ខេត្តព្រៃវែង ៖ ជុំវិញការស្លាប់ហើយរស់ឡើងវិញរបស់នារីឈ្មោះ ចាន់ ស្រីរត្ន័ ដែលត្រូវបានកោះសន្តិភាពចុះផ្សាយចំនួន២លេខរួមមកហើយនោះ បានបន្សល់ទុកនូវចម្ងល់ជាច្រើនដែលសាធារណជនទូទៅចង់ដឹងបំផុត ថាតើនាង ចាន់ ស្រីរត្ន័ មានអាការយ៉ាងម៉េចទៅហើយ? តើនាងអាចជាសះស្បើយវិញដែរឬទេ?
ចម្ងល់ទាំងនេះកោះសន្តិភាពសូមអនុញ្ញាតធ្វើការបកស្រាយជូនតាមរយៈការជួបសំភាសន៍ក្រុមគ្រួសារនាង ចាន់ ស្រីរត្ន័ នៅព្រឹកថ្ងៃទី២៥ ធ្នូ នៅនឹងផ្ទះរបស់នាងក្នុងភូមិព្រែកខ្សាយ(ក) ឃុំព្រែកខ្សាយ(ក) ស្រុកពាមរក៍ ខេត្តព្រៃវែង។ ជាមួយនឹងទឹកមុខស្រងូតស្រងាត់ លាយឡំនឹងសំឡេងខ្សឹកខ្សួលនិយាយស្ទើរមិនចេញ អ្នកស្រីដែលជាម្តាយនាងចាន់ ស្រីរត្ន័ បានឱ្យដឹងថា ក្រោយពីបានបញ្ចូលខ្យល់អុកស៊ីសែន និងដាក់សេរ៉ូមបាន៣យប់៣ថ្ងៃ គិតពីថ្ងៃទី២២ ដល់ល្ងាចថ្ងៃទី២៤ ធ្នូ សភាពរាងកាយកូនស្រីរបស់គាត់បានចាប់ប្រែប្រួល រាងកាយទាំងមូលចាប់ផ្តើមហើមជាំខ្មៅ មានទឹក និងឈាមហូរចេញតាមមាត់ ច្រមុះ និងភ្នែក។
ដោយឃើញអាការកូនបែបនេះ រូបគាត់ក៏បានហៅគ្រូពេទ្យមកពិនិត្យ តែក្រោយពីពិនិត្យរួចគ្រូពេទ្យគ្រវីក្បាលប្រាប់ថា អស់សង្ឃឹមហើយនាងឆ្លងមិនផុតពីយប់នេះទេ ទើបក្រុមគ្រួសារនាំគ្នាកាត់ចិត្ត ហើយត្រៀមរៀបចំធ្វើពិធីបុណ្យសពតែម្តង។
នាង ចាន់ ស្រីរត្ន័ ត្រូវបានក្រុមគ្រួសារដោះសេរ៉ូម និងដកខ្យល់អុកស៊ីសែនចេញ ហើយគ្របក្រណាត់ស នៅវេលាម៉ោង១១ព្រឹក ថ្ងៃទី២៥ ធ្នូ ដោយសន្មត់ថា នាងបានស្លាប់បាត់ទៅហើយ ខណៈដែលជីពចរនិងបេះដូងរបស់នាងនៅលោតនៅឡើយ។ ម្តាយរបស់នាងបានបញ្ជាក់ទៀតថា នៅវេលាម៉ោង១រសៀល ថ្ងៃទី២៥ ធ្នូនេះ សាកសពរបស់នាងនឹងត្រូវលាងសំអាត ហើយលើកដាក់ចូលមឈូសតម្កល់ទុក១យប់ ស្អែកឡើងម៉ោង១២ថ្ងៃត្រង់ ទើបធ្វើពិធីដង្ហែសពទៅកាន់វត្តឩត្តមសមាគមដើម្បីធ្វើពិធីបូជា។ ចំណែកកូនប្រុស-ស្រីទាំង២នាក់ របស់នាង ត្រូវប្តីដើមរបស់នាងនាំយកមកដល់ផ្ទះវិញហើយ គឺកូនស្រីពៅអាយុ៣ឆ្នាំ និងកូនប្រុសច្បងអាយុ៥ឆ្នាំ។
លោក លាង ហ៊ី ជាឳពុកនាង ចាន់ ស្រីរត្ន័ បានបញ្ជាក់ថា រូបគាត់ និងក្រុមគ្រួសារមិនចង់លើកនាងដាក់មឈូសទាំងមានដង្ហើមបែបនេះទេ ប៉ុន្តែពួកគាត់ត្រូវតែកាត់ចិត្ត ព្រោះរាងកាយនាងហើមជាំខ្មៅស្ទើរទាំងមូលខ្លួនទៅហើយ ថែមទាំងមានទឹករងៃ និងឈាមហូរចេញមកតាមមាត់ ច្រមុះ និងភ្នែកទៀត ដូច្នេះមានតែរៀបចំដាក់មឈូសបែបនេះទេ ទើបងាយស្រួល ហើយគ្មានក្លិនចេញមកក្រៅទំរាំដល់ពេលត្រូវបូជា។ ទោះជាយ៉ាងណាក៏ដោយពួកគេសង្ឃឹមថា នាងនឹងផុតដង្ហើមស្លាប់មុនពេលដែលគេលើកនាងដាក់ប៉ាឆាបូជានៅថ្ងៃស្អែកនេះ៕
ចែករំលែកព័តមាននេះ