រាជធានីភ្នំពេញ ៖ លោក រៀល ខេមរិន្ទ្រ អ្នកតំណាងរាស្ត្រគណបក្សសង្គ្រោះជាតិមណ្ឌលស្វាយរៀង បានក្លាយទៅជាអនាគតកូនកម្លោះក្នុងពិធីភ្ជាប់ពាក្យអធឹកអធមជាមួយអ្នកស្រី យ៉ោម បុប្ផា អ្នកដឹកនាំការតវ៉ាដីធ្លីប្រចាំតំបន់បឹងកក់ ដែលទើបត្រូវបានលែងលះជាមួយប្តីដាច់ស្រេចហើយ និងរស់នៅក្នុងនាមជាអ្នកមេម៉ាយកូនមួយ ។ ពិធីភ្ជាប់ពាក្យនេះ បានធ្វើឱ្យមានការភ្ញាក់ផ្អើលផងដែរ ដែលស្ត្រីសកម្មជនដីធ្លីល្បីឈ្មោះម្នាក់កំពុងស្ថិតនៅក្នុងការប្រកាន់ជំហរតវ៉ា ដើម្បីឱ្យមានការដោះលែងអ្នកដែលត្រូវចាប់ខ្លួនចំនួន១៨នាក់ ដែលក្នុងនោះមេដឹកនាំដ៏មុតស្រួចម្នាក់ គឺអ្នកស្រី ទេព វន្នី ជាដៃគូដែលកំពុងស្ថិតនៅក្នុងពន្ធនាគារព្រៃស រួមជាមួយសកម្មជនជាច្រើនទៀត ។
អនាគតកូនកម្លោះលោក រៀល ខេមរិន្ទ្រ ក៏ជាបុរសពោះម៉ាយផងដែរ នឹងដឹកដៃអ្នកស្រី យ៉ោម បុប្ផា ចូលរោងការដែលនឹងកំណត់នៅក្នុងខែមករា ឆ្នាំ២០១៥ខាងមុខនេះ ។ ប្រការដែលត្រូវបានគេចាប់អារម្មណ៍ផងដែរនោះ គឺការចារិកអក្សរតុបតែងលម្អនៅក្នុងគេហដ្ឋានអ្នកស្រី ក្នុងតំបន់បឹងកក់ បានសរសេរយ៉ាងច្បាស់ស្របទៅតាមគូដណ្តឹងជាឯកឧត្តម អ្នកស្រី យ៉ោម បុប្ផា ក៏បានក្លាយខ្លួនជាលោកជំទាវដែរ ។ ការក្លាយខ្លួនជាលោកជំទាវតែមួយប៉ព្រិចភ្នែកនេះ ពិតណាស់គួរឱ្យចាប់អារម្មណ៍បំផុតដែរ ។ ភាពឧទ្យារិកនៃពិធីភ្ជាប់ពាក្យនេះ មានភ្ញៀវសំខាន់ៗមួយចំនួនចូលរួមផងដែរ ដូចជាលោក ម៉ម សូណង់ដូ និងក្រុមសង្គមស៊ីវិលជាច្រើនរូបទៀត ។
អ្នកស្រី យ៉ោម បុប្ផា មានអាយុ៣៤ឆ្នាំហើយបានលែងលះប្តីក្នុងហេតុផលរស់នៅមិនចុះសម្រុងគ្នា បន្ទាប់ពីអ្នកស្រីត្រូវបានចេញពីពន្ធនាគារកាលពីថ្ងៃទី២២ វិច្ឆិកា ឆ្នាំ២០១៣។ អ្នកស្រី យ៉ោម បុប្ផា ត្រូវបានចាប់ខ្លួនកាលពីថ្ងៃទី៤ កញ្ញា ឆ្នាំ២០១២ ក្រោមបទចោទប្រកាន់ពីបទបង្ករបួសស្នាមដល់អ្នករត់ម៉ូតូឌុប ហើយត្រូវបានតុលាការកាត់ទោសឱ្យជាប់ពន្ធនាគាររយៈពេល២ឆ្នាំ ។ ក្រោយពេលចេញពីពន្ធនាគារ បន្ទាប់ពីទទួលទោសជាយូរខែមកអ្នកស្រី យ៉ោម បុប្ផា រួមជាមួយដៃគូអ្នកស្រី ទេព វន្នី ក៏បានសកម្មក្នុងការដឹកនាំធ្វើសកម្មភាពតវ៉ាជាហូរហែ ។ អ្នកស្រី យ៉ោម បុប្ផា ត្រូវបានលើកទឹកចិត្តនៅឯបរទេសដោយបានផ្តល់នូវពានរង្វាន់ឈានមុខក្នុងការតស៊ូមតិដោយអហិង្សា ។
ដោយទ្បែក អនាគតស្វាមីលោក រៀល ខេមរិន្ទ្រ មានអាយុ៥៦ឆ្នាំហើយ ។ លោក ខេមរិន្ទ្រ បានចូលរួមក្នុងបក្សសម រង្ស៊ី តាំងពីឆ្នាំ១៩៩៨ តាំងពីលោករស់នៅអូស្ត្រាលីជាមួយអតីតភរិយានិងកូន ដែលបច្ចុប្បន្នលោកបានលែងលះប្រពន្ធរួចហើយ និងរស់នៅជាបុរសពោះម៉ាយ ។ លោក រៀល ខេមរិន្ទ្រ និយាយថា ការស្រទ្បាញ់អ្នកស្រី យ៉ោម បុប្ផា គឺផ្តើមចេញពីការអាណិតពេលឃើញសកម្មភាពតស៊ូរបស់អ្នកស្រី ។ ជាមួយនឹងការរៀបចំពិធីភ្ជាប់ពាក្យនេះ បានធ្វើឱ្យមានមតិចម្រុះនៅក្នុងបណ្តាញសង្គមហ្វេសប៊ុក ដែលអ្នកខ្លះក៏សាទរ និងខ្លះទៀតក៏រិះគន់ទៅតាមការយល់ឃើញរបស់ខ្លួន និងខ្លះបានចោទសួរថា នៅពេលអ្នកស្រី យ៉ោម បុប្ផា ក្លាយទៅជាលោកជំទាវនោះ តើអាចនឹងដឹកនាំការតវ៉ាពីបញ្ហាដីធ្លី ឬការតវ៉ាផ្សេងៗទៀតដូចមុនដែរឬទេ ។ ទោះបីជាបែបណា បញ្ហាសេ្នហានេះជាក្រឹត្យក្រុមធម្មជាតិ វាគ្មានអ្វីដែលចម្លែកនោះទេ គឺឱ្យតែព្រមព្រៀងគ្នា គឺជាគូព្រេងហើយកុំឆ្ងល់ ។
គួរកត់សម្គាល់ថា ជាច្រើនដងដែលសកម្មជនដីធ្លី នៅតំបន់បឹងកក់ធ្វើបាតុកម្មតវ៉ាម្តងៗ គេឃើញអ្នកតវ៉ាលេចធ្លោជាងគេនោះ គឺអ្នកស្រី ទេព វន្នី និងអ្នកស្រី យ៉ោម បុប្ផា ។ លេចធ្លោនិងគួរឱ្យចាប់អារម្មណ៍ជាងគេនោះ ដោយសារតែពួកគេមើលឃើញថា ជាស្រីស្អាត ។ សូម្បីនគរបាលសណ្តាប់ធ្នាប់ ឬកងអន្តរាគមន៍ដែលមានភារកិច្ចរារាំងក្រុមអ្នកធ្វើបាតុកម្ម ដែលដឹកនាំដោយអ្នកស្រី ទេព វន្នី និងអ្នកស្រី យ៉ោម បុប្ផា តាមអ្នកសារព័ត៌មានកត់សម្គាល់ ក៏ឃើញសមត្ថកិច្ចមិនហ៊ានប្រើដៃធ្ងន់ដាក់ដែរ មិនហ៊ានច្រានខ្លាំងៗពេកទេ ហាក់ដូចយល់ដល់ស្រីស្អាត។
ក្រុមអ្នកថតរូបសារព័ត៌មាន ពេលជួបជុំគ្នាម្តងនោះ និយាយថា អ្នកស្រី យ៉ោម បុប្ផា «រាងឆ្អឹង» មែន ប៉ុន្តែស្អាតម្យ៉ាង ។ ចំណែកអ្នកស្រី ទេព វន្នី «រាងសាច់» បន្តិច ហើយក៏ស្អាតម្យ៉ាងដែរ ។ ពួកគេឱ្យឈ្មោះថា ស្រីស្អាតប្រចាំបឹងកក់ ។ ខុសគ្នាច្រើនដែរ ព្រោះអ្នកស្រី ទេព វន្នី មានប្តីមានគ្រួសារ ទំនងរឹងមាំណាស់ ប្រសិនបើមេម៉ាយដូចអ្នកស្រី យ៉ោម បុប្ផា ក៏ទំនងនៅមិនយូរដែរ ។ យ៉ាងណាក៏ដោយ កោះសន្តិភាពសូមចូលរួមអបអរសាទរចំពោះលោកជំទាវ យ៉ោម បុប្ផា និងឯកឧត្តមជាស្វាមី សូមប្រសិទ្ធពរជ័យមានសិរីមង្គល វិបុលសុខគ្រប់ប្រការកុំបីឃ្លៀងឃ្លាតទ្បើយ ៕
ចែករំលែកព័តមាននេះ