ខេត្តព្រះវិហារ ៖ សមត្ថកិច្ចរដ្ឋបាលព្រៃឈើខណ្ឌព្រះវិហារ សហការជាមួយកម្លាំងនគរបាលការិយាល័យប្រឆាំងបទល្មើសសេដ្ឋកិច្ចខេត្ត បានចុះស្ទាក់ចាប់រថយន្តកាមរីឆ្លាម ពណ៌ស្ករ មួយគ្រឿង ដែលផ្ទុកឈើប្រណីត ប្រភេទគ្រញូងចំនួន១១០កំណាត់ ដែលឈ្មួញដឹកចេញពីស្រុកជាំក្សាន្ត មកជ្រកក្នុងក្រុងព្រះវិហារ ប៉ុន្តែត្រូវបែកការណ៏ ក៏ត្រូវកម្លាំងបរិស្ថាន ដេញប្រផាប់ចាប់ប្រភីង នៅចំណុចម្លូរព្រៃ ក្នុងស្រុកឆែប ពេលនោះម្ចាស់ឈើគ្រញូង ក៏បើកឡានត្រឡប់ក្រោយចូលទៅក្នុងព្រៃ ហើយបើកទ្វាររត់បាត់ បន្សល់ទុករថយន្ត និងឈើគ្រញូង១១០កំណាត់ ស្មើនឹង៦៣២គីឡូក្រាម ។
នៅក្នុងហេតុការណ៏ស្ទាក់ចាប់រថយន្តផ្ទុកឈើគ្រញូងនេះ បានបើកប្រតិបត្តិការដាក់បារ៉ាស់ស្ទាក់ចាប់យ៉ាងច្រើនកន្លែង ចាប់ពីភូមិបុស្សធំ រហូតដល់មុខស្នាក់ការរដ្ឋបាលព្រៃឈើផ្នែកឆែប កាលពីម៉ោង៧ រហូតដល់ម៉ោងជាង៩ព្រឹក ក្នុងថ្ងៃទី២០ មករា ឆ្នាំ២០១៥ ទើបសមត្ថកិច្ចចំរុះ ធ្វើការស្ទាក់ចាប់បានទាំងរថយន្ត និងឈើគ្រញូង នៅចំណុចអូពេស ទើបប្រគល់ឈើគ្រញូង រួមទាំងរថយន្ត ទៅឲ្យលោកនាយខណ្ឌរដ្ឋបាលព្រៃឈើព្រះវិហារ និងលោកនាយផ្នែករដ្ឋបាលព្រៃឈើត្បែងមានជ័យ ដើម្បីចាត់ការ និងចងក្រងទៅតាមនិតិវិធី ។
មតិប្រជាពលរដ្ឋដែលតាមដានសភាពការណ៏ បានធ្វើការចាប់អារម្ភលើការកាប់ និងដឹកជញ្ជូនឈើនៅខេត្តព្រះវិហារ បានខ្សឹបដាក់ត្រចៀកថា «សកម្មភាពដឹកជញ្ជូនឈើប្រភេទប្រណីតកំពុងនិងបន្តកើតពេញបន្ទុក ដោយដឹកតាមរថយន្តទំនើបតូចធំ ដូចភ្លៀងរលឹម ប៉ុន្តែបែរជាសមត្ថកិច្ចជំនាញ មេព្រៃនៅខេត្តព្រះវិហារ គ្មានឆន្ទៈបង្ក្រាប និងទប់ស្កាត់ បទល្មើសព្រៃឈើបន្តិចសោះឡើយ ! បើចាប់ ទាល់តែចរចាគ្នាមិនត្រូវ ទើបចាប់យកស្នាដៃ» ។
គួរបញ្ជាក់ផងដែរ ជាទម្លាប់មេព្រៃ នៅខេត្តព្រះវិហារ ចាប់ពីថ្នាក់សង្កាត់រដ្ឋបាលព្រៃឈើ ដល់ថ្នាក់ខណ្ឌ ពេលមានបទល្មើសព្រៃឈើឆ្លងកាត់ គឺមិនចេះលើកទូរស័ព្ទអ្នកកាសែតឡើយ គួរណាស់លោក ឆេង គឹមស៊ុន ប្រតិភូរាជរដ្ឋាភិបាលកម្ពុជា និងជានាយកដ្ឋានរដ្ឋបាលព្រៃឈើកម្ពុជា ល្មមហៅមករៀនសូត្រនៅភ្នំពេញម្តងហើយទាន…! ៕
ចែករំលែកព័តមាននេះ