ខេត្តបន្ទាយមានជ័យ ៖ ហាងលក់បាយ១កន្លែងត្រូវបានអគ្គិភ័យឆាបឆេះបង្កឲ្យមានការភ្ញាក់ផ្អើល នៅម៉ោង៣និង៣០នាទីរសៀល ថ្ងៃទី២១ ធ្នូ ២០១៤ នៅចំណុចស្ពានទី១ អាងទឹកត្រពាំងថ្ម ស្ថិតក្នុងភូមិត្រពាំងថ្ម ឃុំប៉ោយចារ ស្រុកភ្នំស្រុក ។
បើតាមនគរបាលស្រុកភ្នំស្រុកបានឲ្យដឹងនៅព្រឹកថ្ងៃទី២២ ធ្នូ ២០១៤ នេះថា ហាងលក់បាយមានម្ចាស់ឈ្មោះនួន ជិត ភេទប្រុស អាយុ៤២ឆ្នាំ នៅភូមិត្រពាំថ្មត្បូង ឃុំប៉ោយចារ ស្រុកភ្នំស្រុក ។ នៅពេលកើតមានភ្លើងឆាបឆេះត្រូវបានកម្លាំងនគរបាល និងប្រជាពលរដ្ឋបានជួយធ្វើអន្តរាគមន៍ពន្លត់ ដោយនាំគ្នារើស្បូវ និងដងទឹកអាងជះ ទើបរលត់វិញ មិនបានរាលដាលទៅហាងផ្សេងៗដែលមានហាងតភ្ជាប់គ្នាមិនតិចជាង៥ទៅ៦ហាងនោះទេ។
ប្រភពដដែលបានបញ្ជាក់ថា តាមការស្រាវជ្រាវ និងពិនិត្យមូលហេតុដែលបង្កឲ្យមានអគ្គិភ័យនេះ បណ្តាលមកពីភ្លើងចង្ក្រាន ម្យ៉ាងហាងលក់បាយនៅទីនោះ គឺច្រើនធ្វើអំពីស្បូវ ជាមួយគ្នានេះដែរ រដូវនេះជារដូវរំហើយងាយស្រួលនឹងកើតមានអគ្គិភ័យ ប្រសិនណាបើមានការឆ្វេសប្រហែសចំពោះភ្លើងចង្ក្រាន ៕
ចែករំលែកព័តមាននេះ