រាជធានីភ្នំពេញ ៖ ជារៀងរាល់ឆ្នាំយើងសង្កេតឃើញថា ប្រាក់រៀលខ្មែរតែងតែប្រែប្រួលនៅចុងឆ្នាំចាស់ និងដើមឆ្នាំថ្មី មានន័យថា ប្រាក់រៀលខ្មែរហាក់មានតម្លៃបើធៀបនឹងប្រាក់ដុល្លារ តែសម្រាប់ឆ្នាំ២០១៥ រហូតមកដល់ចុងខែមករានេះ តម្លៃប្រាក់រៀលដូចជានៅថេរដដែល គិតតាំងពីត្រីមាសទី២នៃឆ្នាំ២០១៤មក ។ បច្ចុប្បន្នប្រាក់រៀលខ្មែរស្ថិតនៅរង្វង់លើ៤.០០០រៀលតិចតួចក្នុង១ដុល្លារដែលកាលពីឆ្នាំ២០១៤ ឬ២០១៣ រូបិយប័ណ្ណយើងមានតម្លៃគួរសម គឺស្ថិតក្រោម៤.០០០រៀលក្នុង១ដុល្លារ ។
អ្នកជំនាញផ្នែកហិរញ្ញវត្ថុមួយចំនួនបានបញ្ជាក់ស្រដៀងគ្នាថា ប្រាក់រៀលខ្មែរតែងតែប្រែប្រួលធៀបនឹងដុល្លារ នៅរៀងរាល់ចុងឆ្នាំ និងដើមឆ្នាំ គឺក្នុងអំឡុងត្រីមាសទី៤ចុងឆ្នាំ និងត្រីមាសទី១ដើមឆ្នាំថ្មី ។ ការប្រែប្រួលតម្លៃនេះ ដោយសារតែតម្រូវការប្រាក់រៀលកើនឡើង ជាក់ស្ដែងនៅរៀងរាល់ចុងឆ្នាំ និងដើមឆ្នាំក្រុមហ៊ុនស្ថាប័ននានា ត្រូវបង់ពន្ធជូនរដ្ឋក៏ដូចជាត្រូវការប្រាក់រៀលទិញកសិផលពីប្រជាពលរដ្ឋ ហើយការបង់ពន្ធ ឬទិញផលិតផលទាំងនោះ ភាគច្រើនគិតជាប្រាក់រៀល ដូច្នេះពាណិជ្ជករ ឬអាជីវករត្រូវយកប្រាក់ដុល្លារទៅទិញប្រាក់រៀល ដើម្បីប្រើប្រាស់ ។
លោក ជាម ទាង អនុប្រធានប្រតិបត្តិ និងជាគណៈប្រធាននាយកប្រតិបត្តិរតនាភិបាលនៃធនាគារអេស៊ីលីដា បានមានប្រសាសន៍ថា រយៈពេលជាយូរមកហើយដែលប្រាក់រៀលខ្មែរយើងនៅរក្សាស្ថិរភាពបានល្អ និងមិនប្រែប្រួលខ្លាំងនោះទេ គឺនៅចន្លោះក្រោមនិងលើ៤.០០០រៀលតិចតួចក្នុង១ដុល្លារ ។ ទោះបីជាកាលពីឆ្នាំមុន តម្លៃប្រាក់រៀលនៅក្រោម៤.០០០រៀលក្នុង១ដុល្លារ និងពេលនេះលើ៤.០០០រៀលក្នុង១ដុល្លារក្តី ក៏វាមិនបង្ហាញពីការប្រែប្រួលគួរឱ្យកត់សម្គាល់ដែរ ។ ប៉ុន្តែបើសិនជាឡើងដល់៤.៣០០រៀល ឬ៤.៥០០រៀលក្នុង១ដុល្លារនោះ មានន័យថា ប្រាក់រៀលយើងអាចនឹងមានបញ្ហាហើយ ។
លោកបណ្ឌិតកង ច័ន្ទដារារដ្ឋ អ្នកវិភាគសេដ្ឋកិច្ចឯករាជ្យ បានមានប្រសាសន៍ដែរថា ជាការពិតនៅរៀងរាល់ចុងឆ្នាំនិងដើមឆ្នាំ តម្លៃប្រាក់រៀលខ្មែរយើងបានកើនឡើងមែន ដោយសារតែតម្រូវការប្រាក់រៀលនៅពេលនោះមានច្រើន ជាក់ស្ដែងនៅឆ្នាំមុនៗនេះ តម្លៃប្រាក់រៀលបានប្រែប្រួលកើនឡើងនៅក្រោម៤.០០០រៀលក្នុង១ដុល្លារអាមេរិក តែសម្រាប់ឆ្នាំ២០១៥នេះ ប្រាក់រៀល នៅតែរក្សាតម្លៃដដែល ដោយមានកត្តាមួយចំនួន ។
លោកបន្តថា បើយើងមើលពីកម្លាំងសេដ្ឋកិច្ចនៅស្រុកយើង វាហាក់ដូចជាមិនទាន់គ្រប់គ្រាន់នៅឡើយទេ ។ កាលពីឆ្នាំមុនប្រាក់ដុល្លារ
អាមេរិក មិនសូវជាមានតម្លៃប៉ុន្មានទេ ដែលធ្វើឱ្យកាលណោះប្រាក់រៀលខ្មែរយើងមានតម្លៃបន្តិច តែសម្រាប់ឆ្នាំនេះវិញជាឆ្នាំដែលសេដ្ឋកិច្ចអាមេរិកមានភាពរឹងមាំ និងមានលក្ខណៈយូរអង្វែង មិនមែនរឹងមាំដោយចៃដន្យ ឬរឹងមាំដោយលក្ខណៈមួយអន្លើនោះទេ ដោយអត្រាអ្នកអត់ការងារធ្វើរបស់អាមេរិកក៏ធ្លាក់ចុះ ហើយការមានទំនុកចិត្តលើទីផ្សារហិរញ្ញវត្ថុក៏កើនឡើង ដែលធ្វើឱ្យប្រាក់ដុល្លាររបស់គេមានទម្ងន់ខ្លាំងលើទីផ្សារហិរញ្ញវត្ថុ ។
ទាក់ទងនឹងរូបិយប័ណ្ណនេះដែរ តាមបណ្ដាប្រទេសមួយចំនួនបានរឹតត្បិតពីការចាយវាយរូបិយប័ណ្ណនានា នៅពេលចូលប្រទេសគេ ត្រូវតែប្តូរជារូបិយប័ណ្ណជាតិគេជាមុនសិន ទើបអាចចាយវាយបាន ដែលផ្ទុយគ្នាស្រឡះពីប្រទេសយើង ។ ការរឹតត្បិតបែបនេះ នាំឱ្យរូបិយប័ណ្ណរបស់គេមានតម្លៃ ។
ចំពោះបញ្ហានេះលោកបណ្ឌិតកង ច័ន្ទដារារដ្ឋ បានបញ្ជាក់ថា ប្រទេសដែលរឹតត្បិតការចាយវាយរូបិយប័ណ្ណរបស់ខ្លួនបាននោះ លុះត្រាតែប្រទេសនោះឯងមានសេដ្ឋកិច្ចរឹងមាំ មានន័យថា ជាប្រទេសដែលនាំចេញច្រើនជាងនាំចូល(លើកលែងតែសហរដ្ឋអាមេរិក សេដ្ឋកិច្ចរឹងមាំដែរ តែការនាំចូលច្រើនជាងនាំចេញ) ដូចនេះការចាយវាយរូបិយប័ណ្ណ ប្រជាជនប្រទេសនោះនឹងយល់ច្បាស់ដោយខ្លួនឯង មិនចាំបាច់រដ្ឋាភិបាលបង្ខំនោះទេ ៕
ចែករំលែកព័តមាននេះ