ការស្រាវជ្រាវថ្មីមួយរបស់ក្រុមអ្នកស្រាវជ្រាវសាកលវិទ្យាល័យកាលីហ្វ័រញ៉ា ទីក្រុងសាន់ហ្វ្រានស៊ីស្កូ សហរដ្ឋអាមេរិកបង្ហាញថា ទទួលទានជាប្រចាំបណ្តាភេសជ្ជៈផ្អែមៗជាកំប៉ុងឬដបអាចបង្កើនល្បឿននៃភាពចាស់ជ្រីវជ្រួញយ៉ាងរហ័សដូច ការជក់បារីបន្តកន្ទុយដែរ ។ ក្រុមអ្នកស្រាវជ្រាវបានរកឃើញថា ការបំផ្លាញទៅលើសុខភាពរបស់បណ្តាភេសជ្ជៈមានដូចជា បណ្តាលឱ្យធាត់លើសទម្ងន់ និងបង្កើនល្បឿនចាស់ជរាដល់បណ្តាកោសិកា ។ ពួកគេបន្តថា ការទទួលទានមួយថ្ងៃ២កំប៉ុង នឹងធ្វើឱ្យកោសិកាDNA ផ្លាស់ប្តូរដោយចាស់ជាងមុន៤,៦ឆ្នាំ ។
គួររំលឹកថា ការសិក្សាកន្លងមកគឺពិនិត្យមើលតែលើផលប៉ះពាល់ហានិភ័យធាត់លើសទម្ងន់និងជំងឺទឹកនោមផ្អែមប្រភេទ-២ប៉ុណ្ណោះទេ ។ ដូច្នេះ នេះជាការសិក្សាលើកដំបូងដែលពិនិត្យមើលផលប៉ះពាល់នៃភាពឆាប់ចាស់មុនអាយុ ។
ការវិភាគលើសំណាក DNAរបស់មនុស្សរាប់ពាន់នាក់រកឃើញថា បុគ្គលដែលនិយមទទួលទានបណ្តាភេសជ្ជៈពពុះ Telomeresមានប្រវែងខ្លីទៅៗ ។ Telomeresជារចនាសម្ព័ន្ធដ៏តូចបំផុតជួយការពារ DNAពីការបំផ្លាញ និងជាភ្នាក់ងារវាស់សុខភាព ។ វាស្ថិតនៅចុងនៃក្រូម៉ូសូម ។
ខណៈបុគ្គលណាម្នាក់មានវ័យកាន់តែចាស់ទៅ ប្រវែង Telomeresរបស់គេក៏ចេះតែរួញខ្លីផងដែរ នាំឱ្យ DNAត្រូវបានបំផ្លាញ ។ ស្របពេលជាមួយគ្នានោះ ហានិភ័យកើតមានជំងឺផ្សេងៗពាក់ព័ន្ធនឹងអាយុ តួយ៉ាងដូចជា ជំងឺទឹកនោមផ្អែម ជំងឺបេះដូងនិងជំងឺភ្លេចភ្លាំងបានកើតឡើង ។ បណ្តាបុគ្គលដែល Telomeresមានប្រវែងខ្លីខ្លាំងពេកគឺជាសញ្ញាប្រកាសអាសន្នបញ្ហាសុខភាព ក៏ដូចជា ការស្លាប់មុនអាយុ ។
សាស្ត្រាចារ្យ Elissa Epelថ្លែងថា៖«ការទទួលទានភេសជ្ជៈពពុះផ្អែមដោយស្ករទៀងទាត់អាចបង្កើនឥទ្ធិពលកើតមានជំងឺមួយចំនួន ហើយវាមិនត្រឹមតែធ្វើឱ្យមានសម្ពាធលើការគ្រប់គ្រងការរំលាយសារធាតុស្កររបស់រាងកាយប៉ុណ្ណោះទេ តែថែមទាំងបង្កើនឱកាសឆាប់ងាប់របស់ជាលិកាទៀតផង ។ វាជារបកគំហើញដំបូងដែលថា ភេសជ្ជៈពពុះផ្អែមដោយស្ករជាប់ពាក់ព័ន្ធនឹងបុព្វហេតុនាំឱ្យ Telomeresរួញខ្លី។ ការជាប់ពាក់ព័ន្ធនេះមិនគិតលើអាយុ ជាតិសាសន៍ កម្រិតប្រាក់ចំណូលក៏ដូចជា ការអប់រំនោះទេ »៕
ចែករំលែកព័តមាននេះ