រាជធានីភ្នំពេញ ៖ ស្រ្តីចំណាស់ជាអ្នករើសអេតចាយម្នាក់កំពុងជិះកង់តាមផ្លូវត្រូវបានម៉ូតូមួយគ្រឿងដែលជិះដោយបុរសនារី២នាក់ស្រវឹងជោកជាំ បើកមកបុកពីក្រោយពេញទំហឹងបណ្តាលឱ្យដួលទាំងកង់និងបោកស្រ្តីចំណាស់ទៅលើថ្នល់សន្លប់នៅនឹងកន្លែងកើតហេតុ ។ ហេតុការណ៍នេះកើតឡើងកាលពីវេលាម៉ោង ១២ និង ៥០នាទី អាធ្រាត្រឈានចូល ថ្ងៃទី ២៤ ធ្នូ ២០១៤ នៅចំណុចក្បែរវិមានឯករាជ្យ នៅលើកំណាត់ផ្លូវព្រះសីហនុ ស្ថិតក្នុងសង្កាត់ចតុមុខ ខណ្ឌដូនពេញ ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញម៉ូតូឃ្លីកពណ៌ក្រហម មួយគ្រឿងពាក់ស្លាកលេខភ្នំពេញ 1CF-5813 ជិះដោយបុរសនារីពីរនាក់ក្នុងស្ថានភាពស្រវឹងជោកជាំ បានប់ើកបរឌុបគ្នា តាមផ្លូវព្រះសីហនុ ក្នុងទិសដៅពីកើតទៅលិច ខណៈមកដល់ចំណុចកើតហេតុក៏បានបើកទៅបុកពីក្រោយស្រ្តីចំណាស់រើសអេតចាយម្នាក់កំពុងជិះកង់ស្របទិសគ្នា បណ្តាលឱ្យស្រ្តីចំណាស់ដួលបោកទៅលើថ្នល់សន្លប់នៅនឹងកន្លែងកើតហេតុ ។
ក្រោយពេលកើតហេតុបុរសនារីទាំង២នាក់មិនបានបើកម៉ូតូគេចទៅណាទេ ហើយសមត្ថកិច្ចក៏បានចុះមកអន្តរាគមន៍ផងដែរ ។ ស្រ្តីរងគ្រោះត្រូវបុរសនារីដែលបើកម៉ូតូបង្កនាំទៅសង្រ្គោះនៅមន្ទីរពេទ្យ។
ចែករំលែកព័តមាននេះ