រាជធានីភ្នំពេញ ៖ ព្រឹត្តិការណ៍បាល់ទាត់ Sponsor Futsal-Cup 2014 វគ្គផ្តាច់ព្រ័ត្ររៀបចំធ្វើនៅទីលាន REAL Soccer រាជធានីភ្នំពេញ ដែលមានក្រុមខ្លាំងមកពីមណ្ឌល៤ ចូលរួមនោះបានបញ្ចប់ហើយកាលពីយប់ថ្ងៃទី២១ ធ្នូ ។
ជាលទ្ធផលចុងក្រោយ ក្រុម Victory FC មកពីមណ្ឌលរាជធានីភ្នំពេញ ក្លាយជាជើងឯកលើកពាន Sponsor Futsal Cup 2014 ទទួលបានពាន១ និងប្រាក់រង្វាន់៨លានរៀល។ ចំណាត់ថ្នាក់លេខ២ បានទៅក្រុម AFB88 មកពីមណ្ឌលសៀមរាប ទទួលបានប្រាក់រង្វាន់៦លានរៀល និងចំណាត់ថ្នាក់លេខ៣ បានទៅក្រុម Daniel A មកពីមណ្ឌលរាជធានីភ្នំពេញ ទទួលបានប្រាក់រង្វាន់៤លានរៀល ។
រីឯពានរង្វាន់ Fair-Play បានទៅក្រុមអវតារ FC មកពីមណ្ឌលសៀមរាប ទទួលបានប្រាក់រង្វាន់លើកទឹកចិត្តចំនួន៥០ម៉ឺនរៀល ។ ចំពោះពានរង្វាន់កីឡាករទាត់បាល់បញ្ចូលទីបានច្រើនជាងគេបានទៅកីឡាករ នុត ស៊ីនួន មកពីក្រុម AFB88 ដែលមួយព្រឹត្តិការណ៍នេះទាត់បាល់បញ្ចូលទីបានរហូត១៤គ្រាប់ ទទួលបានប្រាក់រង្វាន់ចំនួន៩០ម៉ឺនរៀល ។
លោក សឹម សានត្រាន អ្នកគ្រប់គ្រងព្រឹត្តិការណ៍ប្រកួតនេះបានបញ្ជាក់ថា យើងពិតជាមានមោទនភាពណាស់ ដោយបានរកឃើញក្រុមជើងខ្លាំងលើកពាន Sponsor Futsal Cup2014 នាចុងឆ្នាំនេះ ។ យើងជឿជាក់ថា សម្រាប់ឆ្នាំក្រោយព្រឹត្តិការណ៍នេះ នឹងកាន់តែអស្ចារ្យជាងនេះ ដោយសារក្រុមបាល់ទាត់ដែលគ្រោងដាក់ពាក្យចូលរួមប្រកួតមានចំនួនកាន់តែច្រើនឡើង ៕
ចែករំលែកព័តមាននេះ