រាជធានីភ្នំពេញ ៖ ដើម្បីរួមចំណែកអភិវឌ្ឍន៍វិស័យកីឡាការ៉ាតេដូនៅកម្ពុជា និងដើម្បីសម្រេចផែនការយុទ្ធសាស្ត្រអភិវឌ្ឍកីឡា ឆ្ពោះទៅ SEA Games ឆ្នាំ២០២៣ របស់ក្រសួងអប់រំយុវជន និងកីឡា សាលាការ៉ាតេដូ សូតូកង់កម្ពុជា បានរៀបចំកម្មវិធីបង្ហាញបច្ចេកទេស កីឡាការ៉ាតេដូ សូតូកង់ និងការប្រកួតមិត្តភាព ព្រមទាំងរៀបចំប្រគល់សញ្ញាបត្រថ្នាក់ដាន់ដល់មន្ត្រីកីឡា ក្រោមវត្តមានចូលរួមពីលោកបណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន លោក យូជីគូម៉ា ម៉ារុ ឯកអគ្គរាជទូតជប៉ុនប្រចាំកម្ពុជា លោក SHIBUYA TAKASHI គ្រូធំប្រចាំសហព័ន្ធកីឡាការ៉ាតេដូជប៉ុន ព្រមទាំងមន្ត្រីកីឡាសំខាន់ៗ និងកីឡាករ-កីឡាការិនីជាច្រើនរយនាក់ទៀត ។
ពិធីនេះបានរៀបចំឡើងនៅក្នុងវិមាននៃពហុកីឡដ្ឋានជាតិអូឡាំពិក កាលពីព្រឹកថ្ងៃទី២១ ធ្នូ ដោយមានសិស្សានុសិស្ស កីឡាករ-កីឡាការិនី មកពីក្លិបចំនួន២០ ប្រមាណ៣០០នាក់ចូលរួមសម្តែងនិងអបអរសាទរ ។
ក្រៅពីការប្រកួត និងសម្តែងរបស់កីឡាករ-កីឡាការិនីអាយុក្រោម១០ឆ្នាំ, ក្មេងជំទង់ និងមនុស្សពេញវ័យ លើប្រភេទវិញ្ញាសាសម្តែងកាតា តិចគីសូដាន់, កាតាជាក្រុម, កាតាហ្ស៊ីយ៉ុង, កាតាហ្គង់កាគូ, កាតាសូជីន, កាតាបាស់សៃដៃ, កាតាអ៊ែមពី, និងកាតាប្រយុទ្ធជាដើមនោះ ក៏មានពិធីប្រគល់សញ្ញាបត្រថ្នាក់ដាន់ និងការ៉ាតេហ្គី (ខោអាវការ៉ាតេ) ដល់រដ្ឋមន្ត្រីសំខាន់ៗដូចជា លោក សុខ ស៊ីផាន់ណា ទីប្រឹក្សារាជរដ្ឋាភិបាលកម្ពុជា ទទួលសញ្ញាបត្រ៥ដាន់ និងលោកបណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា ទទួលបានសញ្ញាបត្រ២ដាន់ និងសម្លៀកបំពាក់កីឡាការ៉ាតេដូ ឯមនុស្ស១៥នាក់ទៀតក៏ទទួលបានផងដែរ ។
លោកបណ្ឌិត ហង់ ជួនណារ៉ុន មានប្រសាសន៍ថា សព្វថ្ងៃនេះវិស័យកីឡាក្នុងប្រទេសកម្ពុជាកំពុងមានការរីកចម្រើនគួរឱ្យកត់សម្គាល់ ជាពិសេសវិស័យកីឡាការា៉តេដូនេះ ជាកីឡាដែលមានភាពពេញនិយមពីសំណាក់ប្រជាជនកម្ពុជាយា៉ងច្រើនទៀតផង ។
លោករដ្ឋមន្ត្រីបានបន្ថែមទៀតថា ដើម្បីធ្វើឱ្យវិស័យកីឡាក្នុងប្រទេសកម្ពុជាកាន់តែមានភាពរីកចម្រើនទាំងបរិមាណ និងគុណភាព លោកសូមផ្តាំផ្ញើដល់គ្រប់សហព័ន្ធកីឡាជាតិទាំងអស់ ត្រូវពង្រឹងសមត្ថភាពអាជ្ញាកណ្តាល ជំរុញឱ្យមានសកម្មភាពប្រកួតឱ្យបានច្រើន, ពង្រឹងរចនាសម្ព័ន្ធគ្រប់គ្រងផ្ទៃក្នុងសហព័ន្ធឬក្លិប ។ បន្ថែមពីនោះត្រូវស្វែងរកដៃគូឧបត្ថម្ភដើម្បីអភិវឌ្ឍន៍វិស័យកីឡាឱ្យមានដំណើរការកាន់តែល្អថែមទៀត ៕
ចែករំលែកព័តមាននេះ