រាជធានីភ្នំពេញ ៖ នៅទីបំផុត កូនសិស្សរបស់លោក ជួន សំណាង មកពីក្លិបបាត់ដំបងពាយ័ព្យ បានក្លាយជាអ្នកឈ្នះទាល់តែបាន ក្នុងការប្រកួតដណ្ដើមពាន និងប្រាក់លានដ៏ស្វិតស្វាញកាលពីថ្ងៃទី២០ ធ្នូ នៅលើសង្វៀនទូរទស្សន៍បាយ័ន ។ កីឡាករ សំណាង ឌីណា បានបង្ហាញនូវមោទនភាពយ៉ាងខ្លាំង បន្ទាប់ពីធ្វើឲ្យក្ដីស្រមៃរបស់ខ្លួនក្លាយជាការពិតនៅវគ្គចុងក្រោយ ។
នេះជាការប្រកួតដណ្ដើមពាន និងប្រាក់លានលើកទី៤ ដែលតម្រូវឲ្យកីឡាករ សំណាង ឌីណា ឆ្លងកាត់នូវការប្រកួតប្រជែងបញ្ជាក់ពីសមត្ថភាពជាច្រើនអន្លើ មុនឈានមកដល់ការប្រកួតផ្ដាច់ ព្រ័ត្រប៉ះជាមួយកីឡាករ សយ សី មកពីក្លិបពន្លឺវិបុលរិទ្ធីនោះ ។ យោងតាមការប្រកួតភាគីទាំងសងខាងសុទ្ធតែមានចំណុចល្អរៀងខ្លួន ។ កីឡាករ សយ សី ដ្បិតថាមិនសូវលោតខ្លាំងក្នុងពិភពប្រដាល់ ក៏កម្រិតប្រកួត និងស្នាដៃរបស់លោកល្អមិនអាចមើលស្រាលសម្រាប់ការប្រកួតនោះ ជាពិសេសស្នៀតមា៉ត់ កែង និងទាត់ ។ ការប្រកួតនេះ កីឡាករសយ សី ហាក់មានជំនឿចិត្តច្រើនជាងក្នុងការដណ្ដើមយកពាន ដោយមានទាំងអ្នកទស្សនា ដែលជាអ្នកគាំទ្រធ្វើកម្រងក្រដាសប្រាក់ពាក់ឲ្យព្រោងព្រាត និងមានក្មេងៗ២នាក់ឈរអមនៅវគ្គប្រកាសលទ្ធផល រំលេចឲ្យឃើញនូវកិត្តិយសលុបលើគូប្រកួតនោះផង ។ អញ្ចឹងហើយ ទើបកីឡាកររូបនេះ និងអ្នកគាំទ្រមានការខកចិត្តដូចធ្លាក់ពីលើទួលខ្ពស់ បន្ទាប់ពីត្រូវប្រកាសថាចាញ់ ដែលមានន័យថា ម្ចាស់ពានកិត្តិយសអនុស្សាវរីយ៍របស់ទូរទស្សន៍បាយ័នជំនាន់ទី៤ប្រចាំឆ្នាំ២០១៤ គឺ ជារបស់កីឡាករ សំណាង ឌីណា ដែលជាកូនសិស្សសំណព្វចិត្តរបស់លោកជួន សំណាង មន្ត្រីអ្នកផ្ដល់ពិន្ទុរបស់ស្ថានីយទូរទស្សន៍មួយនេះ ។ ទោះជាមានការលើកឡើងថា ជ័យជម្នះរបស់ សំណាង ឌីណា មានលោក ជួន សំណាង ជាគ្រូបង្វឹកនៅពីក្រោយ ក៏ការប្រកួតជាក់ស្ដែងនៅតែមើលឃើញកីឡាករដែលឈ្នះ គឺសមនឹងឈ្នះ និងសមក្លាយជាម្ចាស់ពានពិតប្រាកដ។ ការប្រកួតនេះ ត្រូវគេឃើញផ្ទុះឡើងនូវសំឡេងទះដៃ និងគាំទ្រយ៉ាងកងរំពង ពិសេសនៅពេលដែលកីឡាករបង្គោលក្រហម និងបង្គោលខៀវ បើកឆាកប្រយុទ្ធដាក់គ្នាទាំង៥ទឹក ដោយមិនមានការសំចៃដៃ ។
លោក ជួន សំណាង ជាគ្រូបង្វឹករបស់អ្នកឈ្នះបានបង្ហោះរូប និងសរសេរនៅលើគណនីហ្វេសប៊ុកភ្លាមៗថា ជាកិត្តិយសដ៏កម្រដែលកីឡាករនៅក្នុងក្លិបរបស់លោកធ្វើបានសម្រេចនៅក្នុងការប្រកួតដ៏សំខាន់មួយនេះ ។ លោកបានសរសេរថា៖ «កូនសិស្សខ្ញុំ សំណាង ឌីណាក្លិបកីឡាប្រដាល់បាត់ដំបងពាយ័ព្យបានទទួលជ័យជម្នះហើយបងប្អូន» ។ លោកបន្ថែមថា ពានរង្វាន់កិត្តិយសដែល សំណាង ឌីណា ទទួលបាននេះ មិនមែនកើតឡើងពីសមត្ថភាពប្រកួត និងសមត្ថភាពបង្វឹករបស់លោកតែ២មុខនោះទេ ប៉ុន្តែអ្វីដែលសំខាន់ គឺការលើកទឹកចិត្តដ៏ខ្លាំងក្លារបស់មហាជនជារួមតែម្ដង ។ ទោះបីយ៉ាងណា កូនសិស្សតែម្នាក់របស់លោក ដែលបានទទួលកិត្តិយស ហើយក៏មិនមែនជាលើកទី១របស់កីឡាករ សំណាង ឌីណា នោះទេ ដោយសារតែកន្លងមក ក៏មានកូនសិស្សរបស់លោកផ្សេងទៀតបានទទួលលទ្ធផលល្អបែបនេះ ឯសំណាង ឌីណា ផ្ទាល់ ក៏ធ្វើឲ្យមានការទទួលស្គាល់មកដែរ ក្នុងប្រភេទទម្ងន់៥១គីឡូក្រាម ។ លោកជួន សំណាង ប្រាប់ថា កូនសិស្សរបស់លោកទទួលបានទឹកប្រាក់២លាន២សែនរៀល និងពានកិត្តិយសមួយ ខណៈពានដែល សំណាង ឌីណា ទទួលបាន គឺតំណាងឲ្យឈ្មោះក្លិបទាំងមូល ដែលជាមុខមាត់ទាំងអស់គ្នា ។ ក្នុងនាមជាគ្រូបង្វឹក លោកស្ដែងចេញនូវមោទនភាពយ៉ាងខ្លាំង ដែលឃើញកូនសិស្សអាចបំបាក់កីឡាករសយ សី ដែលជាជើងខ្លាំង ហើយយកតំណែងម្ចាស់ពានជំនាន់ទី៤ បានសម្រេច ។
លោក សូ សារិ មន្ត្រីទំនាក់ទំនងផ្នែកកីឡាប្រដាល់ប្រាប់ថា ការប្រកួតនេះ មានបំណងតែមួយគត់ គឺបំផុសកីឡាករវ័យក្មេងក្នុងប្រភេទទម្ងន់ស្រាល គឺ៥១គីឡូក្រាម ដែលពុំសូវមានការចាប់អារម្មណ៍ឲ្យមានកិត្តិយស និងមុខមាត់នៅក្នុងពិភពប្រដាល់ ។ បើទោះជាការប្រកួតនេះ មិនមានលក្ខណៈសាំញ៉ាំ ដូចការប្រកួតដណ្ដើមខ្សែក្រវាត់ ក៏វាជាការប្រកួតមួយ ដែលជួយឲ្យកីឡាករដែលបានចូលប្រកួត ត្រូវបានមហាជនកត់សម្គាល់ និងល្បីឈ្មោះក្រោយពេលប្រកួតឈ្នះនោះដែរ ។ ក្នុងឆ្នាំ២០១៥ខាងមុខ ព្រឹត្តិការណ៍ប្រដាល់ដណ្ដើមពានកិត្តិយសបែបនេះ នឹងមានកាន់តែច្រើនថែមទៀត ដោយផ្ដោតជាសំខាន់ឲ្យកីឡាករក្មេងៗ ដែលប្រកួតល្អ បានល្បីឈ្មោះ និងមានការចាប់អារម្មណ៍ ។ លោកនិយាយថា កីឡាករទម្ងន់ស្រាលមិនសូវមានការចាប់អារម្មណ៍ឲ្យប្រកួតដណ្ដើមខ្សែក្រវាត់នោះទេ ប៉ុន្តែបើពួកគេមានឈ្មោះថា ជាម្ចាស់ពាននេះ ឬម្ចាស់ពាននោះ ក៏ប្រសើរជាងការប្រកួតឈ្នះធម្មតាៗផងដែរ ។ ជាក់ស្ដែងក្នុងការប្រកួតកន្លងមក កីឡាករម្ចាស់ពាន៣ជំនាន់មុនៗ សុទ្ធតែល្បីឈ្មោះរួចមកហើយ បន្ទាប់ពីឈ្នះពានដូចគ្នានេះ ។ មិនខុសគ្នា លោកក៏ជឿថា សំណាង ឌីណា នឹងទទួលបានភាពល្បីល្បាញក្នុងពេលដ៏ខ្លីដូចគ្នា ៕
ចែករំលែកព័តមាននេះ