រាជធានីភ្នំពេញ ៖ បានកត់សម្គាល់ថា នៅពេលប្រេងសាំងឡើងថ្លៃ ទំនិញចាំបាច់ប្រើប្រាស់សព្វសារពើ ក៏ដូចជាសេវាដឹកជញ្ជូន ថ្លៃធ្វើដំណើរបានឡើងថ្លៃហួសពីធម្មតា ដោយក្រុមឈ្មួញអះអាងថា
រាជធានីភ្នំពេញ ៖ បានកត់សម្គាល់ថា នៅពេលប្រេងសាំងឡើងថ្លៃ ទំនិញចាំបាច់ប្រើប្រាស់សព្វសារពើ ក៏ដូចជាសេវាដឹកជញ្ជូន ថ្លៃធ្វើដំណើរបានឡើងថ្លៃហួសពីធម្មតា ដោយក្រុមឈ្មួញអះអាងថា មកពីតម្លៃប្រេងសាំងឡើងថ្លៃ ទើបទំនិញនិងសេវាកម្មឡើងថ្លៃតាមនោះដែរ ព្រោះពួកគាត់ត្រូវចំណាយលើមធ្យោបាយដឹកជញ្ជូន ឬចំណាយលើប្រេងឥន្ធនៈ ។ ផ្ទុយមកវិញ ប៉ុន្មានខែចុងក្រោយនេះឃើញថា តម្លៃប្រេងសាំងបានធ្លាក់ចុះជាបន្តបន្ទាប់ចាប់តាំងពីចុងឆ្នាំ២០១៤មក តែនៅមិនទាន់ឃើញទំនិញប្រើប្រាស់ប្រចាំថ្ងៃ ក៏ដូចជាតម្លៃម្ហូបអាហារ និងសម្ភារប្រើប្រាស់ផ្សេងទៀត ធ្លាក់ចុះទៅតាមតម្លៃប្រេងសាំងទេ គឺនៅរក្សាដដែល ។
អាជីករ អ្នកផ្គត់ផ្គង់សេវាកម្មដឹកជញ្ជូន សេវាកម្មដឹកអ្នកដំណើរ ក៏ដូចជារថយន្តតាក់ស៊ី កាលពីតម្លៃប្រេងសាំងឡើងថ្លៃ បានដំឡើងថ្លៃជាបន្តបន្ទាប់ ដោយយកហេតុផលថាមកពីប្រេងសាំងឡើងថ្លៃ ទើបធ្វើឱ្យពួកគាត់ឡើងថ្លៃតាមដែរ ។ ឥឡូវនេះប្រេងសាំងចុះហើយ និងបានធ្លាក់ចុះខ្លាំងថែមទៀត ហេតុអ្វីបានជាមិនទាន់ចុះថ្លៃតាមដែរ ? ចំណែកមន្ត្រីពាក់ព័ន្ធហាក់ដូចពុំទាន់មានផែនការនៅឡើយលើបញ្ហានេះ ។ ស្របពេលជាមួយគ្នានេះ ប្រជាពលរដ្ឋបានលើកឡើងថា ក្រសួង ស្ថាប័នពាក់ព័ន្ធ ក៏ដូចជារាជរដ្ឋាភិបាលគួររៀបចំនីតិវិធីបែបណាដើម្បីគ្រប់គ្រងតម្លៃទំនិញនិងសេវាកម្មផ្សេងៗនៅលើទីផ្សារឱ្យបានសមស្របផង ថ្វីដ្បិតតែជាទីផ្សារសេរី តែក៏មិនត្រូវឱ្យឈ្មួញដាក់តម្លៃនៅលើបបូរមាត់នោះដែរ ដើម្បីជាប្រយោជន៍ជួយលើកស្ទួយកម្រិតជីវភាពរស់នៅ និងជួយកាត់បន្ថយភាពក្រីក្ររបស់ពលរដ្ឋខ្មែរយើង ។
ពាក់ព័ន្ធបញ្ហានេះ អាជ្ញាធររាជធានីភ្នំពេញបានបញ្ជាក់ថា អាជ្ញាធរមិនមានសិទ្ធិលូកដៃក្នុងវិស័យឯកជនទេ ព្រោះនេះជាទីផ្សារសេរី អាជីវករចង់ដាក់តម្លៃប៉ុន្មានក៏បាន ឱ្យតែមានអតិថិជននៅគាំទ្រ និងប្រើប្រាស់ទំនិញរបស់ពួកគាត់ ។ បើកាលណាមានអាជីវករមួយចំនួនធំបានបញ្ចុះតម្លៃទំនិញប្រើប្រាស់ប្រចាំថ្ងៃចាំបាច់ហើយ តែមានមួយចំនួនតូចមិនព្រមបញ្ចុះនោះ អតិថិជនឬប្រជាជននឹងពិចារណាថា តើនឹងត្រូវទិញខាងណា គាំទ្រអ្នកណាហើយ ។ ម្យ៉ាងទៀតនេះក៏មិនមែនមកពីអាជីវករទាំងស្រុងដែរ វាអាចពាក់ព័ន្ធនឹងឈ្មួញកណ្ដាល ឬអ្នកនាំចូលទំនិញក៏ថាបាន ។
តាមការស្ទង់មតិពីអាជីវករ ក៏ដូចជាអ្នកផ្ដល់សេវាកម្មផ្សេងៗបានបញ្ចេញមតិថា យើងមិនទាន់អាចបញ្ចុះតម្លៃបាននៅឡើយទេ ថ្វីដ្បិតតែពេលនេះតម្លៃប្រេងសាំងបានចុះហើយក្តី ។ បើយើងសង្កេតមើលពីចរាចរណ៍នៅរាជធានីភ្នំពេញ ការដឹកជញ្ជូនពីកន្លែងមួយទៅកន្លែងមួយ វាមិនងាយស្រួលទេ ត្រូវចំណាយច្រើនជាងមុន ហើយនៅលើដងផ្លូវចរាចរណ៍ក៏មមាញឹក ត្រូវចំណាយពេល និងថវិកាច្រើនជាងមុន ។ ម្យ៉ាងទៀតផ្លូវនានានៅក្នុងរាជធានីភ្នំពេញសព្វថ្ងៃកំពុងជួសជុល និងស្ថាបនាឡើងវិញមានច្រើនកន្លែង ដែលធ្វើឱ្យការធ្វើដំណើរដឹកជញ្ជូនត្រូវយឺតយ៉ាវ អីុចឹងហើយការជាប់គាំងនៅលើផ្លូវ ត្រូវចំណាយពេលច្រើន បើផ្លូវស្រួលមិនមានបញ្ហានោះ ទំនិញនានាអាចចុះស្របពេលជាមួយគ្នានេះដែរ ។ រឿងនេះដែរ ថ្វីដ្បិតតែសាំងចុះ តែអ្នកដឹកជញ្ជូនមិនព្រមបញ្ចុះថ្លៃ ធ្វើយ៉ាងណាឱ្យអាជីវករចុះម្ដេចបានទៅ ?
តាមមន្ត្រីក្រសួងពាណិជ្ជកម្មកម្ពុជាឱ្យដឹងថា ពេលនេះយើងកំពុងចរចាទាក់ទឹងនឹងតម្លៃប្រេងសាំង ថាតើក្រុមហ៊ុនផ្គត់ផ្គង់ប្រេងឥន្ទនៈនៅកម្ពុជា អាចមានលទ្ធភាពបញ្ចុះបានប៉ុន្មានទៀត ដើម្បីសម្រួលដល់ជីវភាពប្រជាពលរដ្ឋ និងឱ្យស្របទៅតាមទីផ្សារតម្លៃប្រេងនៅលើពិភពលោក ដែលកំពុងចុះយ៉ាងខ្លាំងនេះ។ ពាក់ព័ន្ធនឹងតម្លៃទំនិញប្រើប្រាស់ចាំបាច់ប្រចាំថ្ងៃនេះដែរ ខាងក្រសួងពាណិជ្ជកម្មនៅមិនទាន់មានផែនការ ឬប្រជុំនៅឡើយ តែក្រសួងនឹងរៀបចំចាត់ចែងលើរឿងនេះ ធ្វើយ៉ាងណាដើម្បីជួយសម្រួលដល់ប្រជាពលរដ្ឋកម្ពុជាឱ្យកាន់តែងាយស្រួលបន្ថែមទៀតក្នុងជីវភាពប្រចាំថ្ងៃ ។
គួរបញ្ជាក់ថា នៅក្នុងឆ្នាំ២០១៥នេះ ជាឆ្នាំមួយល្អសម្រាប់ប្រជាជនកម្ពុជា ជាពិសេសកម្មករ កម្មការិនី ដោយសាររាជរដ្ឋាភិបាលបានសម្រេចដំឡើងប្រាក់ខែគោល ហើយនៅពេលបច្ចុប្បន្ននេះ រាជរដ្ឋាភិបាលកម្ពុជា ក៏បាននិងកំពុងដំណើរការបញ្ចុះតម្លៃអគ្គិសនីជូនប្រជាជនកម្ពុជាថែមទៀត ជាពិសេសបងប្អូនកម្មករ កម្មការិនី ដែលជួលបន្ទប់ និងផ្ទះសម្រាប់ស្នាក់នៅនិងបម្រើការងារនៅរាជធានីភ្នំពេញ ៕
ចែករំលែកព័តមាននេះ