រាជធានីភ្នំពេញ ៖ រថយន្តម៉ាកហ៊ីយ៉ាន់ដាយធុនធំមួយដឹកក្រដាស់អេតចាយសំពីងសំពោង បានបើកគេចរថយន្តមួយគ្រឿងច្រាស់ទិសគ្នាបណ្តាលឱ្យក្រឡាប់រថយន្តចាក់ក្រដាស់រាយពាសពេញថ្នល់ តែសំណាងល្អមិនមានមនុស្សណាម្នាក់រងរបួសនោះទេ ។ ហេតុការណ៍នេះកើតឡើងកាលពីវេលាម៉ោង ១១ និង ៤០នាទីយប់ ថ្ងៃទី២៦ ធ្នូ ២០១៤ នៅចំណុចគល់ស្ពានព្រះមុនីវង្សចាស់ត្រើយខាងកើត ស្ថិតក្នុងសង្កាត់ច្បារអំពៅ ខណ្ឌច្បារអំពៅ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តយីឌុបធុនធំមួយគ្រឿង ពណ៌ខៀវ ពាក់ស្លាកលេខភ្នំពេញ3B-4139 បើកបរដោយបុរសម្នាក់និងរួមដំណើរដោយព្រូម្នាក់ផង បានបើកបរដឹកក្រដាសអេតចាយសំពីងសំពោងពេញរថយន្ត ។ រថយន្តដឹកក្រដាសខាងលើបានបើកបរធ្វើដំណើរតាមផ្លូវជាតិលេខ១ ក្នុងទិសដៅពីកើតទៅលិច ខណៈមកដល់ចំណុចគល់ស្ពានព្រះមុនីវង្សចាស់ត្រើយខាងកើតរថយន្តហ៊ីយ៉ាន់ដាយដឹកក្រដាសបម្រុងបើកឡើងស្ពាន ស្រាប់តែមានរថយន្តមួយគ្រឿងទៀតបើកឆ្លងស្ពានក្នុងទិសដៅបញ្រ្ចាសគ្នា ស្របពេលនោះរថយន្តហ៊ីយ៉ាន់ដាយដឹកក្រដាសបានកាច់ចង្កូតគេចរថយន្តដែលបើកមកបញ្រ្ចាសគ្នានោះក៏បណ្តាលឱ្យរថយន្តហ៊ីយ៉ាន់ដាយក្រដាប់នៅនឹងគល់ស្ពានតែម្តង ដោយចាក់ក្រដាស់អេតចាយរាយពេញផ្លូវ តែសំណាងល្អដោយសារតែពុំមានយានយន្តធ្វើដំណើរឆ្លងកាត់ទើបពុំមានមមនុស្សរងរបួស រួមទាំងតៃកុង និងព្រូរថយន្តបាននាំគ្នាធាក់បំបែកកញ្ចក់រថយន្តរួចហៅម៉ូតូឌុបជិះគេចខ្លួនបាត់ ។
ក្រោយពេលកើតហេតុសមត្ថកិច្ចបានចុះមកពិនិត្យកន្លែងកើតហេតុ និងបានយករថយន្តក្រឡាប់ខាងលើទៅកាន់ការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីធ្វើការដោះស្រាយគ្នា និងកុំឱ្យស្ទះចរាចរណ៍ ។
គួរបញ្ជាក់ផងដែរថានេះមិនមែនជាលើកទី១ទេដែររថយន្តប្រភេទធុនធំបើកក្រឡាប់នៅចំណុចគល់ស្ពានព្រះមុនីវង្ស ហើយអ្វីដែរធ្វើឱ្យមានការចាប់អារម្មណ៍ទៀតនោះគឺរថយន្តខាងលើបានដឹកសំពីងសំពោងគ្មានសណ្តាប់ធ្នាប់ ដែលជាហេតុធ្វើឱ្យរថយន្តខាងលើពេលបើកគេចនឹងអ្វីមួយងាយនិងក្រឡាប់ ។ នេះសំណាងហើយពេលដែលកើតហេតុគ្មានរថយន្តធ្វើដំណើរឆ្លងកាត់ប្រសិនបើមានរថយន្តធ្វើដំណើរឆ្លងកាត់នោះប្រកដជាមានគ្រោះថ្នាក់ដល់អាយុជីវិតមនុស្ស ជាក់ជាមិនខាន ។ មហាជនបានធ្វើការរិះគន់ចំពោះរថយន្តដែលដឹកសំពីងសំពោងដែលតែងតែបង្កគ្រោះថ្នាក់ដល់អ្នកធ្វើដំណើរ ថាគួរតែគិតគូររៀបចំទុកដាក់សម្ភារដែលត្រូវដឹកជញ្ជូនឱ្យបានល្អ ដើម្បីជៀសវៀងកុំឱ្យមានករណីផ្សេងៗកើតឡើងប៉ះពាល់ដល់សុវត្ថិភាពដល់អ្នកធ្វើដំណើរទាំងខ្លួនឯង និងអ្នកដ៍ទៃ ។
ចែករំលែកព័តមាននេះ