រាជធានីភ្នំពេញ ៖ ក្រុមអ្នកភូមិក្នុងឃុំរកា ស្រុកសង្កែ ដែលមកពិនិត្យឈាមរកមេរោគអេដស៍ មានការថយចុះប្រមាណពាក់កណ្តាលគិតត្រឹមថ្ងៃម្សិលមិញ ។ នេះបើយោងតាមលោកវេជ្ជបណ្ឌិត មាន ឈីវុន ប្រធានមជ្ឈមណ្ឌលជាតិប្រយុទ្ឋនឹងជំងឺអេដស៍ សើស្បែកនិងកាមរោគនៃក្រសួងសុខាភិបាល ដែលបា្រប់កោះសន្តិភាពតាមទូរស័ព្ទនៅព្រឹកថ្ងៃទី២១ ធ្នូ ២០១៤ ។
បើតាមលោកវេជ្ជបណ្ឌិត មកដល់ពេលនេះ លទ្ឋផលនៃការស្រាវជ្រាវអង្កេតករណីឆ្លងរោគសញ្ញាអេដស៍នៅឃុំរកានេះមិនទាន់ដឹងនៅឡើយទេ ហើយថាការស្រាវជ្រាវនៅតែបន្តធ្វើទោះថ្ងៃអាទិត្យក្តី ។ លោកប្រធានមជ្ឈមណ្ឌលជាតិប្រយុទ្ឋនឹងជំងឺអេដស៍ សើស្បែកនិងកាមរោគ បានបញ្ជាក់ទៀតថា ការផ្តល់ប្រឹក្សាដល់ពលរដ្ឋដែលរកឃើញថាមានផ្ទុកមេរោគអេដស៍ក៍បាននិងកំពុងតែបន្តធ្វើ ប៉ុន្តែចំនួនអ្នកផ្ទុកមេរោគអេដស៍មិនទាន់ច្បាស់នៅឡើយទេ ។
គួរបញ្ជាក់ថា ចាប់តំាងពីថ្ងៃទី០៨ ធ្នូ ២០១៤មក ក្រុមអ្នកភូមិក្នុងភូមិ-ឃុំរកា ស្រុកសង្កែបាននំាគ្នាភ្ញាក់ផ្អើលយ៉ាងខ្លំាង បន្ទាប់ពីមានពលរដ្ឋជាច្រើននាក់មកពិនិត្យឈាមនៅមណ្ឌលសុខភាពឃុំរកា ត្រូវបានគេអះអាងថារកឃើញមានផ្ទុកមេរោគអេដស៍ជាង១០០នាក់ ដែលអ្នកផ្ទុកភាគច្រើនអះអាងដែរថា ពួកគាត់សុទ្ឋតែធ្លាប់ឲ្យលោកវេជ្ជបណ្ឌិតក្នុងភូមិម្នាក់ឈ្មោះ យ៉ែម ជ្រិន ចាក់ថ្នំានិងព្យាបាល ។
យ៉ាងណាក៍ដោយ សម្តេចតេជោ ហ៊ុន សែន កាលពីថ្ងៃទី១៨ធ្នូកន្លងមកថ្មីៗនេះ បានមានប្រសាសន៍ថា ៩៩% សម្តេចមិនជឿថាមានការឆ្លងមេរោគអេដស៍ច្រើនបែបនេះ និងសុំឲ្យពលរដ្ឋក្នុងភូមិកុំមានការតក់ស្លុតទុកលទ្ឋភាពឲ្យមន្រ្តីជំនាញខាងអង្គការសុខភាពពិភពលោក និងមន្រ្តីជំនាញក្រសួងសុខាភិបាលកម្ពុជា រួមគ្នាស្រាវជ្រាវអង្កេតករណីនេះសិន និងអំពាវនាវដល់អ្នកភូមិកុំប្រើអំពើហិង្សាណាមួយលើកលោកគ្រូពេទ្យភូមិ និងក្រុមគ្រួសារនោះថែមទៀត ៕
ចែករំលែកព័តមាននេះ