គេហទំព័របរទេស Telegraph ចេញផ្សាយកាលពីពេល ថ្មីៗនេះឱ្យដឹងថា ក្រុមហ៊ុនបច្ចេក វិទ្យាកូរ៉េ Samsung គ្រោងដំណើការផលិតអេក្រង់កុំព្យូទ័ររាងកោងទំហំ៣៤អុីញ គឺម៉ូដែល SE790C ព្រមទាំងបង្ហាញវត្តមានក្នុងព្រឹត្តិការណ៍តាំងពិពរ័ណ៍ផលិតផលអេឡិចត្រូនិក CES នៅឆ្នាំ២០១៥ ដោយសង្ឃឹមថា អាចផ្តួលផលិតផលរបស់ក្រុមហ៊ុន LG, HP និង Dell ដែលក្រុមហ៊ុនទាំងអស់នេះសុទ្ធតែបានផលិតឧបករណ៍អេឡិចត្រូនិកមានរាងកោង ។
លក្ខណៈពិសេសរបស់អេក្រង់កុំព្យូទ័ររាងកោងនេះ មានកម្រិតពន្លឺភ្លឺច្បាស់ QHD ៣៤៤០ គុណនឹង ១៤៤០ភិចស៊ែល និងមានរូបភាពចលនារស់រវើក 3D ទៀតផង ។ អេក្រង់កុំព្យូទ័រកោងមួយនេះបង្កើតឡើងប្រកបដោយមុខងារ កម្សាន្តៗជាច្រើនប្រភេទដូចជា ហ្គេមកម្សាន្ត និងការទស្សនាភាពយន្ត ។ ក្រៅពីនេះវាភ្ជាប់ប្រព័ន្ធ PbP (Picture by Picture) ដែលអនុញាតឱ្យអ្នកប្រើប្រាស់ទាំងអស់ទាក់ទងជាមួយផលិតផលអេឡិចត្រូនិកផ្សេងទៀតដូចជា ឧបករណ៍ហ្គេម ឡេបថប និងកុំព្យូទ័រលើតុដែលនឹងបង្ហាញរូបភាពលើផ្ទៃអេក្រង់កុំព្យូទ័ររាងកោង SE790C ។ ក្រុមហ៊ុនសាំសុ៊ងមិនបានបញ្ជាក់ពីតម្លៃរបស់វាទេ ។
យោងតាមរបាយការណ៍ចេញផ្សាយដោយក្រុមហ៊ុនទីផ្សារស្រាវជ្រាវលើផលិតផលទូរទស្សន៍ DispalySearch TV Design and Feature ឱ្យដឹងកាលពីខែមេសាថា ទូរទស្សន៍រាងកោងរបស់ក្រុមហ៊ុនសាំសុ៊ងនាំចេញទៅក្រៅប្រទេសស្ទើរតែ ៨០០.០០០ គ្រឿងក្នុងឆ្នាំ២០១៤ ហើយក្រុមហ៊ុនរំពឹងថា ការនាំចេញនឹងកើនឡើង៦លានគ្រឿងនៅដំណាច់ឆ្នាំ ២០១៧ ។
ក្រុមហ៊ុនសាំសុ៊ងបង្កើតឡើងក្នុងឆ្នាំ១៩៣៨នៅទីក្រុងដេហ្គូ ប្រទេសកូរ៉េខាងត្បូង ដោយស្ថាបនិកឆ្នើមគឺលោក Lee Byung-chul ។ បច្ចុប្បន្ននេះ ក្រុមហ៊ុនសាំសុ៊ងឈរលំដាប់ថ្នាក់ទី១ក្នុងការនាំចេញស្មាតហ្វូន និងឧបករណ៍អេឡិចត្រូនិកផ្សេងទៀតទៅកាន់ពិភពលោក ៕
ចែករំលែកព័តមាននេះ