សហរដ្ឋអាមេរិក កាលពីថ្ងៃទី២០ ធ្នូ បានស្នើដល់ប្រទេសចិន ឱ្យជួយខ្លួន រាំងខ្ទប់ការវាយប្រហារប្រព័ន្ធព័ត៌មានវិទ្យា (Cyber-Attaques) មកពីកូរ៉េខាងជើង ជាការឆ្លើយតបចំពោះការវាយប្រហារបែបនេះ ដែលក្រុមហ៊ុន Sony Pictures រងគ្រោះកាលពីខែវិច្ឆិកា ។
អ្នកទទួលខុសត្រូវជាន់ខ្ពស់អាមេរិកម្នាក់ និយាយថា យើងបានពិភាក្សាពីលទ្ធភាពនោះជាមួយចិន ដើម្បីផ្លាស់ប្តូរព័ត៌មានគ្នា ហើយយើងសម្តែងពីការព្រួយបារម្ភ រួចក្រោយការវាយប្រហារនេះ យើងស្នើឱ្យចិនរួមសហការគ្នា ។
កាលពីថ្ងៃទី១៧ ធ្នូ កន្លងមកនេះ ក្រុមហ៊ុន Sony Pictures ក្រោយការគំរាមកំហែងវាយប្រហារខាងព័ត៌មានវិទ្យា បានលុបចោលការចេញផ្សាយសម្រាប់បុណ្យណូអែល នូវខ្សែភាពយន្តរឿង The Interview ជារឿងកំប្លែងមួយអំពីការរួមគំនិតរបស់ CIA ដើម្បីសម្លាប់មេដឹកនាំកូរ៉េខាងជើង លោក គីម ជុងអ៊ុន ។ រដ្ឋាភិបាលអាមេរិក បានចោទក្រុងព្យុងយ៉ាងថា ជាអ្នកវាយប្រហារប្រព័ន្ធព័ត៌មានវិទ្យានោះ ។
ការចោទប្រកាន់នេះត្រូវបានអាជ្ញាធរកូរ៉េខាងជើងបន្តបដិសេធ ។ កាលពីថ្ងៃទី២០ ធ្នូ អាជ្ញាធរប្រទេសនេះ ស្នើដល់សហរដ្ឋអាមេរិកឱ្យធ្វើការសុើបអង្កេតរួមគ្នាលើការវាយប្រហារនោះ ។ ក្រសួងការបរទេសកូរ៉េខាងជើង ថ្លែងថា មិនចាំបាច់រហូតដល់ប្រើទារុណកម្មដែល CIA អាមេរិកបានធ្វើ យើងមានមធ្យោបាយនានាដែលបង្ហាញថាយើងពុំមានជាប់ទាក់ទិនអ្វីទាំងអស់ជាមួយឧប្បត្តិហេតុនេះ ។
ចំណែកកាសែតចិន Global Times នាថ្ងៃដដែលនោះដែរ ចាត់ទុកខ្សែភាពយន្តរឿង The Interview ថា «ជារឿងក្រអឺតក្រទមខាងវប្បធម៌មិនទំនង» មួយ ។ កាសែតនោះរបស់ចិន និយាយថា ពួកអ្នកផលិតខ្សែភាពយន្តអាមេរិក ពិតជាយល់ច្រឡំដែលខិតខំចំអក មេដឹកនាំកូរ៉េខាងជើង លោក គីម ជុងអ៊ុន ។
ការវាយប្រហារលើកនេះ ជាការវាយប្រហារធំបំផុតមួយដែលពុំធ្លាប់ជួបប្រទះ ប្រឆាំងសហគ្រាសអាមេរិកមួយ ដោយបំផ្លាញប្រព័ន្ធព័ត៌មានវិទ្យារបស់ក្រុមហ៊ុន Sony Pictures ៕
ចែករំលែកព័តមាននេះ