ខេត្តកំពត ៖ អ្នកឆ្លើយឆ្លងព័ត៌មានកោះសន្តិភាពរត់គេចទាំងព្រលឹងចុងសក់ ហើយបើរត់មិនរួចទេ ច្បាស់ជាត្រូវអ្នកញៀនល្បែងជនជាតិយួន វាយសម្លាប់មិនខាន ដោយសារតែទុកចិត្តប៉ូលិស ចេញទៅយកព័ត៌មានជាមួយ ។ ក្នុងការរត់រកប្រាស់អាយុនេះ ក៏បានបាត់បង់ម៉ាស៊ីនថត លុយកាក់ និងម៉ូតូ ដែលត្រូវវាយកម្ទេច រួមជាមួយម៉ូតូប៉ូលិស១គ្រឿងផងដែរ ។
បាតុភាពដ៏ព្រៃផ្សៃនេះកើតឡើងកាលពីវេលាម៉ោង២និង៣០នាទីរសៀល ថ្ងៃទី២១ មករា នៅក្នុងភូមិសាស្ត្រទល់ដែនយួន ក្នុងភូមិត្នោត ឃុំត្នោតចុងស្រល់ ស្រុកបន្ទាយមាស និងស្ថិតក្នុងជម្រៅ២០០ម៉ែត្រពីខ្សែបន្ទាត់ព្រំដែនប៉ុណ្ណោះ ដែលទីនោះគឺជាទីតាំងបើកសង្វៀនបញ្ជល់មាន់ដ៏ធំមួយ និងមានបង្កប់ល្បែងអាប៉ោងផងដែរ ។
ក្រុមអ្នកចូលលេងនោះ គឺគគ្រឹកគគ្រេង ដែលភាគច្រើនគឺជាជនជាតិយួន ដែលមានគ្នាប្រមាណជាង១០០នាក់ ជិះសុទ្ធតែម៉ូតូ ។ តាមអ្នករាយការណ៍ព័ត៌មាន បានឱ្យដឹងថា ផ្លូវចូលទៅកាន់ទីតាំងនោះមានការលំបាក តែអាចជិះម៉ូតូចូលទៅបាន ។ កម្លាំងសមត្ថកិច្ចដែលចូលទៅបង្ក្រាបនោះ មិនហ៊ានលើកគ្នាចូលព្រោងព្រាតទេ ខ្លាចក្រុមអ្នកលេងល្បែងទាំងនោះដឹង ។ ដូច្នេះហើយទើបប៉ូលិសដែលត្រូវបញ្ជូនឱ្យទៅបង្ក្រាបមានគ្នាត្រឹម៧-៨នាក់ប៉ុណ្ណោះ ឯកម្លាំងធំដែលមានគ្នាជិត២០នាក់ទៀតត្រូវចូលទៅតាមក្រោយ ។
ប្រតិបត្តិការបង្ក្រាបសង្វៀនបញ្ជល់មាន់នេះ ដឹកនាំដោយឧត្តមសេនីយ៍ ម៉ៅ ច័ន្ទមធុរិទ្ធ ដែលជាស្នងការរង លោកវរសេនីយ៍ទោ លុត ញ៉ាង អនុប្រធានការិយាល័យព្រហ្មទណ្ឌកម្រិតធ្ងន់ និងមានការចូលរួមពីសំណាក់ព្រះរាជអាជ្ញារងអមសាលាដំបូងផងដែរ ។ ការបង្ហាញវត្តមានរបស់ប៉ូលិសបានធ្វើឱ្យក្រុមអ្នកលេងល្បែងផ្អើលរត់ប្រសាចចោលរបស់របរ និងម៉ូតូរាប់សិបគ្រឿង ។ ប៉ុន្តែការរត់របស់ជនជាតិយួនទាំងនោះ មិនដល់បន្ទាត់ព្រំដែនទេ គឺខ្លះរត់បានចម្ងាយ១០០ម៉ែត្រ ខ្លះ៦០ម៉ែត្រក៏ឈប់ទ្រឹង ទំនងស្តាយម៉ូតូរបស់ខ្លួន ។ ហើយជនជាតិយួនខ្លះដែលចិត្តស្លុយ ក៏បាននាំគ្នាស្រែក «យោឌីៗ» មានន័យជាភាសាខ្មែរថា «ចូលទៅៗ» គឺស្រែកពីគ្រប់ច្រកល្ហក និងមានការរត់សម្រុកចូលមកវិញសំដៅមកដណ្តើមយកម៉ូតូរៀងៗខ្លួន ហើយសកម្មភាពរញ៉េរញ៉ៃអនាធិបតេយ្យ ក៏បានកើតឡើង ។
ប្រឈមនឹងការសម្រុកចូលមកតដៃរបស់ពួកលេងល្បែងនោះ បូ៉លិសដែលមានគ្នាតែ៧ ទៅ៨នាក់ ក៏បានផ្ទុះអាវុធខ្លីដើម្បីគំរាមការសម្រុកចូលនោះ និងចាប់វ៉ៃខ្នោះបានពី៦ ទៅ៧នាក់ផងដែរ ។ ប៉ុន្តែភាពហានក្លាដែលក្រុមជនជាតិយួនទាំងនោះដឹងថា ប៉ូលិសខ្មែរមិនអាចបាញ់ ក្រៅពីបាញ់គំរាមឡើងលើនោះ ក៏មានការសម្រុកចូលរាប់សិបនាក់តម្រង់មករកប៉ូលិស ដែលទីបំផុតប៉ូលិសក៏រត់គេចវិញ រួមជាមួយអ្នកយកព័ត៌មានកោះសន្តិភាពម្នាក់ ដែលបានទៅជាមួយប៉ូលិសដើម្បីយកព័ត៌មាន ក៏ត្រូវពួកយួនទាំងនោះដេញវាយនឹងដំបង ទោះបីរត់យករួចខ្លួនក៏ដោយ ។ ជាលទ្ធផល ម៉ូតូអ្នកកាសែត និងម៉ូតូប៉ូលិសត្រូវបានខូចខាតដោយការវាយបំផ្លាញពីក្រុមជនជាតិយួនទាំងនោះ ។
សូមបញ្ជាក់ថា នៅចំណុចនោះជាតំបន់ការពារព្រំដែនរបស់វរសេនាតូចលេខ៣០២ របស់យោធា និងវរនគរបាលការពារព្រំដែនគោកលេខ៦០១ ដែលទំនងជាមានសំណែនពីពួកអ្នកលេងល្បែងទាំងនោះហើយ ទើបគេអាចចូលមកលេងបានម៉ាសេរីបែបនេះលើដីខ្មែរ ។ សូម្បីតែក្រុមញៀនល្បែងបង្កភាពរញ៉េរញ៉ៃតដៃសមត្ថកិច្ចដែលបង្ក្រាប ក៏គេឃើញកងកម្លាំងទាំងនោះឈរមើលធ្វើព្រងើយ ។
តាមព័ត៌មានចុងក្រោយបានឱ្យដឹងថា ជនម្នាក់ជាកូនកាត់យួននៅតំបន់តន់ហន់ត្រូវបានចាប់ខ្លួន ។ បើតាមសមត្ថកិច្ចថា ជននេះហើយជាមេខ្លោងបើកវង់ល្បែងស៊ីសងប្រមូលយួនចូលមកលេង ។ ជាមួយគ្នានោះ ម៉ូតូ៣គ្រឿងក៏ត្រូវបានចាប់រឹបអូសផងដែរ ។
នេះជាមេរៀនដ៏ជូរចត់មួយសម្រាប់នគរបាលដែលបើកប្រតិបត្តិការបង្ក្រាបសង្វៀនបញ្ជល់មាន់តាមព្រំដែនយួន ។ បើទៅបង្ក្រាប «សុយម៉ុយ» បែបនេះ «ថ្ងៃក្រោយសុំកុំរាង !» ។
មតិខ្លះនិយាយថា មិនត្រូវមើលស្រាលដល់ក្រុមជនជាតិយួនមកលេងល្បែងនោះឡើយ ដែលអាចបង្កគ្រោះថ្នាក់ដល់អាយុជីវិតបាន ប្រសិនបើមិនបានគិតពីសុវត្ថិភាពទេនោះ ។
អ្វីដែលមានភាពធ្ងន់ធ្ងរសម្រាប់អ្នករាយការណ៍ព័ត៌មានគឺលោក កែវ ឆាត រត់ទាំងព្រលឹងចុងសក់ ចោលម៉ាស៊ីនថតរូប កាបូបប្រាក់ និងម៉ូតូត្រូវពួកយួនទាំងនោះវាយឱ្យខូចខាតយ៉ាងដំណំ ៕
ចែករំលែកព័តមាននេះ