រាជធានីភ្នំពេញ ៖ គូស្នេហ៍វ័យក្មេង១គូដែលទាក់ទងគ្នាយ៉ាងផ្អែមល្ហែមតាមរយៈទូរស័ព្ទអស់រយៈពេល៥ខែមកហើយ ទីបំផុតខាងប្រុសបានចាកចេញពីស្រុកកំណើតរបស់ខ្លួននៅឯខេត្តកំពង់ធំ ហើយទៅរកខាងស្រីដល់ខេត្តព្រៃវែង លុះពេលបានជួបគ្នាផ្ទាល់រឹងរឹតតែធ្វើឱ្យអ្នកទាំងពីរស្រឡាញ់គ្នាកាន់តែខ្លាំងឡើងទ្វេដង ជាងការសាសងតាមទូរស័ព្ទទៅទៀត ។
ដោយសាររន្ទះស្នេហ៍នេះមុតស្រួចខ្លាចឪពុកម្តាយមិនបំពេញបំណង ពួកគេក៏នាំគ្នាចាកចេញពីស្រុកកំណើតមកភ្នំពេញ ដើម្បីរួមរស់នៅជាមួយគ្នាក្នុងនាមជាប្តីប្រពន្ធឥតខាន់ស្លា ប៉ុន្តែអ្នកទាំង២នាក់អះអាងថា មិនបានធ្វើអ្វីឲ្យហួសពីគន្លងប្រពៃណីខ្មែរទេ ដោយខាងប្រុសបានទុកកិត្តិយសឲ្យខាងស្រីមិនប៉ះពាល់ឡើយ ។ ក្រោយពីមកដល់រាជធានីភ្នំពេញបានរយៈពេល៣ថ្ងៃ ខាងស្រីខ្លាចក្រុមគ្រួសារបារម្ភ ក៏ទូរស័ព្ទប្រាប់ឲ្យដឹងពីសាច់រឿង និងទីកន្លែងដែលនាងនិងយុវជនជាសង្សារសំណព្វចិត្តកំពុងស្នាក់នៅ ។
គូស្នេហ៍វ័យក្មេងខាងលើេនេះ ខាងប្រុសឈ្មោះ ឌី ដារ៉ូ អាយុ១៨ឆ្នាំ មុខរបរជាអ្នកនេសាទ មានស្រុកកំណើតនៅភូមិប្រាសាទ ឃុំសាន់គ ស្រុកកំពង់ស្វាយ ខេត្តកំពង់ធំ ចំណែកខាងស្រីឈ្មោះ វ័ន ណារ៉ា អាយុ១៨ឆ្នាំដូចគ្នា មានស្រុកកំណើតនៅភូមិកំពង់ស្លែង ឃុំធាយ ស្រុកបាភ្នំ ខេត្តព្រៃវែង ។ ពួកគេទាំង២នាក់បាននាំគ្នាស្នាក់នៅផ្ទះជួលមួយកន្លែងក្នុងភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ ។ ដោយឡែក ឪពុកម្ដាយខាងស្រីដែលខ្វល់ខ្វាយចិត្តយ៉ាងខ្លាំងក្រោយពេលបាត់កូនស្រីពីផ្ទះរយៈពេល៣ថ្ងៃ ពួកគាត់បានតាមរកគ្រប់ទីកន្លែងទាំងអស់ ប៉ុន្តែមិនឃើញឡើយ និងមិនដឹងថាកូនស្រីមានសុខទុក្ខយ៉ាងណាទេ។ លុះពេលកូនស្រីទូរស័ព្ទប្រាប់ថា នាងមានសេចក្ដីសុខទេ និងប្រាប់ពីទីកន្លែងដែលនាងកំពុងស្នាក់នៅ ពួកគាត់ក៏ធ្វើដំណើរមករកកូនភ្លាមៗ ទាំងចិត្តត្រេកអរបំផុត ។
បន្ទាប់ពីមកដល់ឃើញកូនស្រីកំពុងនៅជាមួយយុវជន ឌី ដារ៉ូ ដែលជាអ្នកនេសាទ ពួកគាត់មានចិត្តខឹងសម្បាយ៉ាងខ្លាំង ដោយចោទយុវជននោះថា ពង្រត់កូនស្រីគាត់ និងបានប្ដឹងប៉ូលិសប៉ុស្ដិ៍ចោមចៅ ឲ្យចាប់
ខ្លួនយុវជននោះទៅសាកសួរនៅប៉ុស្ដិ៍ ។ ប្រភពព័ត៌មាននិយាយថា យុវជនខាងលើត្រូវបានប៉ូលិសឃាត់ខ្លួននៅវេលាម៉ោង២និង២០នាទីរសៀលថ្ងៃទី២៣ ធ្នូ ចំណែកនាងជាគូស្នេហ៍ពេលមានរឿងបែបនេះ មានការពិបាកចិត្តយ៉ាងខ្លាំង ព្រោះនាងមានចិត្តស្រឡាញ់ យុវជននោះខ្លាំងណាស់ ។ ក្រោយពេលទៅដល់ប៉ុស្ដិ៍ប៉ូលិសចោមចៅហើយ យុវជន ឌី ដារ៉ូ និយាយថា ខ្លួននិងនាងវ័ន ណារ៉ា មានទំនាក់ទំនងស្រឡាញ់គ្នាតាមរយៈទូរស័ព្ទ៥ខែមកហើយ ។ ថ្វីបើមិនបានឃើញមុខគ្នាក៏ពិតមែន បុ៉ន្តែក្នុងរយៈពេល៥ខែនេះ ពួកខ្លួនស្រឡាញ់គ្នាខ្លាំងណាស់ និងសច្ចាថា នៅពេលជួបមុខគ្នា ទោះបីជាយ៉ាងណា ក៏ត្រូវតែយកគ្នាជាប្ដីប្រពន្ធដែរ ។
យុវជនរូបនេះនិយាយទៀតថា ដោយសារតែអន្ទះសាចង់ជួបមុខនាងណារ៉ា ខ្លាំងពេក ទើបនៅថ្ងៃទី១៩ ធ្នូ ខ្លួនក៏សម្រេចចិត្តធ្វើដំណើរចាកចេញពីខេត្តកំពង់ធំ ទៅរកនាងនៅឯខេត្តព្រៃវែង ដោយណាត់ជួបគ្នានៅផ្ទះលោកមេភូមិ ។ លុះពេលបានជួបមុខគ្នា ក្ដីស្រឡាញ់ក៏កើនឡើងទ្វេដង និងសម្រេចចិត្តថា ត្រូវតែរស់នៅជាមួយគ្នាជាប្ដីប្រពន្ធរហូតទៅ មិនតែប៉ុណ្ណោះ ដោយខ្លាចឪពុកម្ដាយខាងស្រីបំបែក ទើបពួកខ្លួននាំគ្នាចាកចេញឲ្យឆ្ងាយសិន ចាំជម្រាបពួកគាត់ជាក្រោយ រួចក៏នាំគ្នាមកស្នាក់នៅភ្នំពេញតែម្ដង ។ នៅក្នុងប៉ុស្ដិ៍ប៉ូលិស នាងវ័ន ណារ៉ា ក៏បានអះអាងដូចយុវជន ឌី ដារ៉ូ ដែរ ហើយដោយសារតែសមត្ថកិច្ចប៉ូលិសប៉ុស្ដិ៍ចោមចៅពន្យល់ណែនាំ ឯយុវជនរូបនេះក៏អះអាងថា ខ្លួននឹងចូលស្ដីដណ្ដឹងនាងធ្វើជាប្រពន្ធតាមប្រពៃណី ទើបឪពុកម្ដាយនាងលែងប្ដឹងប្ដល់ និងទុកឱកាសឲ្យចូលស្ដីកូនស្រីគាត់តាមកិច្ចសន្យាដែលបានធ្វើឡើងនៅចំពោះមុខប៉ូលិសប៉ុស្ដិ៍ចោមចៅ៕
ចែករំលែកព័តមាននេះ