ខេត្តបាត់ដំបង ៖ បុរសអាយុជាង៦០ឆ្នាំម្នាក់ដែលជាសមាជិកគណៈកម្មការវត្ត ត្រូវបានស្ត្រីចុងភៅប្រចាំវត្តម្នាក់ប្ដឹងចោទប្រកាន់ពីបទ«រំលោ.ភសេពសន្ថវៈ» ប្រព្រឹត្តនៅឃុំស្នឹង ស្រុកបាណន់ បន្ទាប់ពីរឿងអាស្រូវនេះបែកធ្លាយដោយសារតែតាគណៈកម្មការវត្តរូបនេះ
ខេត្តបាត់ដំបង ៖ បុរសអាយុជាង៦០ឆ្នាំម្នាក់ដែលជាសមាជិកគណៈកម្មការវត្ត ត្រូវបានស្ត្រីចុងភៅប្រចាំវត្តម្នាក់ប្ដឹងចោទប្រកាន់ពីបទ«រំលោភសេពសន្ថវៈ» ប្រព្រឹត្តនៅឃុំស្នឹង ស្រុកបាណន់ បន្ទាប់ពីរឿងអាស្រូវនេះបែកធ្លាយដោយសារតែតាគណៈកម្មការវត្តរូបនេះរពឹសមាត់ដើរនិយាយផ្ដេសផ្ដាសក្រោយពីបានឡើងឋានសួគ៌ជាមួយគ្នារួច ។ តាគណៈកម្មការវត្តរូបនេះ ត្រូវសមត្ថកិច្ចឃាត់ខ្លួនកាលពីរសៀលថ្ងៃទី២១ ធ្នូ ក្រោយពីសមត្ថកិច្ចទទួលពាក្យបណ្ដឹងពីស្ត្រីរងគ្រោះ ។
លោកសន លុច នាយរងការិយាល័យនគរបាលព្រហ្មទណ្ឌកម្រិតធ្ងន់បានឲ្យដឹងថា ជនសង្ស័យឈ្មោះមិន សារុន ហៅលន អាយុ៦៦ឆ្នាំ ជាសមាជិកគណៈកម្មការវត្តបឹងប្រីក្នុងឃុំខាងលើ រីឯស្ត្រីដែលអះអាងថា ជាជនរងគ្រោះមានអាយុ៤៧ឆ្នាំ ។ ស្ត្រីចុងភៅរូបនេះអះអាងថា ខ្លួនគាត់ត្រូវតាលន ចាប់រំលោភនៅម៉ោងជាង១១យប់ថ្ងៃទី១៦ ធ្នូ តែមិនបានប្ដឹងទៅសមត្ថកិច្ចភា្លមៗទេ លុះប៉ុន្មានថ្ងៃក្រោយមករឿងនេះបែកធ្លាយដល់ប្ដី និងបែកខ្ចរខ្ចាយស្អុយពេញភូមិទើបប្ដឹងឲ្យសមត្ថកិច្ចចាត់ការដោយចោទតាគណៈកម្មការវត្តនោះថា បានចាប់រំលោភ ។
តាមរបាយការណ៍របស់សមត្ថកិច្ចមូលដ្ឋានបានឲ្យដឹងថា ករណីនេះបានបែកធ្លាយដោយសារប្ដីស្ត្រីចុងភៅប្រចាំវត្តនោះ ប្រទះឃើញកាបូបលុយរបស់តាលន់នៅក្នុងផ្ទះរបស់ខ្លួន ។ លុះសួរដេញដោលអំពីកាបូបលុយនោះទើបប្រពន្ធទម្លាយអំពីរឿងនេះដោយចោទតាគណៈកម្មការវត្តឈ្មោះលន ថា បានចាប់រំលោភគាត់តាំងពីយប់ថ្ងៃទី១៦ ធ្នូ នៅលើគ្រែក្រោមផ្ទះ និងដាក់ពាក្យបណ្ដឹងតែម្ដងទៅ ។ ស្ត្រីចុងភៅរូបនេះបានឆ្លើយនៅក្នុងកំណត់ហេតុដ៏ខ្លីរបស់សមត្ថកិច្ចថា តាគណៈកម្មការវត្តបឹងប្រីឈ្មោះ មិន សារុន ហៅលន បានមកហៅគាត់ឲ្យចុះពីផ្ទះនៅកណ្ដាលយប់ជ្រៅ ដោយចង់និយាយប្រាប់ពីរឿប្ដីគាត់មិនបានមកផ្ទះ ។ លុះនៅពេលគាត់ចុះមកដល់ដីស្រាប់តែតាលន ចាប់គាត់រំលោភនៅលើគ្រែក្រោមផ្ទះតែម្ដង ។
ទោះជាយ៉ាងណា តាគណៈកម្មការវត្តបឹងប្រីឈ្មោះមិន សារុន ហៅលន បានបដិសេធការចោទប្រកាន់ខាងលើនេះដែលថា គាត់បានចាប់បង្ខំរំលោភសេពសន្ថវៈ ប៉ុន្តែសារភាពថា ពិតជាបានរួមមេត្រីជាមួយមីងចុងភៅនោះមែន តែជាការព្រមព្រៀងគ្នាជាមុន ។ តាលនបានបញ្ជាក់ដដែលៗថា«ខ្ញុំមិនបានចាប់រំលោភស្ត្រីចុងភៅនៅក្នុងវត្តជាមួយគ្នានោះទេ គឺជាការព្រមព្រៀងគ្នា» ។ បើតាមប្រភពក្រៅផ្លូវការឲ្យដឹងថា សំណុំរឿងដ៏អាស្រូវរបស់តាគណៈកម្មការវត្តចាប់រំលោភមីងចុងភៅដែលមានភារកិច្ចនៅក្នុងវត្តជាមួយគ្នានេះ បានបែកធ្លាយស្អុយពេញភូមិបន្ទាប់ពីប្ដីស្ត្រីចុងភៅប្រទះឃើញកាបូបលុយរបស់តាលន់នៅផ្ទះរបស់ខ្លួន និងដោយសារតែតាគណៈកម្មការវត្តមាត់ដាចរូបនេះដើរនិយាយខ្សឹបខ្សៀវប្រាប់គេឯង ក្រោយពីខ្លួនបានឡើងឋានសួគ៌ជាមួយមីងចុងភៅ ទើបធ្វើឲ្យមីងចុងភៅក្ដៅមុខក៏សម្រេចប្ដឹងទៅសមត្ថកិច្ចឲ្យចាត់ការតែម្ដង ។
ជុំវិញសំណុំរឿងនេះ ក្រោយពីបញ្ចប់ការសួរនាំនិងកសាងសំណុំរឿង អធិការរងនគរបាលស្រុកបាណន់លោកថោង ថិន បានធ្វើការសន្និដ្ឋានដោយផ្អែកលើកំណត់ហេតុបំភ្លឺពីគ្រប់ភាគីថា ករណីនេះអាចកើតឡើងដោយសារការព្រមព្រៀងគ្នាជាមុន ប៉ុន្តែក្រោយពីប្ដីសួរដេញដោលពីរឿងកាបូបលុយតាគណៈកម្មការវត្ត ទើបប្ដឹងចោទថា ជារឿងចាប់រលោភតែម្ដង ។ ទោះជាយ៉ាងណា តាគណៈកម្មការវត្តមាត់ដាចដែលរងការប្ដឹងចោទប្រកាន់ពីមីងចុងភៅនោះ ត្រូវសមត្ថកិច្ចបញ្ជូនខ្លួនទៅកាន់សាលាដំបូងខេត្តនៅព្រឹកថ្ងៃទី២២ ធ្នូ តែមិនទាន់ដឹងថា តុលាការចាត់ការបែបណានោះទេ ៕
ចែករំលែកព័តមាននេះ