រាជធានីភ្នំពេញ ៖ តាមការអញ្ជើញរបស់ព្រះករុណា ព្រះបាទ សម្តេចព្រះបរមនាថ នរោត្តមសីហមុនី ព្រះមហាក្សត្រនៃព្រះរាជាណាចក្រកម្ពុជា លោក ជ្រឿង តឹងសាង ( TRUONG TAN SANG ) ប្រធានរដ្ឋនៃសាធារណរដ្ឋសង្គមនិយមវៀតណាម ដឹកនំាគណៈប្រតិភូជាន់ខ្ពស់អញ្ជើញមកបំពេញទស្សនកិច្ចផ្លូវរដ្ឋនៅកម្ពុជា នៅព្រឹកថ្ងៃទី២៣ ធ្នូ ២០១៤ ។
បើតាមសេចក្តីជូនព័ត៌មានរបស់ក្រសួងការបរទេសនិងសហប្រតិបត្តិការអន្តរជាតិរបស់ប្រទេសកម្ពុជាបានបញ្ជាក់ឲ្យដឹងថា អំឡុងពេលទស្សនកិច្ចនៅកម្ពុជា លោក ជ្រឿង តឹងសាង នឹងចូលបង្គំគាល់ព្រះមហាក្សត្រកម្ពុជា នរោត្តមសីហមុនី នៅព្រះបរមរាជវំាង ។
ក្រៅពីនេះ លោកប្រធានាធិបតីវៀតណាម នឹងជួបជាមួយសម្តេចអគ្គមហាពញាចក្រី ហេង សំរិន ប្រធានរដ្ឋសភា សម្តេចតេជោ ហ៊ុន សែន នាយករដ្ឋមន្រ្តី , លោក សាយ ឈុំ អនុប្រធានទី១ ព្រឹទ្ឋសភា និងចូលថ្វាយបង្គំសម្តេចអគ្គមហាសង្ឃរាជាធិបតី ទេព វង្ស ព្រះមហាសង្ឃរាជគណៈមហានិកាយ និងសម្តេចព្រះអភិសិរីសុគន្ឋា មហាសង្ឃរាជាធិបតី បួរ គ្រី ព្រះមហាសង្ឃរាជគណៈធម្មយុត្តិកនិកាយ នៃព្រះរាជាណាចក្រកម្ពុជាផងដែរ ។
សេចក្តីជូនព័ត៌មានក៍បានបញ្ជាក់ទៀតថា សេចក្តីថ្លែងការណ៍រួមរវាងព្រះរាជាណាចក្រកម្ពុជា និង សាធារណរដ្ឋសង្គមនិយមវៀតណាម នឹងចេញផ្សាយនៅចុងបញ្ចប់នៃដំណើរទស្សនកិច្ច នាថ្ងៃទី២៤ធ្នូស្អែកនេះ ៕
ចែករំលែកព័តមាននេះ