ខេត្តព្រះសីហនុ ៖ ជនជាតិអាល្លឺម៉ង់ ឈ្មោះ HELGE BRUMMER ភេទប្រុស អាយុ៣៦ឆ្នាំ ជនជាតិអាល្លឺម៉ង់ ជាអ្នកទេសចរ កាន់លិខិតឆ្លងដែនលេខ C1T1WWT5C ស្នាក់នៅបណ្តោះអាសន្នផ្ទះសំណាក់យីហោ សាន់ដេ បានដេកសន្លប់នៅក្នុងបន្ទប់ស្នាក់នៅបង្កឱ្យមានការភ្ញាក់ផ្អើល កាលពីថ្ងៃទី២៤ ធ្នូ ២០១៤។
បើតាមការអះអាងរបស់មន្ទីរសំរាកព្យាបាលរស្មីកំពង់សោមបានឱ្យដឹងថា នៅពេលវេលាខាងលើ ម្ចាស់ផ្ទះសំណាក់យីហោខាងលើបានទូរស័ព្ទមកមន្ទីរសំរាកព្យាបាលរស្មីកំពង់សោមឱ្យយករថយន្តសង្គ្រោះដឹកចេញពីផ្ទះសំណាក់ដោយជនរងគ្រោះខាងលើមានជំងឺ ដេកសន្លប់នៅក្នុងបន្ទប់ជួល។
បន្ទាប់ពីដឹកមកដល់មន្ទីរសំរាកព្យាបាលអ្នកជំងឺបានសន្លប់ស្តូកស្តឹងទៅហើយ ក្រុមគ្រូពេទ្យបានបញ្ចូលខ្យល់អុកស៊ីសែនដើម្បីធ្វើការសង្គ្រោះ បន្ទាប់មកដោយពិនិត្យឃើញស្ថានភាពជំងឺកាន់តែដុនដាបទៅ ក្រុមគ្រូពេទ្យក៏សំរេចចិត្តបញ្ជូនជនរងគ្រោះខាងលើមករាជធានីភ្នំពេញ ប៉ុន្តែខណៈដែលធ្វើដំណើរមកដល់ជញ្ជីងថ្លឹងរថយន្តទី២ ជនរងគ្រោះក៏បានដាច់ខ្យល់ស្លាប់នៅតាមផ្លូវ។
បន្ទាប់មកទៀតក្រុមគ្រូពេទ្យដែលបញ្ជូនជនរងគ្រោះខាងលើក៏ដឹកជនរងគ្រោះវិលត្រឡប់មកកាន់មន្ទីរពេទ្យវិញ លុះព្រឹកឡើងថ្ងៃទី២៥ ធ្នូ ២០១៤ ក៏បានរាយការណ៍ទៅសមត្ថកិច្ចចុះមកពិនិត្យសាកសពជនរងគ្រោះ។ តាមការសន្និដ្ឋានជំហានដំបូងរបស់សមត្ថកិច្ច និងក្រុមគ្រូពេទ្យបានបញ្ជាក់ថា ជនរងគ្រោះជនជាតិបរទេសខាងលើនេះ ស្លាប់ដោយសារជំងឺគាំងបេះដូង ។ បច្ចុប្បន្នសាកសពជនរងគ្រោះ ត្រូវបានតំកល់ទុកនៅវត្តឥន្តញាណ (ហៅវត្តក្រោម) ក្រុង-ខេត្តព្រះសីហនុ ដើម្បីរង់ចាំប្រគល់ជូនស្ថានទូតអាល្លឺម៉ង់ ៕
ចែករំលែកព័តមាននេះ