ចាន់ សាន តារាចំរៀងសំលេងរដឺន បង្ហាញភាពជោគជ័យនៅបារាំង
ដោយ ៖ សាម៉ន
ថ្ងៃអាទិត្យ ទី២៩ ខែសីហា ឆ្នាំ២០១០ ម៉ោង ០៨:៤៨
សារ៉ាយ
ចាន់ សាន តារាចំរៀងសំលេងរដឺន
រាជធានីភ្នំពេញ ៖ លោកចាន់ សាន ជាអ្នកចំរៀងសំលេងរដឺនប្រចាំភោជនីយដ្ឋានតារា ពេលចេញទៅសំដែងនៅប្រទេសបារាំងកាលពីពេលថ្មីៗនេះទទួលបានការគាំទ្រច្រើនដែលលោកនឹកស្មានដល់។ លោកចាន់ សាន មានវ័យ៣២ឆ្នាំ បាននិយាយថា ពេលចេញទៅសំដែងនៅប្រទេសបារាំងរូបលោកទទួលបានការគាំទ្រយ៉ាងខ្លាំងពីបងប្អូនខ្មែររស់នៅទីនោះ សំខាន់ការគាំទ្រលើទឹកដមសំលេងបែបរដឺនរបស់លោកតែម្តង។ លោកចេញទៅសំដែងនៅប្រទេសបារាំងនេះរួមជាមួយតារាចំរៀង និងតារាសំដែងមួយចំនួនទៀតដូចជា លោកសួស សងវាចា លោកញ៉ែម សំអូន លោកហេង សារ៉េត កញ្ញាលីន ដា កញ្ញាអ៊ឹម លីដាលី កញ្ញាវង់ ម៉ាលីន និងកញ្ញាធីតា។
លោកចាន់ សាន និយាយថា តាមពិតទៅពេលចេញទៅសំដែងនៅប្រទេសបារាំងគឺទទួលបានជោគជ័យជាក្រុម តែក្នុងចំណោមនោះរូបលោកត្រូវបានបងប្អូនខ្មែរគាំទ្រច្រើនទៅលើសំលេងរដឺនតែម្តង ដែលទស្សនិកជនតែងតែសំណូមពរឱ្យលោកឡើងច្រៀងជាច្រើនបទក្នុងកម្មវិធីសំដែងម្តងៗ។ លោកមានការរំភើបចិត្តយ៉ាងខ្លាំងនៅពេលទទួលបានការគាំទ្រច្រើនដូច្នេះ ហើយវាជាការលើកទឹកចិត្តដល់រូបលោកឱ្យបង្កើនសមត្ថភាព និងមានសង្ឃឹមបន្ថែមទៀតក្នុងជីវិតសិល្បៈ។
លោកចាន់ សាន មានស្រុកកំណើតនៅខេត្តបាត់ដំបង ។ លោកឈានជើងចូលប្រឡូកក្នុងវិស័យសិល្បៈ គឺមិនទទួលបានការបណ្តុះបណ្តាលពីសាលាសិល្បៈទេ តែផ្តើមចេញពីនិស្ស័យ និងការហាត់រៀនច្រៀងតាមកាស្សែតចំរៀងរបស់តារាចំរៀងសំលេងមាសស៊ីន ស៊ីសាមុត។ លោកធ្លាប់ប្រលងជាប់ចំណាត់ថ្នាក់លេខ៣ ក្នុងកម្មវិធីប្រលងចំរៀងរបស់ក្រុមហ៊ុនបារី ម៉ាយសេវែន។
ក្នុងអាជីពចំរៀងនេះលោកចាន់ សាន ធ្លាប់ថតសំលេងឱ្យផលិតកម្មជាច្រើន ដូចជាផលិតកម្មភ្នំពេញ រៃមាស តោមាស VIP SM សំពៅមាស និងនាគហោះជាដើម។ ចំពោះការចេញទៅសំដែងនៅក្រៅប្រទេសលោកធ្លាប់ទៅប្រទេសបារាំង ស្វ៊ីស អូស្ត្រាលី ញូវហ្សឺឡែន និងប្រទេសមួយចំនួនទៀត ។
អ្នកចំរៀងរដឺនចាន់ សាន បច្ចុប្បន្នច្រៀងនៅភោជនីយដ្ឋានតារាក្នុងតំបន់ព្រែកលៀប ហើយទទួលបានការគាំទ្រពីភ្ញៀវគួរឱ្យកត់សំគាល់ផងដែរ។ ក្រៅពីអាជីពជាអ្នកចំរៀងលោកមិនមានមុខរបរផ្សេងទៀតឡើយ។ លោកនិយាយថា ជីវភាពរបស់លោកសព្វថ្ងៃគឺសមល្មមនឹងអាចរស់បានប្រកបដោយសុភមង្គលជាមួយគ្រួសារ៕
