រាជធានីភ្នំពេញ ៖ លោក ឡុង វិសាលោ រដ្ឋលេខាធិការក្រសួងការបរទេស និងសហប្រតិបត្តិការអន្តជាតិ នៃព្រះរាជាណាចក្រកម្ពុជា បានផ្ញើលិខិតផ្លូវការមួយច្បាប់ជូនលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន
រាជធានីភ្នំពេញ ៖ លោក ឡុង វិសាលោ រដ្ឋលេខាធិការក្រសួងការបរទេស និងសហប្រតិបត្តិការអន្តជាតិ នៃព្រះរាជាណាចក្រកម្ពុជា បានផ្ញើលិខិតផ្លូវការមួយច្បាប់ជូនលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ដែលកោះសន្តិភាពទទួលបានកាលពីថ្ងៃទី២៥ មករា ឲ្យដឹងថា កម្មវត្ថុសំណើចាត់វិធានការទប់ស្កាត់ការផ្សាយរឿង « The Interview » ដោយយោងតាមកំណត់ការទូតរបស់សាធារណរដ្ឋប្រជាមានិតប្រជាធិបតេយ្យកូរ៉េប្រចាំនៅរាជធានីភ្នំពេញ ចុះថ្ងៃទី៨ ខែមករា ឆ្នាំ២០១៥។
ក្រសួងការបរទេសកម្ពុជា បានលើកឡើងថា សូមជម្រាបជូនលោករដ្ឋមន្ត្រីក្រសួងព័ត៌មានថា ស្ថានទូតរបស់សាធារណរដ្ឋប្រជាមានិតប្រជាធិបតេយ្យកូរ៉េប្រចាំនៅរាជធានីភ្នំពេញបានធ្វើកំណត់ការទូតថា ខ្សែភាពយន្តរឿង « The Interview » ជារឿងប្រមាថដល់ថ្នាក់ដឹកនាំកំពូលរបស់សាធារណរដ្ឋប្រជាមានិតប្រជាធិបតេយ្យកូរ៉េ ហើយត្រូវបានថតចម្លងចេញពីអ៊ីនធើណែត (Internet) និងដាក់លក់នៅលើទីផ្សារមួយចំនួននៅកម្ពុជា ។
លោក ឡុង វិសាលោ បានបញ្ជាក់នៅក្នុងលិខិតចុះថ្ងៃទី២០ មករា ឆ្នាំ២០១៥ ថា «ភាគីកូរ៉េបានចាត់ទុកសកម្មភាពនេះជាការឃុបឃិតមួយដោយកម្លាំងអមិត្តនាំឲ្យបែកបាក់ទំនាក់ទំនងរបស់ប្រទេសទាំងពីរ» ។ ស្ថានទូតសាធារណរដ្ឋប្រជាមានិតប្រជាធិបតេយ្យកូរ៉េប្រចាំនៅរាជធានីភ្នំពេញ ស្នើកម្ពុជាចាត់វិធានការបញ្ឈប់ការលក់ខ្សែភាពយន្តនេះ និងស្នើកុំឲ្យមានការចាក់ផ្សាយនៅតាមស្ថានីយទូរទស្សន៍ ឬការចាក់បញ្ចាំងនៅតាមរោងភាពយន្តនៅកម្ពុជា ។
យោងតាមកំណត់ការទូតស្ថានទូតរបស់សាធារណរដ្ឋប្រជាមានិតប្រជាធិបតេយ្យកូរ៉េប្រចាំនៅរាជធានីភ្នំពេញ ចុះថ្ងៃទី៨ ខែមករា ឆ្នាំ២០១៥ ជាភាសាអង់គ្លេសផ្ញើជូនក្រសួងការបរទេស និងសហប្រតិបតិ្តការអន្តរជាតិកម្ពុជា ហើយដែលកោះសន្តិភាពទទួលបានកាលពីថ្ងៃអាទិត្យទី២៥ មករាសូមប្រែក្រៅផ្លូវការឲ្យដឹងថា ស្ថានទូតរបស់សាធារណរដ្ឋប្រជាមានិតប្រជាធិបតេយ្យកូរ៉េប្រចាំនៅរាជធានីភ្នំពេញ ស្នើសុំនូវកំណត់ការទូតដូចតទៅ «សហរដ្ឋអាមេរិកបានផលិតខ្សែភាពយន្តប្រឆាំងនឹងសាធារណរដ្ឋប្រជាមានិតប្រជាធិបតេយ្យកូរ៉េ ដែលពេលថ្មីៗនេះមាននៅកម្ពុជា»។
ស្ថានទូតកូរ៉េខាងជើងបានលើកឡើងទៀតថា ខ្សែភាពយន្ត «The Interview» ថ្មីៗនេះត្រូវបានផលិតដោយសហរដ្ឋអាមេរិក ដែលគាំទ្រយ៉ាងពេញទំហឹងចំពោះពួកភេរវករ(Terrorism )ឬពួកអមិត្តប្រឆាំងនឹងថ្នាក់ដឹកនាំកំពូលរបស់យើងគឺជាការប្រមាថយ៉ាងធំធេងមួយដល់ថ្នាក់ដឹកនាំកំពូលរបស់យើង និងដោយសារភាពខ្លាំងក្លារបស់ប្រជាជនយើង ។ ស្ថាតទូតកូរ៉េខាងជើងបានកញ្ជាក់ថា «ជាងនេះទៅទៀត ខ្សែភាពយន្តថតចម្លងទាំងនោះត្រូវបានគេរកឃើញមានលក់នៅក្នុងផ្សារទំនើបសូរិយ៉ា និងស៊ីធីម៉ល» ទៀតផង ។
ស្ថានទូតកូរ៉េខាងជើងបានអះអាងថា បញ្ហានេះគឺត្រូវបានបង្កើតឡើងដោយកម្លាំងសត្រូវដែលបានរៀបចំដើម្បីបំបែកបំបាក់ទំនាក់ទំនងប្រពៃណីជាយូរលង់មកហើយរវាងសាធារណរដ្ឋប្រជាមានិតប្រជាធិបតេយ្យកូរ៉េ និងព្រះរាជាណាចក្រកម្ពុជា ដោយហេតុថាបញ្ហានេះវាប្រឆាំងនឹងច្បាប់អន្តរជាតិ និងច្បាប់របស់ព្រះរាជាណាចក្រកម្ពុជា ដែលជាការឃោសនានយោបាយ ឬសកម្មភាពប្រឆាំងប្រទេសទី៣ហាមឃាត់ជាដាច់ខាត ។
ស្ថានទូតកូរ៉េខាងជើងបានលើកឡើងទៀតថា «ស្ថានទូតរបស់សាធារណរដ្ឋប្រជាមានិតប្រជាធិបតេយ្យកូរ៉េប្រចាំនៅព្រះរាជាណាចក្រកម្ពុជា សូមស្នើដោយស្មោះត្រង់ចំពោះក្រសួងការបរទេស និងសហប្រតិបត្តិការអន្តរជាតិ ចាត់វិធានការសមរម្យដើម្បីស្រាវជ្រាវពិនិត្យមើលខ្សែភាពយន្ត «The Interview » ដែលផលិតដោយសហរដ្ឋអាមេរិកប្រឆាំងនឹងសាធារណរដ្ឋប្រជាមានិតប្រជាធិបតេយ្យកូរ៉េ នឹងមិនមានលក់នៅក្នុងទីផ្សារ និងមិនត្រូវបានដាក់បញ្ចាំងនៅលើកញ្ចក់ទូរទស្សន៍កម្ពុជា ឬក៏បញ្ចាំងនៅតាមរោងភាពយន្តក្នុងប្រទេសកម្ពុជាតទៀត ដើម្បីរក្សានូវទំនាក់ទំនងមិត្តភាពរបស់ប្រទេសយើងទាំងពីរ» ។
ស្ថានទូតរបស់សាធារណរដ្ឋប្រជាមានិតប្រជាធិបតេយ្យកូរ៉េ ប្រចាំនៅព្រះរាជាណាចក្រកម្ពុជា បានលើកឡើងថា ស្ថានទូតមានជំនឿយ៉ាងមុតមាំថា ក្រសួងការបរទេស និងសហប្រតិបត្តិការអន្តរជាតិកម្ពុជា នឹងចាត់វិធានការជាវិជ្ជមាន និងមានប្រយោជន៍របស់ខ្លួនសម្រាប់ឱកាសនេះដើម្បីបង្ហាញពីការខិតខំប្រឹងប្រែងគិតគូររបស់ក្រសួងការបរទេស និងសហការអន្តរជាតិកម្ពុជា ។
អ្នកនាំពាក្យស្ថានទូតអាមេរិកប្រចាំនៅកម្ពុជាលោកជ័យ រ៉ាម៉ាន (Jay R.Raman) បាន បដិសេធមិនធ្វើអត្ថាធិប្បាយទេកាលពីថ្ងៃទី២៥ មករា នៅពេលអ្នកយកព័ត៌មានទាក់ទងលោកតាមទូរស័ព្ទសុំការពន្យល់ជុំវិញកំណត់ការទូតរបស់ស្ថានទូតសាធារណរដ្ឋប្រជាមានិតប្រជាធិបតេយ្យកូរ៉េប្រចាំនៅព្រះរាជាណាចក្រកម្ពុជា។ លោកគ្រាន់តែនិយាយថា លោកបានដឹងពីបង្ហាញនេះដែររួចក៏បិទទូរស័ព្ទ ៕
ចែករំលែកព័តមាននេះ