អ្នកនាំពាក្យម្នាក់របស់ប៉ូលិសបញ្ជាក់ថា ប៉ូលិស២នាក់បានត្រូវបាញ់សម្លាប់កាលពីរសៀលថ្ងៃទី២០ ធ្នូ នៅទីក្រុងញូវយ៉ក ។ អ្នកបាញ់ប្រហារបន្ទាប់មកបានបាញ់សម្លាប់ខ្លួនឯង។ ការវាយប្រហារនោះកើតមាននៅ BROOKLYN សង្កាត់ BEDFORD STUYVESANT នាវេលាម៉ោង១៤និង៥០នាទីម៉ោងក្នុងស្រុក ។
អ្នកនាំពាក្យរូបនេះពុំចង់បញ្ជាក់ពីការសម្លាប់ប៉ូលិសទាំង២នាក់នោះ ឬបញ្ជាក់ពីស្ថានភាពបែបណានៃសោកនាដកម្មនោះឡើយ ។ ទោះបីយ៉ាងណា ប៉ុស្តិ៍ប៉ូលិសជាច្រើននៃទីក្រុងនោះនិយាយតាម TWITTER ពីការបាញ់សម្លាប់ប៉ូលិស២នាក់នោះដែរ ។
រដ្ឋអាជ្ញារដ្ឋញូវយ៉ក លោក ERIC SCHEIDERMAN បរិហារថា នោះជាអំពើឃោរឃៅយ៉ាងកំសាកមួយ ហើយយើងសម្តែងការចូលរួមមរណទុក្ខជាមួយគ្រួសារប៉ូលិសរងគ្រោះ ។
ប៉ូលិសទាំង២នាក់នោះត្រូវសម្លាប់ពេលពួកគេស្ថិតក្នុងរថយន្តល្បាតមួយ ។ ជនវាយប្រហារបន្ទាប់មកបានរត់គេចខ្លួនរហូតដល់ស្ថានីយមេត្រូមួយ មុនពេលបាញ់សម្លាប់ខ្លួនឯងត្រង់ក្បាល ។ ជននេះមានអាយុ២៨ឆ្នាំ ហើយកាសែត DAILY NEWS សរសេរថា រូបគេជាសមាជិកនៃក្រុមជនខិលខូច BALTIMORE ដែលធ្លាប់អះអាងតាមបណ្តាញសង្គមថា ចង់តែសម្លាប់ប៉ូលិស ។
សោកនាដកម្មនេះកើតឡើងក្នុងពេលដែលមានស្ថានការណ៍តានតឹង ព្រោះតែរឿងលោក ERIC GARNER បុរសស្បែកខ្មៅម្នាក់ដែលត្រូវស្លាប់ពេលពួកប៉ូលិសស្បែកសចាប់ខ្លួនគេបែបសាហាវនៅ STATE ISLAND ជាសង្កាត់មួយនៃក្រុងញូវយ៉ក កាលពីខែកក្កដា កន្លងទៅ ។
បាតុកម្មនានាផ្ទុះឡើងនៅទីក្រុងញូវយ៉កក្រោយការសម្រេចរបស់គណៈក្រុមប្រឹក្សាតុលាការមិនចោទប្រកាន់ប៉ូលិស ដែលយកដៃគាបករបស់គេរហូតដល់ស្ទះដង្ហើមស្លាប់ពេលចាប់ខ្លួន ៕
ចែករំលែកព័តមាននេះ