ខេត្តកំពង់ឆ្នាំង ៖ មានការភ្ញាក់ផ្អើលមួយបានកើតឡើងនៅម្តុំសាលារៀនគំរូក្រុងកំពង់ឆ្នាំង កាលពីវេលាម៉ោង១០ និង៥០នាទីព្រឹក ថ្ងៃទី ២២ មករា ២០១៥ ដោយសារតែគេឃើញមន្ត្រីនគរបាលជាច្រើននាក់ បាន ដេញចាប់ជនសង្ស័យយ៉ាងប្រសាច ខណៈដែលជនសង្ស័យរូបនេះជាមុខសញ្ញាចាស់ខាងលួច និងឆបោកម៉ូតូគេអស់ជាច្រើនគ្រឿង ប៉ុនប៉ងលួចយកម៉ូតូគេមួយគ្រឿងនៅសាលាគំរូក្រុងកំពង់ឆ្នាំង ។
លោក ម៉ា យន់ នាយនគរបាលព្រហ្មទណ្ឌក្រុងកំពង់ឆ្នាំងបាននិយាយថា ជនសង្ស័យខាងលើនេះមានឈ្មោះ ឈន ឈឿន អាយុ៣៣ឆ្នាំ មានទីលំនៅភូមិទ្រាជើង ឃុំស្រែថ្មី ស្រុករលាប្អៀរ ។ លោកបានរំលឹកថាជននេះគ្រាន់តែយើងដឹងតាមពាក្យបណ្តឹង មាន៤ករណីពីបទឆបោកម៉ូតូគេ ដោយឈ្មោះនេះធ្វើជាអ្នកទិញម៉ូតូ ហើយពេលតថ្លៃគ្នាត្រូវបានសុំសាក ឬជួនកាលថា សុំយកទៅឱ្យគេមើល រួចក៏ជិះចេញទៅបាត់មិនត្រឡប់មិនវិញតែម្តង ។
នៅមុនពេលកើតហេតុ សមត្ថកិច្ចរបស់លោកបានឃើញជនសង្ស័យខាងលើនេះចូលក្នុងសាលាគំរូក្រុងកំពង់ឆ្នាំងទៅឈរជិតកន្លែងម៉ូតូគេ ដោយមានបំណងលួច ពេលនោះសមត្ថកិច្ចបានលើកគ្នាដេញចាប់តែម្តង ។ ក្រោយពេលចាប់ជននេះបាន សមត្ថកិច្ចបានយកមកកាន់អធិការដ្ឋាននគរបាលក្រុងដោយមានមនុស្សចោមរោមមើលជាច្រើននាក់ ខ្លះស្រែកសុំឱ្យនគរបាលលែងជននេះមកក្រៅដើម្បីសុំកាត់ទោសក្រៅប្រពន្ឋ័តុលាការ តែសមត្ថកិច្ចមិនយល់ព្រម ។
នៅគ្រានោះដែរមានស្ត្រីម្នាក់បានស្ទុះចូលមកវាយជនសង្ស័យខាងលើនេះ៣-៤ដៃ ដោយស្រែកយំថា «អញក្ររហាមចឹងហើយអ្ហែងនៅដាច់ចិត្តយកម៉ូតូអញទៀត» ។ ស្ត្រីរួបនោះបានយំរៀបរាប់ថា គាត់មានឈ្មោះ ហួន រ៉េន អាយុ៣៨ឆ្នាំ មានទីលំនៅភូមិក្តីត្នោត ឃុំស្រែថ្មី ស្រុករលាប្អៀរ ។ កាលពីជាង២០ថ្ងៃមុន ជនសង្ស័យខាងលើបានមកសុំទិញម៉ូតូរបស់គាត់ ពេលនោះគាត់ព្រមលក់ឱ្យ ជនសង្ស័យបានសុំសាក ហើយក៏ជិះទៅបាត់រហូតតែម្តង ។
គាត់ប្រាប់ថា ម៉ូតូគាត់ម៉ាកវ៉េវអ៊ី គាត់បានខ្ចីប្រាក់អង្គការទិញសម្រាប់ដឹកការ៉េមលក់ ស្រាប់តែឈ្មោះនេះមកបោកយកស្រស់ៗតែម្តង ។ អ្វីដែលជាការកត់សំគាល់នោះពេលជាប់ខ្នោះនៅដងទង់ជាតិអធិការនគរបាលក្រុងកំពង់ឆ្នាំង ជននេះគ្មានតក់ស្លុតអ្វីទេ ថែមទាំងសើចទៀតផង តែបានសារភាពគ្រប់រឿងពេលសមត្ថកិច្ចសួរក្រៅផ្លូវការ ។
មន្ត្រីនគរបាលក្រុងកំពង់ឆ្នាំងបានអំពាវនាវដល់ម្ចាស់ម៉ូតូទាំង៤គ្រឿងមកដាក់ពាក្យប្តឹងនៅសមត្ថកិច្ចក្រុងកំពង់ឆ្នាំង ដើម្បីឱ្យជននេះមានទោសឱ្យបានយូរឆ្នាំ ។ ជនសង្ស័យខាងលើនេះ ត្រូវបានសមត្ថកិច្ចកសាងសំណុំរឿងបញ្ជូនទៅស្នងការដ្ឋានខេត្តកំពង់ឆ្នាំង ដើម្បីចាត់ការបន្តរបញ្ជូនទៅតុលាការតាមនិតិវិធិច្បាប់៕
ចែករំលែកព័តមាននេះ