ខេត្តកណ្តាល ៖ ម៉តូពីរគ្រឿង បើកលឿនបញ្ច្រាសទិសគ្នាបុកគ្នាចំពីមុខពេញទំហឹងកណ្ដាលទ្រូងផ្លូវបណ្ដាលឲ្យអ្នកបើកបរម្នាក់ស្លាប់ ក្រោយបញ្ជូនដល់មន្ទីរពេទ្យ និង២នាក់ទៀតរងរបួសធ្ងន់ កាលពីវលាម៉ោងជាង ៨យប់ ថ្ងៃទី២០ ធ្នូ នៅលើផ្លូវជាតិលេខ២១B ស្ថិតក្នុងភូមិព្រែកថី ឃុំរកាខ្ពស់ ស្រុកស្អាង ខេត្តកណ្តាល។
ប៉ូលិសចរាចរណ៍ស្រុកស្អាងបានឲ្យដឹងថា ជនរងគ្រោះដែលស្លាប់មានឈ្មោះ ប៉ូច ហេង ភេទប្រុស អាយុ៣៤ឆ្នាំ ជាកសិករ ទីលំនៅភូមិស្វាយតានី ឃុំព្រែកគយ ស្រុកស្អាង ខេត្តកណ្តាល និងអ្នករួមដំណើររងរបួសធ្ងន់ មានឈ្មោះ ប្រុស ភេទប្រុស អាយុ៣៥ឆ្នាំ មុខរបរកសិករ ទីលំនៅភូមិព្រែកខ្មែរ ឃុំស្អាងភ្នំ ស្រុកស្អាង ។ អ្នកទាំងពីរជិះម៉ូតូម៉ាកហុងដា C125 ស៊េរី២០១១ ពណ៌ខ្មៅ ពាក់ស្លាកលេខ កណ្តាល 1N.6661 និងអ្នករងរបួសធ្ងន់ម្នាក់ទៀតឈ្មោះ អៃ សុវណ្ណនី ភេទប្រុស អាយុ២៣ឆ្នាំ មុខរបរកម្មករ បច្ចុប្បន្នស្នាក់នៅភូមិព្រែកសំរោង សង្កាត់សេរីភាព ក្រុងតាខ្មៅ ខេត្តកណ្តាល ជិះម៉ូតូធុន C125 ស៊េរី២០០៨ ពណ៌ខ្មៅ ពាក់ស្លាកលេខ កណ្តាល 1H.8612។
សាក្សីក្បែរកន្លែងកើតហេតុបានឲ្យដឹងថា មុនពេលកើតហេតុគេឃើញម៉ូតូមួយគ្រឿងម៉ាកហុងដាធុនសេ ១២៥ ស៊េរីឆ្នាំ២០០៨ បើកបរមានល្បឿនលឿនក្នុងទិសដៅពីត្បូងទៅជើង លុះមកដល់ចំណុចកើតហេតុ មានម៉ូតូមួយគ្រឿងទៀត ម៉ាកហុងដាសេ១២៥ ស៊េរី២០១១ ជិះឌុបគ្នាពីរនាក់ ក្នុងទិសដៅបញ្ច្រាសគ្នាពីជើងទៅត្បូង បានបុកគ្នាចំពីមុខពេញទំហឹងចំកណ្ដាលទ្រូងផ្លូវបណ្តាលឲ្យម៉ូតូទាំងពីរគ្រឿខ្ទាតមកកៀនផ្លូវ ខាងស្ដាំរៀងៗខ្លួន និងខ្ទាតមនុស្ស បោកនឹងថ្នល់ រងរបួសធ្ងន់ទាំងអស់គ្នា ដេករដូករណែល ត្រូវសមត្ថកិច្ចដឹកបញ្ជូនទៅសង្គ្រោះនៅមន្ទីរពេទ្យ ។
ប៉ូលិសបានបញ្ជាក់ថា មូលហេតុគ្រោះថ្នាក់ចរាចរណ៍នេះ ដោយសារបើកបរលឿន និងខ្វះការប្រុងប្រយត្ន័ ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ