ជាការឆ្លើយតបទៅនឹងសំណូមពររបស់កីឡាករ/កីឡាការិនី សមាគមកីឡាវាយកូនបាល់អូស្ត្រាលី (TA) កាលពីពេលថ្មីៗនេះបានសម្រេចបង្កើនការចំណាយទៅលើក្របខ័ណ្ឌធំ Australian Open ឆ្នាំ២០១៥ ។
កីឡាករ/កីឡាការិនីដែលដណ្តើមបានជើងឯកឯកត្តជន Australian Open ឆ្នាំ២០១៥នឹងទទួលបានទឹកប្រាក់៣លានដុល្លារ ខណៈអ្នកធ្លាក់ក្នុងជុំទី១ ទទួលបាន២៧.៦០០ដុល្លារ បើធៀបទៅនឹងឆ្នាំចាស់កើន៣២,៧ភាគរយ ។ ចំណែកអ្នកធ្លាក់ក្នុងជុំទី២ ទទួលបាន៤៥.៥០០ដុល្លារ កើន៣៦,៦ភាគរយ ឯអ្នកធ្លាក់ក្នុងជុំទី៣ ទទួលបាន៧១.០០០ដុល្លារ ធៀបទៅនឹងឆ្នាំចាស់ គឺកើន៣០ភាគរយ ។
ទឹកប្រាក់សម្រាប់អ្នកធ្លាក់ក្នុងជុំទី៤ ក្នុងវគ្គ១/៤ផ្តាច់ព្រ័ត្រ និងវគ្គពាក់កណ្តាលផ្តាច់ព្រ័ត្រ ក៏ត្រូវបានបង្កើនជាង១៤ភាគរយផងដែរ ។
សរុបទឹកប្រាក់រង្វាន់ឆ្នាំ២០១៥ គឺ៣៦,៣លានដុល្លារ ។ ចំនួនទឹកប្រាក់នេះធៀបនឹងឆ្នាំកន្លងទៅ គឺកើន១០ភាគរយ ។ គេរំពឹងថា ការប្រកួតឆ្នាំ២០១៥ នឹងរឹតតែល្អប្រសើរជាងឆ្នាំនេះខណៈទីលានប្រកួតទំនើបថ្មីមួយតម្លៃរាប់លានដុល្លារឈ្មោះ Margaret Court Arena ត្រូវបានសាងសង់រួចរាល់ ។
ឯតម្លៃសំបុត្រទស្សនាសម្រាប់៨ថ្ងៃដំបូងនៅទីលានប្រក់ដំបូលថ្មីខាងលើ គឺ៦០ដុល្លារក្នុងមួយថ្ងៃ ។ យ៉ាងណាក៏ដោយ គេអាចរកទិញសំបុត្រចូលទស្សនាការប្រកួតវគ្គផ្តាច់ព្រ័ត្រក្នុងតម្លៃចាប់ពី១ដុល្លារដល់២៩០ដុល្លារ និង៣៩០ ដុល្លារ ។
សូមបញ្ជាក់ថា Australian Open ឆ្នាំ២០១៥ នឹងចាប់ផ្តើមនៅថ្ងៃទី១៩ ខែមករា ដល់ថ្ងៃទី១ ខែកុម្ភៈ នៅទីលាន Melbourne Park ក្រុង Melbourne ប្រទេសអូស្ត្រាលី ៕
ចែករំលែកព័តមាននេះ