រាជធានីភ្នំពេញ ៖ ក្រសួងពាណិជ្ជកម្មបានធ្វើកំណែទម្រង់១២ចំណុចក្នុងការផ្តល់សេវាសាធារណៈសម្រាប់សេវានាំចេញ-នាំចូលក្នុងគោលបំណងផ្តល់ភាពងាយស្រួលដល់វិស័យឯកជនក្នុងការធ្វើពាណិជ្ជកម្ម
រាជធានីភ្នំពេញ ៖ ក្រសួងពាណិជ្ជកម្មបានធ្វើកំណែទម្រង់១២ចំណុចក្នុងការផ្តល់សេវាសាធារណៈសម្រាប់សេវានាំចេញ-នាំចូលក្នុងគោលបំណងផ្តល់ភាពងាយស្រួលដល់វិស័យឯកជនក្នុងការធ្វើពាណិជ្ជកម្ម និងជួយសម្រួលដល់វិនិយោគិនបរទេសដែលមានបំណងមកបណ្តាក់ទុនរកស៊ីនៅកម្ពុជា ។ និយាយរួមគឺសម្រួលដល់នីតិវិធីក្នុងធ្វើពាណិជ្ជកម្ម និងការវិនិយោគនៅកម្ពុជា ពិសេសសម្រាប់បង្កើនភាពទាក់ទាញក្នុងតំបន់នៅពេលសមាហរណកម្មសេដ្ឋកិច្ចអាស៊ានដែលនឹងមកដល់នៅចុងឆ្នាំ២០១៥នេះ ។
លោក កែន រដ្ឋា អ្នកនាំពាក្យក្រសួងពាណិជ្ជកម្មមានប្រសាសន៍ថា បច្ចុប្បន្នក្រសួងពាណិជ្ជកម្មបានធ្វើកំណែទម្រង់១២ចំណុចរួមមាន ៖
១-កែសម្រួលការចុះបញ្ជីសុំសិទ្ធិនាំចេញក្រោមប្រព័ន្ធអនុគ្រោះពាណិជ្ជកម្ម ដែលតម្រូវឲ្យអ្នកនាំចេញមកស្នើសុំជារៀងរាល់ឆ្នាំដោយជំនួសវិញនូវការចុះបញ្ជីតែមួយលើកប៉ុណ្ណោះ ។
២-លុបចោលការតម្រូវការឲ្យមកសុំវិញ្ញាបនបត្របញ្ជាក់ប្រភពទំនិញ(CO)ពីក្រសួងពាណិជ្ជកម្មសម្រាប់ការនាំចេញក្នុងករណីប្រទេសនាំចូលមិនតម្រូវការឲ្យមាន ។
៣-អនុវត្តសាកល្បង ការចេញវិញ្ញាបនបត្រប្រតិវេទន៍បញ្ជាក់ប្រភពដើមទំនិញដោយខ្លួនឯងក្នុងក្របខណ្ឌអាស៊ាន ។
៤-បានប្រគល់បន្ថែមសិទ្ធិជូនដល់ថ្នាក់អគ្គនាយកឲ្យចុះហត្ថលេខាលើវិញ្ញាបនបត្របញ្ជាក់ប្រភពដើមទំនិញដើម្បីកាត់បន្ថយពេលវេលាឲ្យបានកាន់តែលឿនជាងមុនថែមទៀត ។
៥-ក្រុមហ៊ុនចុះឈ្មោះប្រើប្រាស់ប្រព័ន្ធស្វ័យប្រវត្តិកម្មគិតត្រឹមថ្ងៃទី១៥ វិច្ឆិកា ឆ្នាំ២០១៤ មានចំនួន៤១៤ក្រុមហ៊ុន តែបានស្នើសុំវិញ្ញាបនបត្របញ្ជាក់ប្រភពដើមទំនិញ(CO)ប្រើប្រាស់ប្រព័ន្ធស្វ័យប្រវត្តិកម្មនេះចំនួនត្រឹមតែ២២១ក្រុមហ៊ុនប៉ុណ្ណោះ ។
៦-ដើម្បីកាត់បន្ថយពេលវេលានិងនីតិវិធីពុំចាំបាច់ក្នុងកិច្ចសម្រួលពាណិជ្ជកម្ម ក្រសួងកំពុងរៀបចំប្រព័ន្ធទូទាត់កម្រៃតាមប្រព័ន្ធអេឡិចត្រូនិក E-Payment និង E-Banking សម្រាប់ការបង់កម្រៃសេវានានាដោយវិស័យឯកជនឲ្យមានលក្ខណៈងាយស្រួល និងងាយបញ្ជូនថវិកាទៅរតនាគារជាតិក្នុងរយៈពេលតែមួយថ្ងៃប៉ុណ្ណោះ។
៧-កំណត់តម្លៃគ្រប់គ្រងការនាំចេញ (Export Management Fee) មុខទំនិញថ្មីៗហើយបានបញ្ជូនទៅក្រសួងសេដ្ឋកិច្ចនិងហិរញ្ញវត្ថុដើម្បីអនុម័តកម្រៃថ្មីនេះ ។
៨-បង្កើតគេហទំព័រhttp://ico.moc.gov.kh សម្រាប់ក្រមហ៊ុនស្នើសុំវិញ្ញាបនបត្របញ្ជាក់ប្រភពដើមទំនិញតាមប្រព័ន្ធស្វ័យប្រវត្តិកម្មដែលគ្រោងនឹងដាក់ឲ្យដំណើរការនៅត្រីមាសទី២ឆ្នាំ២០១៥ ។ បច្ចុប្បន្នតាមរយៈប្រព័ន្ធបច្ចេកវិទ្យាបណ្តោះអាសន្នមួយយើងទទួលបានពាក្យសុំCO ប្រមាណ៧០%បានដាក់បញ្ជូនតាមប្រព័ន្ធនេះមកក្រសួងពាណិជ្ជកម្ម ហើយប្រព័ន្ធបានជួយកាត់បន្ថយពេលវេលាក្នុងការចេញ CO នេះបាន២ថ្ងៃថែមទៀត ។
៩-សម្របសម្រួលជាមួយសមាគមរោងចក្រកាត់ដេរនៅកម្ពុជា(GMAC)ក្នុងការកាត់បន្ថយកម្រៃសមាជិកភាពចំនួន២០%ក្នុងមួយឆ្នាំដោយណែនាំឲ្យរោងចក្រយកប្រាក់២០%នេះទៅប្រើប្រាស់សម្រាប់ជាប្រយោជន៍ដល់កម្មករ-កម្មការិនី ។
១០-កំពុងរៀបចំបែបបទដែលអនុញ្ញតឲ្យអ្នកនាំចេញបញ្ចូលទិន្នន័យសម្រាប់យកបោះពុម្ពវិញ្ញបនបត្របញ្ជាក់ប្រភពដើមទំនិញដោយខ្លួនឯង ករណីក្រុមហ៊ុនមិនទាន់រៀបចំខ្លួនស្រេចបាច់សម្រាប់ចូលប្រព័ន្ធស្វ័យប្រវត្តិកម្ម ។
១១-ចុះហត្ថលេខាជាមួយអង្គការILO លើអនុស្សរណៈស្តីពីកម្មវិធីរោងចក្រកាន់តែប្រសើរនៅកម្ពុជា(Batter Factories Cambodia – BFC)ដែលនឹងជួយលើកស្ទួយស្តង់ដាការងារជូនកម្មករ-កម្មការិនី ។
១២-បានចុះកិច្ចសន្យាជាមួយក្រុមហ៊ុនក្រីមសុនឡូជីក(CRIMSON LOGIC) របស់ប្រទេសសិង្ហបុរីមករៀបចំប្រព័ន្ធស្វ័យប្រវត្តិកម្មសម្រាប់ការចេញវិញ្ញាបនបត្របញ្ជាក់ប្រភពដើមទំនិញកាលពីខែកញ្ញា ឆ្នាំ២០១៤ កន្លងមក ៕
ចែករំលែកព័តមាននេះ