ខេត្តប៉ៃលិន ៖ ករណីគ្រោះថ្នាក់ចរាចរណ៍មួយបានកើតឡើងរវាងរថយន្តយីឌុបថៃ ម៉ាកហ៊្វុយហ្សូ ចម្រុះពណ៌ សណ្តោងរ៉ឺម៉ក បើកទៅបុកគូទរថយន្តកាមរីរត់ឈ្នួលបណ្តាលឱ្យធ្លាក់ក្នុងប្រឡាយអត់ទឹកខាងស្តាំដៃ រងការខូចខាតទាំង២គ្រឿង ចំណែកម្ចាស់រថយន្តកាមរី និងអ្នករួមដំណើរចំនួន៣នាក់ទៀតរងរបួសស្រាល ដែលហេតុការណ៍នេះបានកើតឡើងកាលពីវេលាម៉ោង៩ និង១០នាទីព្រឹក ថ្ងៃទី២៦ ខែមករា ឆ្នាំ២០១៤ ស្ថិតនៅតាមបណ្តោយផ្លូវជាតិលេខ៥៧ ក្នុងភូមិប៉ាងរលឹម សង្កាត់ប៉ៃលិន ក្រុងប៉ៃលិន ។
សមត្ថកិច្ចនគរបាលចរាចរណ៍ជើងគោកខេត្តប៉ៃលិនបានឱ្យដឹងថា ជនរងគ្រោះឈ្មោះប្រីម ព្រី ភេទប្រុស អាយុ៤៦ឆ្នាំ មុខរបររត់ឡានឈ្នួល រស់នៅភូមិទួលស្រឡៅ សង្កាត់ទួលល្វា ក្រុងប៉ៃលិន រងរបួសស្រាល ដោយបើកបររថយន្តម៉ាកកាមរី ពណ៌ខ្មៅ ស៊េរីឆ្នាំ១៩៩៥ ពាក់ស្លាកលេខ បាត់ដំបង 2A-4258 រងការខូចខាតធ្ងន់ធ្ងរ ឯអ្នករួមដំណើរ៣នាក់ទៀតមិនស្គាល់អត្តសញ្ញាណរងរបួសស្រាលផងដែរ ។ ចំណែកភាគីបើកបររថយន្តយីឌុប ម៉ាកហ៊្វុយហ្សូសណ្តោងរ៉ឺម៉កឈ្មោះ កៃ លុង ភេទប្រុស អាយុ៤៨ឆ្នាំ ជនជាតិថៃ រស់នៅប្រទេសថៃ រងការខូចខាតធ្ងន់ធ្ងរ ។
ប្រភពដដែលបានឱ្យដឹងទៀតថា មុនពេលកើតហេតុ គេឃើញរថយន្តម៉ាកហ៊្វុយហ្សូចំនួន២គ្រឿងបើកបរក្នុងទិសដៅពីលិចទៅកើត ក្រោយមកក៏មានរថយន្តកាមរីមួយគ្រឿងបើកបរស្របទិសគ្នា លុះដល់ចំណុចផ្លូវកោង ស្រាប់តែរថយន្តកាមរីនេះបានវ៉ាជែងរថយន្តហ៊្វុយហ្សូទាំង២គ្រឿងទៅខាងមុខ តែដោយសារវាក់ជាមួយនឹងរថយន្តមួយគ្រឿងទៀត ដែលបើកច្រាសទិសគ្នា ក៏ច្រៀតចូលចំកណ្តាល ក៏ត្រូវរថយន្តហ៊្វុយហ្សូនៅក្រោយបុកចំពីក្រោយពេញទំហឹង ក្រឡាប់ធ្លាក់ចូលទៅក្នុងប្រឡាយអត់ទឹកផ្នែកខាងស្តាំដៃទាំង២គ្រឿងតែម្តង ។
ប្រភពដដែលបានឱ្យដឹងទៀតថា ក្រោយពេលកើតហេតុជនរងគ្រោះម្ចាស់រថយន្តកាមរីត្រូវគេដឹកតាមរថយន្តយកទៅសង្គ្រោះនៅមន្ទីរពេទ្យបង្អែកខេត្ត រីឯរថយន្តទាំង២គ្រឿងត្រូវសមត្ថកិច្ចដឹកយកទៅរក្សាទុកនៅស្នងការនគរបាលខេត្ត រង់ចាំភាគីទាំងសងខាងចូលមកដោះស្រាយតាមផ្លូវច្បាប់ ៕
ចែករំលែកព័តមាននេះ