រាជធានីភ្នំពេញ៖ យោងតាមសេចក្តីប្រកាសព័ត៌មានរបស់នាយកដ្ឋានព័ត៌មាន អគ្គយោធសេវានៃក្រសួងការពារជាតិចេញផ្សាយកាលពីព្រឹកថ្ងៃទី២២ ធ្នូ ២០១៤ បានឲ្យដឹងថា នាយកដ្ឋានព័ត៌មានសូមជម្រាបជូនដំណឹងដល់សាធារណជនជាតិ និងអន្តរជាតិឲ្យបានជ្រាបថា តបតាមការអញ្ជើញរបស់ក្រសួងការពារជាតិនៃព្រះរាជាណាចក្រកម្ពុជា លោកនាយឧត្តមសេនីយ៍ ប្រាវីត វង្សសុវណ្ណ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនៃព្រះរាជាណាចក្រថៃនឹងដឹកនាំគណៈប្រតិភូយោធាជាន់ខ្ពស់នៃកងទ័ពភូមិន្ទថៃមកបំពេញទស្សកិច្ចផ្លូវការនៅព្រះរាជាណាចក្រកម្ពុជាពីថ្ងៃទី២៤ដល់ថ្ងៃទី២៥ ធ្នូ ២០១៤ ក្នុងគោលបំណងពង្រឹងនិងពង្រីកកិច្ចសហប្រតិបត្តិការ និងមិត្តភាពវិស័យយោធារវាងកងទ័ពនៃប្រទេសទាំងពីរកម្ពុជា-ថៃ។
សេចក្តីប្រកាសព័ត៌មានរបស់ក្រសួងការពារជាតិបានបញ្ជាក់ថា ក្នុងឱកាសនោះដែរលោកនាយឧត្តមសេនីយ៍ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនៃព្រះរាជាណាចក្រកម្ពុជា និងជាសហប្រធានគណៈកម្មាធិការព្រំដែនកម្ពុជា-ថៃ និងលោកនាយឧត្តមសេនីយ៍ ប្រាវីត វង្សសុវណ្ណ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនៃព្រះរាជាណាចក្រថៃ និងជាសហប្រធានគណៈកម្មាធិការព្រំដែនថៃ-កម្ពុជានឹងជួបពិភាក្សា និងចុះហត្ថលេខាលើកិច្ចព្រមព្រៀងនៃកិច្ចប្រជុំគណៈកម្មាធិការព្រំដែនទូទៅ(GBC)លើកទី១០រវាងកម្ពុជា-ថៃ។
កិច្ចប្រជុំគណៈកម្មាធិការព្រំដែនទូទៅ(GBC)លើកទី១០នេះធ្វើឡើងដើម្បីពង្រឹងកិច្ចសហប្រតិបត្តិការបន្ថែមទៀតក្នុងបរិបទលើកកម្ពស់សន្តិភាព សន្តិសុខនៅតាមតំបន់ព្រំដែន ព្រមទាំងការជម្រុញឲ្យអាជ្ញាធរ និងគណៈកម្មាធិការពាក់ព័ន្ធ អនុវត្តលទ្ធផលនៃកិច្ចព្រមព្រៀងឲ្យមានប្រសិទ្ធិភាពខ្ពស់។ ក្នុងកំឡុងពេលទស្សនកិច្ចនេះដែរ គណៈប្រតិភូយោធាថៃដឹកនាំដោយលោកនាយឧត្តមសេនីយ៍ ប្រាវីត វង្សសុវណ្ណ ត្រូវបានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាអនុញ្ញាតឲ្យចូលជួបសំដែងការគួរសមនៅថ្ងៃទី២៥ ធ្នូ នៅឯវិមានសន្តិភាពមុនពេលធ្វើមាតុភូមិនិវត្តន៍ទៅកាន់ប្រទេសថៃវិញ៕
ចែករំលែកព័តមាននេះ