កីឡាការិនីវាយកូនបាល់រុស្ស៊ីវេរ៉ា ហ្សូណារេវ៉ា នឹងបង្ហាញខ្លួនសាជាថ្មីក្នុងវិស័យកីឡាវាយកូនបាល់ក្រោយពីបានខកខានអស់ជាច្រើនខែ។ កីឡាការិនីវ័យ៣០ឆ្នាំរូបនេះ នឹងចូលរួមក្នុងព្រឹត្តិការណ៍មានទឹកប្រាក់រង្វាន់១ម៉ឺនដុល្លាររបស់សហព័ន្ធកីឡាវាយកូនបាល់អន្តរជាតិនាទីក្រុងហុងកុងថ្ងៃទី២៩ ខែនេះ ។ បើគិតពីការបរាជ័យក្នុងជុំទី៣ ក្របខ័ណ្ឌ Wimbledon ខែកក្កដា នេះជាការប្រកួតលើកដំបូងរបស់នាងហើយ ។
ហ្សូណារេវ៉ា ដែលធ្លាប់ឈានចូលដល់វគ្គផ្តាច់ព្រ័ត្រក្របខ័ណ្ឌធំពីរលើកបន្តបន្ទាប់គ្នាក្នុងឆ្នាំ២០១០ បានជួបការរំខានដោយបញ្ហារបួសស្ទើរពេញមួយរដូវកាល ។ របួសស្មាស្តាំ និងជំងឺបាននាំឱ្យនាងបាត់មុខពីទីលានប្រកួតអស់១៨ខែ ។ យ៉ាងណាក៏ដោយ អវត្តមានរបស់នាងត្រូវបានបញ្ចប់ទាំងស្រុងនៅខែមករាឆ្នាំនេះនៅពេលនាងបង្ហាញមុខក្នុងកម្មវិធី Shenzhen Open នៅប្រទេសចិន ។ នៅទីនោះ អតីតកីឡាការិនីលំដាប់ទី២ ពិភពលោករូបនេះបានបរាជ័យក្រោមថ្វីដៃនាងលីណា ២សិតផ្ទួនៗ ។
កាលពីឆ្នាំ២០១២ ហ្សូណារេវ៉ា ធ្លាប់បានខកខានព្រឹត្តិការណ៍ធំចំនួន២ គឺ French Open និង U.S. Open ។ ក្រោយពីបានជួបនឹងសំណាងអាក្រក់ក្នុងឆ្នាំដោយការបរាជ័យក្នុងជុំទី៣ នៃក្របខ័ណ្ឌ French Open និង Wimbledon នាងក៏បានធ្លាក់ដាំក្បាលពីលេខ២ មកលេខ៤៩ លើតារាងចំណាត់ថ្នាក់ពិភពលោក ។ រហូតមកទល់នឹងពេលនេះ នាងមិនទាន់បានយកឈ្នះពានជើងឯកឯកក្តជនក្របខ័ណ្ឌធំណាមួយនោះទេ ។
នាងបានថ្លែងថា ៖ «ខ្ញុំចាប់ផ្តើមលេងម្តងទៀតនៅឆ្នាំនេះ ។ ប៉ុន្តែជាសំណាងអាក្រក់ បញ្ហាដដែលបានកើតមានជាថ្មីម្តងទៀត ។ របួសស្មាស្តាំបានបង្ខំឱ្យខ្ញុំផ្អាកការប្រកួត និងវះកាត់ជាបន្ទាន់ ។ ដូច្នេះ វាគ្មានហេតុផលណាមួយដែលត្រូវប្រញាប់ប្រញាល់វិលទៅប្រកួតខណៈរបួសមិនទាន់ជាសះស្បើយនោះទេ» ៕
ចែករំលែកព័តមាននេះ