រាជធានីភ្នំពេញ ៖ តាមរយៈស្ថិតិនៃអង្គការសុខភាពពិភពលោក(WHO)បង្ហាញថា ចំនួនអ្នកកើតជំងឺមហារីកប្លោកនោមក្នុងមួយឆ្នាំមាន៩នាក់ក្នុងចំណោមមនុស្ស១សែននាក់ចំពោះមនុស្សប្រុស និង២នាក់ក្នុងចំណោមមនុស្ស១សែននាក់ចំពោះស្ត្រី ហើយមនុស្ស៥០ភាគរយនៃជំងឺនេះបណ្តាលមកពីការជក់បារី ។ នេះគឺជាប្រសាសន៍របស់លោកវេជ្ជបណ្ឌិតអ៊ុក ពិសី គ្រូពេទ្យផ្នែកវះកាត់ជំងឺមហារីកប្រព័ន្ធផ្លូវបង្ហូរទឹកនោម ក្នុងសន្និសីទសារព័ត៌មាន កាលពីល្ងាចថ្ងៃទី១២ ធ្នូ កន្លងទៅ នៅមន្ទីរពេទ្យកាល់ម៉ែត ។
លោកវេជ្ជបណ្ឌិតអ៊ុក ពិសី បានថ្លែងថា ចំពោះរោគសញ្ញានៃជំងឺមហារីកប្រព័ន្ធផ្លូវបង្ហូរទឹកនោមវាអាចស្តែងចេញជាច្រើន តែគេជួបប្រទះភាគច្រើនគឺមនុស្សយើងពេលណាបត់ជើងតូចមានលាយឈាមមកជាមួយនឹងទឹកនោមនោះបង្ហាញថា ជារោគសញ្ញាមួយដែលត្រូវអ្នកជំងឺទៅជួបគ្រូពេទ្យឯកទេសមហារីកប្រព័ន្ធផ្លូវបង្ហូរនោមនៅមន្ទីរពេទ្យកាល់ម៉ែត ។ ហើយគ្រូពេទ្យឯកទេសធ្វើការវិភាគសួរនាំអំពីស្ថានភាពជំងឺ និងសួរនាំអំពីកត្តាប្រឈម អាការរោគផ្សេងៗទៀតដែលទាក់ទងទៅនឹងរោគសញ្ញានៃការនោមឈាម ។ អាការរោគដទៃទៀតដែលកើតឡើងជាមួយនឹងការនោមឈាមដូចជាឈឺចាប់នៅផ្នែកខាងក្រោមពោះ ឬផ្នែកខាងលើថ្ងាសដែលជារោគសញ្ញានៃការរលាកប្លោកនោមជាពិសេសគេអាចសង្ស័យទៅលើអ្នកជំងឺដែលមានរោគសញ្ញានៃការរលាកប្លោកនោមរុាំរ៉ៃដែលមិនអាចជាសះស្បើយតាមរយៈការព្យាបាលធម្មតាបានទេ ។
អ្នកជំងឺមានរោគសញ្ញារលាកប្លោកនោមនោះគឺ ៖
១-អ្នកជំងឺនោមញឹក
២-អ្នកជំងឺមានអារម្មណ៍ថា ពេលនោមហើយមួយដងលុះមួយសន្ទុះក្រោយមកមានអារម្មណ៍ចង់ទៅនោមម្តងទៀត ។ អ្នកជំងឺមានអាការឈឺនៅផ្នែកខាងក្រោមពោះ ឬនៅលើថ្ងាសឈឺចាប់នៅចង្កេះទាំងសងខាង ឬមួយចំហៀង ។ជំងឺមហារីកប្រព័ន្ធផ្លូវបង្ហូរនោមកើតឡើងនៅផ្នែកណាមួយនៃប្រព័ន្ធផ្លូវបង្ហូរទឹកនោមវានឹងធ្វើឲ្យស្ទះចាល់ទឹកនោមនៅផ្នែកខាងលើនៃប្រព័ន្ធបង្ហូរនោម ។ ការជក់បារីមានផលប៉ះពាល់យ៉ាងខ្លាំងហើយប្រឈមយ៉ាងសំខាន់មួយនៃជំងឺមហារីកប្រព័ន្ធបង្ហូរនោម ។
លោកវេជ្ជបណ្ឌិតអ៊ុក ពិសី បានបញ្ជាក់ថា បច្ចុប្បន្ននៅមន្ទីរពេទ្យកាល់ម៉ែតមានគ្រូពេទ្យជំនាញឯកទេសពិនិត្យអ្នកជំងឺមហារីកប្រព័ន្ធផ្លូវបង្ហូរនោមនិងមានឧបករណ៍បច្ចេកទេសដើម្បីធ្វើរោគវិនិច្ឆ័យដូចជា ៖
-ពិនិត្យទឹកនោមដែលមានលាយឈាមរកកោសិកាមហារីក
-ការឆ្លុះអេកូ(echo graphite) ឬថតScannerនៃប្រព័ន្ធបង្ហូរនោម(Uro-scanner)
-ការឆ្លុះទៅក្នុងប្លោកនោមដោយប្រើCystoscope
-ការឆ្លុះទៅក្នុងបំពង់បង្ហូរនោមឬតម្រងនោមដោយប្រើUreteorenoscope souple ការព្យាបាលដោយការវះកាត់សាច់មហារីកនៅក្នុងប្លោកនោមជាមួយឧបករណ៍ឆ្លុះCystoscope ឬការដុតសាច់មហារីកនៅក្នុងបំពង់បង្ហូរនោមនិងក្នុងតម្រងនោមដោយការប្រើកាំរស្មីLaser រួមជាមួយឧបរណ៍Ureterorenoscope Souple។ ហើយមន្ទីរពេទ្យកាល់ម៉ែតកន្លងមកបានធ្វើការវះកាត់ប្រហែល២០ភាគរយទៅ៣០ភាគរយលើអ្នកជំងឺដែលធ្វើរោគវិនិច្ឆ័យឃើញថា មានជំងឺមហារីកផ្លូវបង្ហូរនោម ។ មូលហេតុឈានដល់ការកើតជំងឺមហារីកផ្លូវបង្ហូរនោមមានកត្តាជាច្រើនក្នុងនោះមាន ៖
-៥០%បណ្តាលមកពីការជក់បារី
-១០%បណ្តាលមកពីការប្រឈមមុខក្នុងការងារនៃឧស្សាហកម្មផលិតថ្នាំពណ៌ ថ្នាំលាប ផលិតដែក និងប្រេងឥន្ធនៈ
-ការរលាករុាំរ៉ៃនៃប្លោកនោមបណ្តាលមកពីសត្វល្អិត(Schistosomiase)
-ការប្រឈមមុខនឹងកាំរស្មី(Radiation)។
នាឱកាសនោះដែរលោកវេជ្ជបណ្ឌិតអ៊ុក ពិសី ក៏បានសំណូមពរថា បើអ្នកជំងឺមានរោគសញ្ញាដូចដែលបានរៀបរាប់ខាងលើអ្នកជំងឺអាចមកជួបជាមួយគ្រូពេទ្យឯកទេសនិងមានជំនាញច្បាស់លាស់ផ្នែកប្រព័ន្ធបង្ហូរនោមហើយគ្រូពេទ្យខាងប្រព័ន្ធបង្ហូរទឹកនោមអាចធ្វើរោគវិនិច្ឆ័យបានទាន់ពេលវេលានៅពេលដែលអ្នកជំងឺនៅស្រាលនិងរកវិធីសាស្ត្រដ៏សមស្របដែលអាចព្យាបាលបានទាន់ពេលវេលា ៕
ចែករំលែកព័តមាននេះ