រាជធានីភ្នំពេញ ៖ តាមការសង្កេតជាក់ស្ដែងជារៀងរាល់ថ្ងៃ កម្មករ-កម្មការិនី ហាក់ដូចមិនបានធ្វើការពេញដៃពេញជើងទេ ដោយមូលហេតុរោងចក្រមិនមានសម្ភារគ្រប់គ្រាន់សម្រាប់ពួកគាត់ធ្វើនៅម៉ោងបន្ថែម ដូចនេះតាមបណ្ដារោងចក្រភាគច្រើនគឺធ្វើការតែម៉ោងធម្មតាប៉ុណ្ណោះ មានន័យថា ចូលធ្វើការម៉ោង៧ព្រឹក និងចេញវិញនៅម៉ោង៤ឬ៥ ល្ងាច ។
លោក ខេន លូ អគ្គលេខាធិការសមាគមរោងចក្រកាត់ដេរ សម្លៀកបំពាក់ និងស្បែកជើង កម្ពុជា បានឱ្យដឹងថា ជាការពិតណាស់ នៅពេលនេះការកុម្មង់ទិញពីអ្នកបញ្ជាទិញហាក់មានការធ្លាក់ចុះបើធៀបនឹងពេលមុនៗ ដែលកត្តាទាំងនេះជាបញ្ហាមួយសម្រាប់កម្មករកម្មការិនីរោងចក្រកាត់ដេរទាំងអស់ ។ កាលពីមុនយើងឃើញ កម្មករ-កម្មការិនី ទោះបីជាដល់ម៉ោងត្រឡប់ទៅផ្ទះ ឬចប់ម៉ោងធ្វើការធម្មតាហើយ ក៏នៅមានពួកគេមួយចំនួនបន្តធ្វើការថែមម៉ោង រហូតដល់ម៉ោង៧ឬម៉ោង៨យប់ដែលអាចឱ្យពួកគេរកចំណូលបន្ថែមពីលើប្រាក់ប្រចាំខែបាន ។
តាមសម្តីរបស់កម្មករ-កម្មការិនីរោងចក្រកាត់ដេរមួយចំនួនថា ការងាររោងចក្រកាត់ដេរនាពេលនេះមិនដូចមុនទេ ម៉ោង៤ ឬ៥ល្ងាច ពួកគេចេញពីធ្វើការស្ទើរតែអស់ទៅហើយ ដែលកាលពីមុនអាចធ្វើការថែមម៉ោងបានក្នុងមួយថ្ងៃ២ទៅ៣ម៉ោង ឬជួនកាលអាចបាន៤ម៉ោងក្នុងមួយថ្ងៃ ដូចនេះនៅដំណាច់ខែអាចបើប្រាក់បានច្រើនបន្តិច ។ ប៉ុន្តែពេលនេះ អត់បានថែមម៉ោង ហើយឆាប់ចេញទៅផ្ទះទៀត ដូច្នេះគឺមានតែប្រាក់ខែគោលប៉ុណ្ណោះ មិនមានប្រាក់ថែមម៉ោងដូចមុនៗឡើយ ។
ទាក់ទិននឹងបញ្ហានេះដែរ លោកខេន លូ បានបញ្ជាក់ថា កម្មករ-កម្មការិនីឆាប់ចេញពីធ្វើការនេះដោយសារអត់មានសម្ភារឱ្យពួកគេធ្វើថែមម៉ោង ហើយការអត់មានសម្ភារនេះព្រោះអ្នកបញ្ជាទិញគេកុម្មង់តិច កាលណាកុម្មង់តិច យើងក៏យកមកតិចដែរ ដូច្នេះការងារក៏តិចទៅតាមហ្នឹងដែរ ។ លោកបញ្ជាក់ថា កាលពីពាក់កណ្ដាលឆ្នាំ២០១៤ កំណើនចំនួនរោងចក្រ និងកំណើននាំចេញផលិតផលសម្លៀកបំពាក់ហាក់មិនស៊ីគ្នាទេ រោងចក្រកើនឡើងប្រមាណ១៥% តែការនាំចេញវិញកើនប្រមាណជា២ទៅ៣ភាគរយប៉ុណ្ណោះ ។ សម្រាប់ទូទាំងឆ្នាំ២០១៤ យើងនៅមិនទាន់បូកសរុបពីតួលេខនាំចេញ នៅឡើយ និងមិនទាន់ដឹងថាកើនឡើងប៉ុន្មាន ឬថយចុះប៉ុន្មានទេ ។
គួរបញ្ជាក់ថា តាមប្រសាសន៍របស់លោក ខេន លូ ការបញ្ជាទិញធ្លាក់ចុះនេះ ដោយសារកត្តាមួយចំនួន ដូចជាការធ្វើបាតុកម្មទាមទារពីសំណាក់កម្មករ-កម្មការិនី ដែលជាហេតុធ្វើឱ្យអ្នកបញ្ជាទិញមួយចំនួនមិនទាន់ទុកចិត្តលើទំនិញនៅកម្ពុជា ហើយអ្នកបញ្ជាទិញមួយចំនួនទៀតបានត្រឹមតែរង់ចាំមើលសិន ៕
ចែករំលែកព័តមាននេះ