ខេត្តកំពង់ស្ពឺ ៖ មនុស្ស៣នាក់រងរបួសធ្ងន់ស្រាលបន្ទាប់ពីជួបគ្រោះថ្នាក់ចរាចរណ៍ម៉ូតូពីរគ្រឿងបុកគ្នាពេញទំហឹងកាលពីវេលាម៉ោង៤ និង ៣៥ឆ្នាំរសៀល ថ្ងៃទី២៧ ធ្នូ ២០១៤ ។ ហេតុការណ៍នេះកើតឡើងនៅចំណុចមុខផ្សារព្រៃផ្តៅ តាមផ្លូវជាតិលេខ៤ ស្ថិតនៅក្នុងភូមិព្រៃ ស្រុកសំរោងទង ។
ប្រភពព័ត៌មានពីកន្លែងកើតហេតុបានឱ្យដឹង នៅមុនពេលកើតហេតុគេឃើញម៉ូតូហុងដាឌ្រីម សេ១២៥ ពណ៌ខ្មៅ មួយគ្រឿង ពាក់ស្លាកលេខ1F-1822 ជិះដោយមនុស្សពីរនាក់មិនស្គាល់អត្តសញ្ញាណបើកឌុបគ្នាចេញពីធ្វើរោងចក្រដោយធ្វើដំណើរតាមផ្លូវជាតិលេខ៤ ក្នុងទិសដៅពីកើតទៅលិច ខណៈមកដល់ចំណុចកើតហេតុក៏បានបត់ឆ្វេងឆ្លងផ្លូវ ហើយត្រូវបានម៉ូតូវ៉េវ អាល់ហ្វា ពណ៌ខ្មៅ អត់ស្លាកលេខមួយគ្រឿងជិះដោយបុរសម្នាក់ក្នុងទិសដៅច្រាស់គ្នាបានបើកមកបុកម៉ូតូហុងដាឌ្រីម ពេញទំហឹងបណ្តាលឱ្យអ្នកជិះម៉ូតូហុងដាឌ្រីម រងរបួសធ្ងន់ទាំងពីរនាក់ ចំណែកបុរសជិះម៉ូតូវ៉េវរងរបួសស្រាល ។
ក្រោយពេលកើតហេតុបុរសរងរបួសស្រាលបានរត់គេចខ្លួនចោលម៉ូតូនៅនឹងកន្លែងកើតហេតុ ចំណែកអ្នករងរបួសធ្ងន់ត្រូវបានសមត្ថកិច្ចហៅរថយន្តសាមុយមកដឹកយកទៅសង្រ្គោះ នៅមន្ទីរពេទ្យ ហើយម៉ូតូទាំងពីរគ្រឿងសមត្ថកិច្ចយកទៅរក្សាទុកនៅអធិការដ្ឋាននគរបាលស្រុកសំរោងទង ។
ចែករំលែកព័តមាននេះ