កាសែត GLOBAL TIMES ស្និទ្ធរដ្ឋអំណាចចិនរាយការណ៍កាលពីថ្ងៃទី២២ ធ្នូថា ភូមិគ្រឹះដ៏ទំនើបរបស់លោក ប ស៊ីឡៃ អតីតមេដឹកនាំចិនដែលជាប់ឃុំឃាំង ត្រូវបានដាក់លក់ក្នុងតម្លៃជាង៦,៩៥លានអឺរ៉ូ ។
អតីតលេខាបក្សកុំមុយនីស្តចិនក្រុងចុងគិញ លោក ប ស៊ីឡៃ ត្រូវគេផ្តួលរំលំគួរឱ្យភ្ញាក់ផ្អើលពេលលោកមានបំណងចូលក្នុងជួរគណៈកម្មាធិការអចិន្ត្រៃយ៍នៃការិយាល័យនយោបាយបក្សកុំមុយនីស្តចិន ។ លោកត្រូវចាប់ខ្លួនកាលពីដើមឆ្នាំ២០១២ ដកចេញពីតំណែង បន្ទាប់មកទទួលការកាត់ទោសកាលពីខែកញ្ញា ២០១៣ ដាក់គុកអស់មួយជីវិតពីបទពុករលួយ និងរំលោភបំពានអំណាច ដែលនោះជាការកាត់ទោសយ៉ាងខ្ទរខ្ទារបំផុតមួយ ។
ភូមិគ្រឹះនេះ ជាសមាសភាពសំខាន់នៃសំណុំរឿងចោទប្រកាន់ប្រឆាំងលោក ប ស៊ីឡៃ ។ យោងតាមឯកសារទាំងឡាយដែលប្រើប្រាស់កាត់ទោសលោកឱ្យដឹងថា ភូមិគ្រឹះនេះនៅជាប់សមុទ្រមេឌីទែរ៉ាណេ ត្រូវបានសាងសង់ឱ្យគ្រួសារមេដឹកនាំចិនរូបនេះដោយពាណិជ្ជករបរទេសម្នាក់ដែលជាមិត្តជិតដិត ។
ជាអ្នកជំរុញឱ្យមានយុទ្ធនាការធំមួយនៃការតស៊ូប្រឆាំងអំពើពុករលួយ តាំងពីលោកឡើងកាន់អំណាចពីដើមឆ្នាំ២០១៣មក ប្រធានាធិបតីចិន លោកស៊ី ជិនពីង អះអាងថា លោកប្តេជ្ញាចិត្តរឹបអូសបណ្តាទ្រព្យសម្បត្តិទទួលបានពីជនបរទេសដោយបណ្តាអ្នកទទួលខុសត្រូវចិន។ ចិនស្នើឱ្យមានកិច្ចសហប្រតិបត្តិការរបស់បណ្តារដ្ឋាភិបាលលោកខាងលិច ក្នុងការតាមប្រមាញ់ពួកអ្នកដែលរដ្ឋាភិបាលទាំងនោះចាត់ទុកថា ជាអ្នករត់ភៀសខ្លួនពុករលួយ ។
នីតិវិធីធ្វើបត្យាប័នប្រឆាំងជនជាតិចិនប្រភេទនេះ ត្រូវលើកឡើងនាពេលឆាប់ៗនៅបារាំងដែលនៅទីនោះមានអ្នកភៀសខ្លួនពុករលួយ២ ឬ៣នាក់ ៕
ចែករំលែកព័តមាននេះ