AFP កាលពីពេល ថ្មីៗនេះផ្សាយថា ចាប់តាំងពីស៊ីរីកើតមានសង្គ្រាមនៅក្នុងឆ្នាំ២០១១មក តំបន់បេតិកភណ្ឌវប្បធម៌របស់ប្រទេសនេះរងការខូចខាតជិត៣០០កន្លែង ។ នេះបើតាមរបាយការណ៍របស់អង្គភាពជំនាញផ្នែកវប្បធម៌របស់អង្គការសហប្រជាជាតិ «យូណេស្កូ» ។
តំបន់ដែលទទួលរងការខូចខាតធ្ងន់ដោយសារសង្គ្រាមស៊ីវិល ដែលអូសបន្លាយរយៈពេលជាង៣ឆ្នាំ មានដូចជា ទីក្រុងអាឡេបប៉ូ ជាទីក្រុងបុរាណ មានអាយុជាង៧០០០ឆ្នាំ និងក្រុង Palmyra ជាដើម ដែលយូណេស្កូ បានចុះក្នុងបញ្ជីបេតិកភណ្ឌពិភពលោក ។
យូណេស្កូ បញ្ជាក់នៅក្នុងសេចក្តីថ្លែងការណ៍ថា ការលួចប្លន់ និងបំផ្លិចបំផ្លាញដោយទម្លាក់គ្រាប់តាមផ្លូវអាកាស រួមទាំងដាក់បំផ្ទុះដោយវិធីសាស្ត្រ ផ្សេងៗ បានបង្កើតការខូចខាតដ៏អាក្រក់ដល់ទីតាំងបុរាណ និងវត្ថុបុរាណជាបេតិកភណ្ឌរបស់មនុស្សជាតិ ។
របាយការណ៍នេះគឺបង្ហាញការសិក្សាស្រាវជ្រាវពីការខូចខាតដែលកើតឡើងនៅតំបន់បេតិកភណ្ឌវប្បធម៌ពិភពលោកចំនួន១៨កន្លែង ដោយចំនួននេះមាន៦កន្លែង បានបង្ហាញក្នុងបញ្ជីរបស់យូណេស្កូ រួមមានក្រុងបុរាណ អាឡេបប៉ូ, បូស្រា, ដាមា៉កាស់ ក្រុងនៃសេចក្តីស្លាប់នៅភាគខាងជើងស៊ីរី, ក្រុងក្រាដេសសឺវា៉លីយេ និងក្រុងបា៉លមៃ៉រា៉ ។
លទ្ធផលស្រាវជ្រាវយា៉ងល្អិតល្អន់តាមរយៈរូបថតពីផ្កាយរណបរបស់ទីតាំងចំនួន២៩០កន្លែង បានបញ្ជាក់ថា មានកន្លែងទទួលការបំផ្លិចបំផ្លាញចំនួន២៤ និងខូចខាតធ្ងន់ចំនួន១០៤កន្លែង ខូចខាតមធ្យមចំនួន៨៥កន្លែង និងមាននិន្នាការនឹងខូចខាតចំនួន៧៧កន្លែង ។
អង្គការសហប្រជាជាតិបញ្ជាក់ថា របាយការណ៍នេះគឺជា «ភស្តុតាងដែលបង្ហាញថា មានការខូចខាតកើតឡើងទៅលើតំបន់បេតិកភណ្ឌវប្បធម៌ដ៏ល្បីនៅស៊ីរី» រួមទាំងអំពាវនាវឱ្យយកអស់ពីកម្លាំងកាយចិត្តក្នុងការការពារទីតាំងសំខាន់ទាំងនោះឱ្យកាន់តែខ្លាំង ។
រូបថតពីផ្កាយរណប គឺជាប្រភពនៃអំណះអំណាងដ៏សំខាន់ ដោយផ្តល់ទិន្នន័យពីអង្គការផ្នែកភូមិសាស្ត្រ UNOSAT មានស្នាក់ការនៅក្រុងហ្សឺណែវ ។
លោកអេណា ប៊ីយ័រហ្គោ នាយករបស់អង្គការ UNOSAT ថ្លែងថា «គឺជារឿងគួរឱ្យសោកសៅមួយសម្រាប់ជនជាតិស៊ីរី និងមនុស្សទូទៅនៅលើពិភពលោក ដែលកើតមានរឿងរា៉វបែបនេះ» ៕
ចែករំលែកព័តមាននេះ