុវជនរងគ្រោះត្រូវបានគេបញ្ជូនទៅសង្រ្គោះនៅមន្ទីរពេទ្យ ហើយម៉ូតូយុវជនរងគ្រោះត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលរដ្ឋបាលទឹកល្អក់១ រងចាំក្រុមគ្រួសារមកទទួលយក។
ចែករំលែកព័តមាននេះ