រាជធានីភ្នំពេញ ៖ សមត្ថកិច្ចព្រហ្មទណ្ឌក្រសួងមហាផ្ទៃបានថ្លែងក្នុងលក្ខខណ្ឌមិនបញ្ជេញឈ្មោះឱ្យដឹងថា លោកឧត្តមសេនីយ៍ឯក សៀក សុជាតិ នាយរងសេនាធិការចម្រុះនៃកងយោធពលខេមរភូមិន្ទ និងជានាយកទីចាត់ការការងារព្រំដែននៃអគ្គបញ្ជាការដ្ឋានកងយោធពលខេមរភូមិន្ទ ត្រូវបានជនសង្ស័យពីរនាក់ជាបុគ្គលិកសណ្ឋាគារសូហ្វីតែលភ្នំពេញ ភូគីត្រា លួចគ្រឿងអលង្ការមានតម្លៃចំនួន១៤ម៉ឺនដុល្លារ ខណៈលោកឧត្តមសេនីយ៍ឯកដ៏ហ៊ឺហាររូបនេះចូលហាត់ប្រាណ ស្ទីម និងសូណា ក្នុងសណ្ឋាគារមួយនេះ ។
សមត្ថកិច្ចបន្តថា ហេតុការណ៍នេះកើតឡើងកាលពីល្ងាចថ្ងៃទី១៦ មករា ២០១៥ ក្នុងសណ្ឋាគារសូហ្វីតែលភ្នំពេញ ភូគីត្រា ស្ថិតក្នុងសង្កាត់ចតុមុខ ខណ្ឌដូនពេញ ។ មន្ត្រីតុលាការបានលួចបង្ហើបឱ្យដឹងថា ជនសង្ស័យពីររូបនេះ ត្រូវបានសមត្ថកិច្ចចាប់បញ្ជូនមកកាន់សាលាដំបូងរាជធានីភ្នំពេញ កាលពីព្រឹកថ្ងៃទី២១ មករា ២០១៥ ។
មន្ត្រីតុលាការដដែលបានបញ្ជាក់ថា ជនសង្ស័យទី១-ឈ្មោះ សំរិទ្ឋ រស្មី ភេទប្រុស អាយុ៣៤ឆ្នាំ មុខរបរជាគ្រូបង្ហាត់ហែលទឹកក្នុងសណ្ឋាគារសូហ្វីតែល និងទី២-ឈ្មោះ នុត សារ៉េត ភេទស្រី អាយុ៣២ឆ្នាំ ជាមេការក្នុងសណ្ឋាគារនេះ ។
នៅដំណាក់កាលនេះ លោកព្រះរាជអាជ្ញារង កែវ សុជាតិ បានសម្រេចចោទប្រកាន់ជនសង្ស័យទាំងពីរនាក់ពីបទ «លួច» រួចបញ្ជូនសំណុំរឿងទៅចៅក្រមស៊ើបសួរចាត់ការបន្តតាមនីតិវិធី ។ ប្រភពព័ត៌មានចុងក្រោយបានឱ្យដឹងថា លោកស្រីចៅក្រម ម៉ុង មុនីសោភា បានសម្រេចឃុំខ្លួនជនត្រូវចោទទាំងពីរនាក់ដាក់ពន្ធនាគារបណ្តោះអាសន្នហើយ កាលពីរសៀលថ្ងៃទី២១ មករា ២០១៥ ដើម្បីធ្វើការស៊ើបអង្កេតបន្តទៀត ៕
ចែករំលែកព័តមាននេះ