ប្រភពព័ត៌មានមួយពីខេត្តសាឡា ហ៊ីដឌីន រាយការណ៍កាលពីថ្ងៃទី២១ ធ្នូ ថា ពួកយុទ្ធជនក្រុមរដ្ឋអ៊ិស្លាម វាយដណ្តើមកាន់កាប់វិញហើយនូវទីក្រុង Baiji ដែលមានរោងចក្រចម្រាញ់ប្រេងកាតធំជាងគេរបស់អុីរ៉ាក់ដែលទើបរំដោះបាននាពេលថ្មីៗនេះ ដោយកងកម្លាំងសន្តិសុខអីុរ៉ាក់ ។
ប្រភពព័ត៌មាននេះបន្តថា កាលពីរសៀលថ្ងៃទី២០ ធ្នូ យុទ្ធជនក្រុមរដ្ឋអ៊ិស្លាមជាច្រើនសិបនាក់បានវាយប្រហារលើចំណុចជាច្រើនតាមផ្លូវថ្នល់សំខាន់ កាត់ទីក្រុង Baiji ស្ថិតនៅចម្ងាយប្រមាណជា២០០គីឡូម៉ែត្រ ខាងជើងក្រុងបាដាដ ហើយលុកចូលកាន់កាប់ប្លុកអគារនានារបស់រដ្ឋាភិបាល និងរបស់កងកម្លាំងសន្តិសុខ ។ ពួកជ្រុលនិយមក៏ចូលកាន់កាប់រោងចក្រចម្រាញ់ប្រេងកាត ស្ថិតនៅភាគខាងជើងក្រុងនេះដែរ ដោយកងទាហាននិងពួកជីវពលស៊ីអីុត និងស៊ុននីត ជាសម្ព័ន្ធមិត្តបាននាំគ្នាវាយដកថយឆ្ពោះទៅកាន់ភូមិ Al-Mazraa និងភូមិ Al-Malha ភាគខាងត្បូងក្រុង ។
ព្រឹកថ្ងៃទី២១ ធ្នូ ពួកយុទ្ធជនក្រុមរដ្ឋអ៊ិស្លាមបានបាញ់ផ្លោងកាំភ្លើងត្បាល់ជាច្រើនគ្រាប់លើរោងចក្រចម្រាញ់ប្រេងកាត ហើយចាប់ផ្តើមពង្រឹងទីតាំងទាំងឡាយរបស់ពួកគេក្នុងទីក្រុង ដោយដណ្តើមត្រួតត្រាអគារជាច្រើននាភាគកណ្តាលក្រុង ។
កងទ័ពអីុរ៉ាក់យ៉ាងតិច៣កងពលតូច ក្នុងនោះមានកងពលតូចរថពាសដែកផង កាលពីយប់ថ្ងៃទី២០ ធ្នូ បានលើកមកដល់មូលដ្ឋានអាកាសចរណ៍មួយ ស្ថិតនៅចម្ងាយ៣០គីឡូម៉ែត្រ ខាងត្បូងក្រុង Baiji ប្រហែលជាក្នុងបំណងរៀបចំការវាយបកមួយវិញ នាប៉ុន្មានម៉ោង ឬប៉ុន្មានថ្ងៃខាងមុខនោះ ។
អភិបាលខេត្ត លោក Raed Al-Joubouri បានចេញសេចក្តីប្រកាសមួយស្នើដល់រដ្ឋាភិបាលក្រុងបាដាដ ឱ្យជួយធ្វើអន្តរាគមន៍ជាបន្ទាន់ ដើម្បីជួយសង្គ្រោះទីក្រុង Baiji និងកងទាហានដែលកំពុងស្ថិតក្នុងស្ថានភាពដុនដាប ព្រោះតែពួកយុទ្ធជនក្រុមរដ្ឋអ៊ិស្លាម មានអាវុធនិងឧបករណ៍យោធាទំនើបជាងកងទ័ព ។
កងកម្លាំងសន្តិសុខអីុរ៉ាក់ រយៈពេលប្រមាណជា៣សប្តាហ៍ បានធ្វើប្រតិបត្តិការនានាដែលអាចរំដោះទីក្រុង Baiji ហើយបញ្ចប់ការឡោមព័ទ្ធរោងចក្រចម្រាញ់ប្រេងកាត ក្រោយពីវាយបណ្តេញពួករដ្ឋអ៊ិស្លាម ក៏ប៉ុន្តែចាប់តាំងពីពេលនោះមក នៅតែមានការប៉ះទង្គិចគ្នារប៉េះរប៉ោះ ។
ខេត្តសាឡាហ៊ីដឌីន មានពួកស៊ុននីត ភាគច្រើន ហើយមានទីក្រុងទីគ្រីត ជាទីប្រជុំជន ស្ថិតនៅចម្ងាយ ប្រមាណជា១៧០គីឡូម៉ែត្រ ខាងជើងក្រុងបាដាដ ។ នេះជាខេត្តកំណើតរបស់លោក សាដាម ហ៊ូសេន ។ ការវាយដណ្តើមកាន់កាប់ខេត្តនេះ ដោយក្រុមរដ្ឋអ៊ិស្លាម ញ៉ាំងឱ្យមានការចុះដុនដាបខ្លាំងនៃសភាពការណ៍សន្តិសុខក្នុងប្រទេសអីុរ៉ាក់ ចាប់តាំងពីថ្ងៃទី១០ មិថុនា ពេលជម្លោះយ៉ាងបង្ហូរឈាមផ្ទុះឡើងរវាងកងកម្លាំងសន្តិសុខអីុរ៉ាក់ និងពួករដ្ឋអ៊ិស្លាម ដែលដណ្តើមត្រួតត្រាទីក្រុងម៉ូសស៊ុល បន្ទាប់មកវាតកាន់កាប់ទឹកដីយ៉ាងធំនៃខេត្តនីនីវ និងខេត្តឯទៀតៗមានពួកស៊ុននីត ភាគច្រើន ៕
ចែករំលែកព័តមាននេះ