បច្ចុប្បន្នពួករដ្ឋអ៊ិស្លាម បានក្លាយជាក្រុមភេរវករមានទ្រព្យស្តុកស្តម្ភនៅលើពិភពលោក ដោយក្នុងមួយខែទទួលចំណូលជាច្រើនលានដុល្លារ ពីការលក់ប្រេងខុសច្បាប់ និងការចាប់ជំរិត ។
AFP ផ្សាយកាលពីពេល ថ្មីៗនេះថា លោក Marwan Muasher អនុប្រធានមូលនិធិសន្តិភាពអន្តរជាតិ (CARNEGIE) បញ្ជាក់ថា បច្ចុប្បន្នពួករដ្ឋអ៊ិស្លាម ក្លាយជាក្រុមភេរវករមានទ្រព្យស្តុកស្តម្ភបំផុតនៅលើពិភពលោក ។
ការយល់ឃើញនេះ ស្របនឹងលោកដេវីដ កូហេន លេខាធិការផ្នែកសារព័ត៌មានភេរវកម្មនៃសហរដ្ឋអាមេរិក បញ្ជាក់ថា «យើងគ្មានប្រាក់ គ្មានអាវុធសម្ងាត់អ្វីមួយ ដើម្បីធ្វើឱ្យឃ្លាំងទ្រព្យរបស់ក្រុមរដ្ឋអ៊ិស្លាម ត្រូវបាត់បង់ក្នុងរយៈពេលខ្លីបានទេ គឺមានតែការប្រយុទ្ធតស៊ូប្រើរយៈពេលវែង ហើយបច្ចុប្បន្នកំពុងស្ថិតក្នុងជំហានដំបូង» ។
លោកដេវីដ កូហេន មនុស្សម្នាក់នៅក្នុងមន្ត្រីរដ្ឋាភិបាលបារ៉ាក់ អូបាម៉ា បានប្រយុទ្ធតស៊ូជាមួយពួករដ្ឋអ៊ិស្លាម ដែលកាន់កាប់ និងគ្រប់គ្រងទីតាំង ធំៗទាំងនៅអុីរ៉ាក់ និងសុីរី បង្ហើបឱ្យដឹងថា ក្រុមរដ្ឋអ៊ិស្លាមកំពុងស្ថិតក្រោមចំណាប់អារម្មណ៍នៅលើពិភពលោក ដោយសារតែភាពឃោរឃៅព្រៃផ្សៃ ប៉ុន្តែមានរឿងគួរឱ្យចាប់អារម្មណ៍មួយទៀត គឺការមានទ្រព្យស្តុកស្តម្ភ» ។
លោកដេវីដ កូហេន បញ្ជាក់ថា យុទ្ធសាស្ត្រនៃការប្រមូលទុន ដែលមានចំណូលជាច្រើនលានដុល្លារក្នុងពេលបច្ចុប្បន្ន គឺលក់ប្រេងដែលពួកគេលួច ការចាប់ជំរិត និងកេងប្រវ័ញ្ចពីពលរដ្ឋ រួមទាំងប្រាក់បរិច្ចាគពីអ្នកគាំទ្រក្រៅពីប្រទេសសុីរី និងអុីរ៉ាក់ ។
ការលួចប្រេងពីរោងចក្រដែលពួកគេចូលកាន់កាប់ក្នុងមួយថ្ងៃអាចលក់បាន១លានដុល្លារ និងអណ្តូងប្រេងដែលស្ថិតក្រោមការកាន់កាប់របស់ពួកគេអាចផលិតបាន៥មុឺនធុង ក្នុងមួយថ្ងៃ ។
ក្រៅពីប្រេង លោកកូហេន បញ្ជាក់ទៀតថា «ក្រុមរដ្ឋអ៊ិស្លាមនៅមានចំណូលពីការជំរិតទារប្រាក់ ពិសេសពីអ្នកសារព័ត៌មាន និងចំណាប់ខ្មាំងពីអឺរ៉ុប ប្រហែល២០លានដុល្លារ រួមទាំងជំរិតទារប្រាក់លើអ្នកជំនួញក្នុងស្រុកនៅតាមទីក្រុង ផ្សេងៗដែលពួកគេចូលកាន់កាប់ ។
ចំពោះប្រតិបត្តិការវាយប្រហារតាមអាកាសរបស់អាមេរិក ដែលប៉ះពាល់ដល់ប្រសិទ្ធភាពការផលិតប្រេងរបស់ក្រុមរដ្ឋអ៊ិស្លាម និងការដាក់ទណ្ឌកម្មរបស់អាមេរិក គួរផ្តោតជាសំខាន់លើក្រុមអ្នកទិញប្រេងខុសច្បាប់វិញ ។
យើងគួរសំដៅទប់ស្កាត់ មិនឱ្យពួករដ្ឋអ៊ិស្លាម ចូលដល់ប្រព័ន្ធហិរញ្ញវត្ថុអន្តរជាតិ ដើម្បីកាត់បន្ថយលទ្ធភាពក្នុងការប្រមូលទុនពីបរទេសរបស់សកម្មប្រយុទ្ធក្រុមនេះ» ៕
ចែករំលែកព័តមាននេះ