រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់នាយកដ្ឋានព័ត៌មានអគ្គយោធសេវានៃក្រសួងការពារជាតិ ចេញផ្សាយកាលពីព្រឹកថ្ងៃទី២២ ធ្នូ បានឱ្យដឹងថា តបតាមការអញ្ជើញរបស់ក្រសួងការពារជាតិនៃព្រះរាជាណាចក្រកម្ពុជា លោកនាយឧត្តមសេនីយ៍ ប្រាវីត វង្សសុវណ្ណ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនៃព្រះរាជាណាចក្រថៃ នឹងដឹកនាំគណៈប្រតិភូយោធាជាន់ខ្ពស់នៃកងទ័ពភូមិន្ទថៃ មកបំពេញទស្សកិច្ចផ្លូវការនៅព្រះរាជាណាចក្រកម្ពុជា ពីថ្ងៃទី២៤ ដល់ថ្ងៃទី២៥ ធ្នូ ក្នុងគោលបំណងពង្រឹងនិងពង្រីកកិច្ចសហប្រតិបត្តិការនិងមិត្តភាពផ្នែកយោធារវាងកងទ័ពនៃប្រទេសទាំងពីរកម្ពុជា-ថៃ ។
សេចក្តីប្រកាសព័ត៌មានរបស់ក្រសួងការពារជាតិ បានបញ្ជាក់ថា ក្នុងឱកាសនោះដែរ លោកនាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនៃព្រះរាជាណាចក្រកម្ពុជា និងជាសហប្រធានគណៈកម្មាធិការព្រំដែនកម្ពុជា-ថៃ និងលោកនាយឧត្តមសេនីយ៍ ប្រាវីត វង្សសុវណ្ណ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនៃព្រះរាជាណាចក្រថៃ និងជាសហប្រធានគណៈកម្មាធិការព្រំដែនកម្ពុជា-ថៃ នឹងជួបពិភាក្សានិងចុះហត្ថលេខាលើកិច្ចព្រមព្រៀងនៃកិច្ចប្រជុំគណៈកម្មាធិការព្រំដែនទូទៅ (GBC) លើកទី១០ រវាងកម្ពុជានិងថៃ ។
កិច្ចប្រជុំគណៈកម្មាធិការព្រំដែនទូទៅ (GBC) លើកទី១០ ធ្វើឡើងដើម្បីពង្រឹងកិច្ចសហប្រតិបត្តិការបន្ថែមទៀត ក្នុងបរិបទលើកកម្ពស់សន្តិភាព សន្តិសុខនៅតាមតំបន់ព្រំដែន ព្រមទាំងការជំរុញឱ្យអាជ្ញាធរ និងគណៈកម្មាធិការពាក់ព័ន្ធ អនុវត្តលទ្ធផលនៃកិច្ចព្រមព្រៀងឱ្យមានប្រសិទ្ធភាពខ្ពស់ ។ ក្នុងអំឡុងពេលនៃទស្សនកិច្ចនេះដែរ គណៈប្រតិភូយោធាថៃដឹកនាំដោយលោកនាយឧត្តមសេនីយ៍ ប្រាវីត វង្សសុវណ្ណ នឹងត្រូវបានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អនុញ្ញាតឱ្យចូលជួបសម្តែងការគួរសមនៅថ្ងៃទី២៥ ធ្នូ នៅឯវិមានសន្តិភាព មុនពេលធ្វើមាតុភូមិនិវត្តន៍ទៅកាន់មាតុប្រទេសវិញ ៕
ចែករំលែកព័តមាននេះ