រាជធានីភ្នំពេញ ៖ ផ្តើមចេញពីគ្រោះថ្នាក់ចរាចរណ៍រវាងម៉ូតូពីរគ្រឿងបើកប៉ះគ្នាតិចតួចតែភាគីទាំងសងខាងមិនបានដោះស្រាយគ្នាតាមសម្រួល បែរជាដោះស្រាយគ្នាដោយកម្លាំងបាយទៅវិញ ។ លទ្ធផលចុងក្រោយភាគីម្ខាងរងរបួសបែកក្បាលចូលសង្រ្គោះនៅមន្ទីរពេទ្យ ចំណែកភាគីម្ខាងទៀតត្រូវសមត្ថកិច្ចឃាត់ខ្លួន។ ហេតុការណ៍នេះកើតឡើងកាលពីវេលាម៉ោង ១២ និង ២០នាទីអាធ្រាត្រ ឈានចូលថ្ងៃទី ២៦ ធ្នូ ២០១៤ នៅចំណុចមុខសកលវិទ្យាល័យភូមិន្ទភ្នំពេញ តាមបណ្តោយមហាវិថីសហព័ន្ធរុស្ស៊ី ស្ថិតក្នុងសង្កាត់ទឹកល្អក់ទី១ ខណ្ឌទួលគោក ។
ភាគីរងរបួសទី១.ឈ្មោះ សុទ្ធ ពិសី ភេទប្រុស អាយុ២១ឆ្នាំ ជាសិស្សរៀនភាសារកូរ៉េ ស្នាក់នៅសង្កាត់ទឹកថ្លា ខណ្ឌសែនសុខ រងរបួសបែកក្បាល ,ទី២.ឈ្មោះ សូ រ៉ាវី ភេទស្រី អាយុ១៩ឆ្នាំ ជានិស្សិតជំនាញគ្រប់គ្រងឆ្នាំទី២ ស្នាក់នៅក្នុងសង្កាត់ទួលសង្កែ ខណ្ឌឬស្សីកែវ ភ័យសន្លប់នៅនឹងកន្លែង ហើយអ្នកទាំងពីរជាសង្សារនិងគ្នា ។ ចំណែកភាគីសមត្ថកិច្ចឃាត់ខ្លួនមានឈ្មោះ សូត្រ ឡេងហួត ភេទប្រុស អាយុ១៨ឆ្នាំ ស្នាក់នៅសង្កាត់ទឹកល្អក់២ ខណ្ឌទួលគោក ។
ប្រភពព័ត៌មានពីសមត្ថកិច្ចបានឱ្យដឹងថា នៅមុនពេលកើតហេតុភាគីរងរបួសដែលជាគូសង្សារនិងគ្នាបានជិះម៉ូតូកូនទា មួយគ្រឿងពណ៌លឿង ពាក់ស្លាកលេខភ្នំពេញ 1CU-6883 បើកឌុបគ្នា ចេញពីក្លិបធ្វើដំណើរត្រឡប់ទៅកន្លែងស្នាក់នៅក្នុងសង្កាត់ទឹកថ្លា ។ ខណៈធ្វើដំណើរមកដល់ចំណុចកើតហេតុក៏បានបើកម៉ូតូទៅប៉ះគ្នាជាមួយម៉ូតូគុប ពណ៌ទឹកប៊ិច មួយគ្រឿង ជិះដោយយុវជនប្រុស-ស្រី ៣នាក់ ។ ដោយគិតថាមិនមានអ្នកណារងរបួសក្នុងករណីគ្រោះថ្នាក់ចរាចរណ៍នេះ ភាគីខាងម៉ូតូកូនទារបានសុំទោសទៅភាគីខាងម៉ូតូគុប ហើយក៏លើកម៉ូតូជិះចេញទៅ តែត្រូវបានភាគីខាងម៉ូតូបគុប ពណ៌ទឹកប៊ិចមិនព្រមក៏ហៅឱ្យភាគីខាងម៉ូតូកូនទារឈដើម្បីសងសំណងមកខ្លួន ប៉ុន្តែភាគីម៉ូតូកូនទាមិនបានឮក៏បានបើកម៉ូតូទៅមុខធម្មតា ។
បន្ទាប់មកភាគីម៉ូតូកូនទារបានបើកម៉ូតូឌុបគ្នាមកដល់ចំណុចគល់ស្ពានអាកាស៧មករា ក៏ត្រូវបានយុវជនមួយក្រុមទៀតដែលជាមិត្តភក្តិរបស់ភាគីម៉ូតូគុបបាន ជិះម៉ូតូពីរគ្រឿង ដែលមួួយគ្រឿងម៉ាកស្គូពី ពណ៌ស ពាក់ស្លាកលេខភ្នំពេញ1AM-4227 ជិះគ្នាពីរនាក់ និងម៉ូតូហុងដាឌ្រីម សេ១១០ ជិះគ្នា២នាក់ ដោយក្នុងដៃប្រដាប់ដោយខ្សែក្រវ៉ាត់ បានមកស្ទាក់ដេញវាយភាគីខាងម៉ូតូកូនទា បណ្តាលឱ្យបុរសដែលជិះម៉ូតូកូនទារងរបួសបែកក្បាល ចំណែកឯនារីជាសង្សារឃើញសង្សារបែកក្បាលហូរឈាម ក៏ភ័យសន្លប់នៅនឹងកន្លែង ។ ភ្លាមៗ សមត្ថកិច្ចបានចុះមកអន្តរាគមន៍ចាប់ឃាត់ខ្លួនជនបង្ករបួសស្នាមបានម្នាក់ ហើយច្រើននាក់ទៀតបានបើកម៉ូតូរត់គេចខ្លួនអស់ ។
ក្រោយពេលកើតហេតុជនរងគ្រោះត្រូវបានគេបញ្ជូនទៅសង្រ្គោះនៅមន្ទីរពេទ្យ ហើយយុវជនបង្ករបួសស្នាមត្រូវបានសមត្ថកិច្ចឃាត់ខ្លួនទៅសួរនាំនៅប៉ុស្តិ៍នគរបាលរដ្ឋបាលទឹកថ្លា។នៅចំពោះមុខសមត្ថកិច្ចជនបង្ករបួសស្នាមបានឆ្លើយថាមូលហេតុដែលគេព្រួតគ្នាវាយទៅលើភាគីរងគ្រោះដោយសារខឹងបើកម៉ូតូបុកម៉ូតូមិត្តភក្តិរបស់គេ ហើយបើកគេចមិនព្រមដោះស្រាយ ។
ចែករំលែកព័តមាននេះ