ខេត្តកំពង់ចាម ៖ ដោយមើលឃើញនូវទុក្ខលំបាករបស់ប្រជាពលរដ្ឋខ្មែរអ៊ិស្លាមដែលរងគ្រោះដោយអគ្គិភ័យឆាបឆេះផ្ទះអស់ទាំងស្រុងចំនួន១៣ខ្នង និង១៥ខ្នងទៀតត្រូវរុះរើនៅភូមិរកាលើ សង្កាត់សំបួរមាស ក្រុងកំពង់ចាម នៅព្រឹកថ្ងៃទី២៥ ធ្នូ ២០១៤
ខេត្តកំពង់ចាម ៖ ដោយមើលឃើញនូវទុក្ខលំបាករបស់ប្រជាពលរដ្ឋខ្មែរអ៊ិស្លាមដែលរងគ្រោះដោយអគ្គិភ័យឆាបឆេះផ្ទះអស់ទាំងស្រុងចំនួន១៣ខ្នង និង១៥ខ្នងទៀតត្រូវរុះរើនៅភូមិរកាលើ សង្កាត់សំបួរមាស ក្រុងកំពង់ចាម នៅព្រឹកថ្ងៃទី២៥ ធ្នូ ២០១៤ លោកហ៊ុន ណេង អ្នកតំណាងរាស្ត្រមណ្ឌលកំពង់ចាម និងជាប្រធានកិត្តិយសកាកបាទក្រហមខេត្ត លោកលន់ លឹមថៃ អភិបាលខេត្តអមដំណើរដោយប្រធានមន្ទីរនានាជុំវិញខេត្ត បាននាំយកអំណោយចុះមកចែកជូនដល់ប្រជាពលរដ្ឋក្នុងក្តីអាណិតអាសូរបំផុត ។
អំណោយដែលនាំមកចែកជូនដល់ប្រជាពលរដ្ឋរងគ្រោះដោយអគ្គិភ័យឆេះផ្ទះទាំងស្រុងចំនួន១៣ខ្នងស្មើ១៣គ្រួសារ សម្រាប់អំណោយរបស់សាខាកាកបាទក្រហមកម្ពុជាខេត្ត ១គ្រួសារៗទទួលបាន ថវិកា១លានរៀល សង្ក័សី១៥សន្លឹក អង្ក៥០គីឡូក្រាម មី១កេស ត្រីខ១០កំប៉ុង ភួយ១ មុង១ សារុង១ និងក្រមា១ ។ អំណោយរបស់អភិបាលខេត្ត ជូន១គ្រួសារៗ ទទួលបានថវិកាចំនួន៤០ម៉ឺនរៀល ។ បញ្ជាការដ្ឋានកងរាជអាវុធហត្ថខេត្ត ជូន១គ្រួសារៗ ទទួលបានថវិកា៥ម៉ឺនរៀល មី១កេស ត្រីខ១០កំប៉ុង ។ មន្ទីរសាធារណការ និងដឹកជញ្ជូនខេត្ត ជូន១គ្រួសារៗទទួលបានថវិកា១០ម៉ឺនរៀល រួមជាមួយនឹងមន្ទីរពាក់ព័ន្ធផ្សេងៗ បានបរិច្ចាកនូវថវិកាជាច្រើនផងដែរ ។
សំរាប់ប្រជាពលរដ្ឋរងគ្រោះដែលរុះរើផ្ទះចំនួន១៥ខ្នងស្មើ១៥គ្រួសារ វិញសម្រាប់អំណោយរបស់សាខាកាកបាទក្រហមកម្ពុជាខេត្ត ១គ្រួសារៗ ទទួលបានថវិកាចំនួន៣០ម៉ឺនរៀល អង្ករ៥០គីឡូក្រាម មី១កេស ត្រីខ ១០កំប៉ុង ភួយ១ សារុង១ និងក្រមា១ ។ អំណោយរបស់លោកអភិបាលខេត្ត ជូន១គ្រួសារៗទទួលបានថវិកាចំនួន២០ម៉ឺនរៀលផងដែរ។
គួរបញ្ជាក់ថា កាលពីវេលាម៉ោង៤ និង៣០នាទីរសៀល ថ្ងៃទី២៤ ធ្នូ នៅភូមិរកាលើ សង្កាត់សំបួរមាស ក្រុងកំពង់ចាម អគ្គិភ័យបានឆាបឆេះលំនៅឋានដែលសង់ជាប់ៗគ្នាអស់ចំនួន១៣ខ្នង និង១៥ខ្នងទៀតត្រូវរុះរើ។
ភ្លើងដំបូងត្រូវបានគេរកឃើញថា បានឆេះចេញពីផ្ទះរបស់ឈ្មោះ សេន គ្រីហ៊ីម ភេទប្រុស អាយុ៣៦ឆ្នាំ ដែលបានដាំបាយចង្ក្រានហ្គាសបើកហឹមតិចៗ រួចបិទទ្វារចាក់សោចេញទៅសាមងក្រោយផ្ទះក៏បង្កជាអគ្គិភ័យតែម្តង៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ